1 Thessaloniciendjé 2 - Mbede Lə Luba Kone Gə Sigi

Pɔl aw Tesaloniki

¹ Ngan ko̰-mje, sisəy ja kara ꞌgərəje to gə kaw gə j-aw ɓə lə-si le toro-e to baa ang.

² Ngaa, go ꞌməsərə gə j-o ngaɓa kəm-si gə d-ula ndoo mə ɓe gə Pilipi gə to gə oje ne tar-ɛ le ja kara, Luba ula jingaw mə-sijee gə ar j-ila mbərə Tar gə May lə-a j-ar-sisəy dan nejɔgəje gə bula.

³ Tar ndəjije lə-sijee le, j-ar gə mbɔr-ɛ baa ang nəm, gə kəji gə mina ang nəm ɓa j-a ɗa gə gusu baa ang nəm tɔ;

⁴ ngaa mba Luba na mə-sijee ɗaa o-si gə maj-ɛ ɓa um kula kila mbərə Tar gə May ji-si gə, be ɓa j-a pa tar mba may ne ta kəm dəwje baa ang ngaa mba may ne ta kəm Luba gə nje na mə dəwje.

⁵ Be ɓa sisəy ja kara ꞌgərəje to gə, no gɔl Luba gə ja, ndɔ kara j-a yom-si gə tar ang nəm, ngaɓa ɓo neje kara uwa-si ɓərə gə ang nəm tɔ.

⁶ J-a sangə riɓar gə ḭ rɔ dəwje gə ang nəm, rɔ sisəy gə ang nəm ngaɓa rɔ nje gə kɛm gə ang nəm tɔ.

⁷ Mba j-a to njeka̰ykulaje lə Kirisi le ɗaa, kəm kar j-a ɗa rɔ-sijee gə dəwje ja to ɓəəl horo-sisəy gə ja, ngaa j-o rɔ-si gə ne ang baa horo-sisəy gə, to to gə ko̰ nganje tɔsə ne kəm-e dɔ ngan-ɛ gə be.

⁸ J-a njigi sisəy ya̰ le ɗaa, j-a njinga rɔ-si mba kila mbərə Tar gə May lə Luba ja kara baa kar-si ang, ngaa darɔ təbə lə-sijee ja kara j-a kun kar-si mba j-a njigi-si j-ar al dɔ lo sula.

⁹ Ngan ko̰-mje, oleje mə-si dɔ rɔ-sijee gə j-ula ndubu ngaɓa gə dɔ kɔrje gə j-ɔr gə, j-a ɗa kula cil gə kar le, ɓa mba to ne nekodo dɔ dəw kara horo-sisəy gə ang ja ɓa j-ila ne mbərə Tar gə May lə Luba j-ar-si.

¹⁰ Sisəy ꞌtoje nje tar naj-ɛje ngaɓa Luba nəm, to gə pa nja sijee to gə losang-ɛ, gə dɔ gɔl-ɛ ngaɓa gə bar-ɛ yaw horo-sisəy njetakagəje gə.

¹¹ Sisəy ꞌgərəje to gə na-na kara horo-si gə le, j-a ɗ-ɛ to to gə bɔ nganje ɗa ne ngan-ɛ gə maj-ɛ be.

¹² J-a ndəji-si, gə j-ula jingaw mə-si gə ngaɓa j-ar gə si taar jigiri kar pa nja-si ta kəm Luba gə ɓar-si kar-si andə-je ɓeko̰ gə lə-a gə dan rɔnduba gə lə-a.

¹³ Gəl-e gə nee ɓa j-a ɗa Luba oyo taar-taar mba tar lə Luba gə j-a pa gə oso mbi-si gə le, oje gə tar gə ta dəwje gə baa ang, ngaa oje gə tar gə tɔgərɔ ja, gə tar lə Luba gə ɗa kula mə-sisəy nje ta kag-eje gə.

¹⁴ Be ɓa ngan ko̰-mje, ꞌtəl ꞌtoje nje ndaji kəm Mbo̰ naaje lə njetakagəje gə lə Luba gə gəl Kirisi Jeju gə gə d-isi dɔ nangə gə Jude gə. Mba njebaɓeje lə-sisəy gə kuji kəy ja d-ula kəm-si ndoo ɗəw kara baa to gə Jiibije d-ula ne kəm ꞌjejee ndoo be tɔ.

¹⁵ ꞌJejee gə nee ja ꞌtɔlje Mbayɓe Jeju, gə pajambərəje, ngaɓa d-ulaje kəm sijee ndoo, ꞌtaje kəm Luba ang, ꞌtoje njeba̰a̰je lə dəwje tɔ̰y.

¹⁶ D-ɔgə si ɗəw kar j-a pa tar j-ar dəwje gə ꞌgərə Luba ang d-inga ne kaji ngaɓa ꞌɗaje ne neɗaje gə kṵra̰y lə-je gə kede-kede. Ngaa lo tɔl t-ɛ ɗaa wungu lə Luba ubaje nangə.

Njinga rɔ lə Pɔl

¹⁷ Ngan ko̰-mje, ɔji dɔ sijee le ɗaa j-o kəm-si ang kuru lo əw ɓəl ja ngaa mə-sijee uy dɔ sisəy ang, j-a sangə ɗəw ya̰ ja mba təl kaw ko-si kar mal-ɛ unda nangə.

¹⁸ Gəl-e gə nee ɓa, j-a njigi kaw ɓə lə-si gɔl kara ose joo ja, ngaɓa ꞌma Pɔl gə darɔ-m ja kara m-njigi kaw ngaa ꞌSu ila kagə no sijee gə.

¹⁹ Ɗi ja ɓa to ne kunda mə lə-sijee wa? Sisəy ja ꞌtoje rɔləl lə-sijee, gə jɔgə ne riɓar lə-sijee gə dɔ ndɔ təl gə lə Mbayɓe lə-si Jeju.

²⁰ Tɔgərɔ ja, ꞌtoje ne riɓar lə-sijee gə ne rɔləl lə-sijee.