1 Thessaloniciendjé 3 - Mbede Lə Luba Kone Gə Sigi

¹ Gəl-e gə nee ɓa logə j-a ngina pḭḭ j-o no sisəy ang ɗaa, j-a pa na may kar-sijee j-isi gə kar-si baa Atɛn nee,

² ɗaa j-ula ngon ko̰-si Timoce gə to nje baa kula lə Luba ɗəw Tar gə May gə lə Kirisi, mba kar n-aw n-ar-si singa ngaɓa n-ula jingaw mə-si gə n-ar ɔsə kudu takagə lə-si,

³ mba kar neməko̰je gə ɓisine cɛdə singa dəw kara horo-sisəy gə ang. Mba sisəy ja kara ꞌgərəje to gə neje gə əng le to ɔji dɔ sijee ja.

⁴ Logə gə j-aw ne ɓe lə-si le, j-a pa j-ar-si kede nam to gə neməko̰je a ce dɔ sijee gə ɗaa neje le ɗe ja tɔ, sisəy kara ꞌgərəje ja.

⁵ Gəl-e gə nee ɓa ꞌma ja kara m-ore mə-m pḭḭ ɗaa m-ula Timoce mba kar aw tən-si dɔ takagə lə-si o, mba m-ɓəəl m-pa na kar nje kərə dəwje d-aw d-ərə si ngaɓa kar tuji ne kula gə sijee j-a ɗa le pugudu.

⁶ Ngaa logə Timoce ḭ ɓe lə-si ɗe ɗaa, n-pa tar takagə lə-si gə maj-ɛ nəm, njigi naa lə-si, gə mə-sisəy gə uy dɔ sijee ang ngaɓa mal təl ko kəm sijee gə ɗa sisəy le, mal sisəy kara ɗa sijee ɗəw kara be tɔ.

⁷ Ngan ko̰-mje, be ɓa dan ne ur tije gə tɔ̰y gə dan neməko̰je gə j-isi kəne le, mbɔr dɔ kuwa gədərə lə-sisəy ɓa sijee j-inga ne singa.

⁸ Ɓisine sijee j-isi kəm baa mba sisəy uwa-je gədərə ɗəw gə lə Mbayɓe.

⁹ Oyo gə ban ja ɓa j-a ɗa Luba mba tar lə-sisəy, ɔji dɔ rɔləlje tɔ̰y gə j-a ɗa mba tar lə-sisəy no-gɔl Luba gə wa?

¹⁰ Cil gə kar ja, j-a ɗa ndoo no-ɛ gə ngɔɔgɔ-ngɔɔgɔ, mba kar n-ar j-a təl j-o kəm-si ngaɓa mba kar j-aw tɔl ta ne gə lal-si ɗəw takagə gə lə-si.

¹¹ May kar ꞌne gə Luba gə darɔ-ɛ ja, gə Bɔ-sijee, ngaɓa Mbayɓe lə-si Jeju ꞌgɔl ɗəw d-ar ja ce ne ɓe lə-si.

¹² May kar Mbayɓe ar njigi naa lə-sisəy gə yo gə nee ɔsə dɔ mar-ɛ gə kede-kede ngaɓa ɓar mii nəm, cibi ɓa ɔji dɔ dəwje tɔ̰y, to to gə sijee j-a njigi sisəy be tɔ;

¹³ may kar n-ula jingaw mə-si gə mba kar tar uwa dɔ-si ɔji dɔ sangə rɔ lə-si no gɔl Luba gə ang, dɔ ndɔ gə Mbayɓe lə-si Jeju a ɗe nee gə njerɔsangəje tɔ̰y. Oyo.