1 Piyɛr 4 - Mbede Lə Luba Kone Gə Sigi

¹ Be ɓa, mba Kirisi o ꞌməsərə ɗəw darɔ gə, ɗaa sisəy kara a gɔlje kəji lə-si mba ko ꞌməsərə to gə ꞌne be tɔ; mba dəw gə o ꞌməsərə darɔ-ɛ gə le, cḭ gə neɗa gə kṵra̰y,

² mba kar ɓo neje gə darɔ gə d-ɔ̰ dɔ-ɛ ang ngaa, ngaa kar ndɔ kisi kəm baa lə-a nay ɓi nama mə njigi lə Luba ɓa n-ɗa.

³ Ɗa gə ꞌɗaje mə njigi lə nje gərə Luba ang je ləw baa le asə mbagə ja ngaa. Mba kede le, ꞌɗaje ne to to gə dəwje gə dɔ-je godo be, ɓo neje gə d-uwa-si ɓərə gə, kay kodo mbə, mbula nekusa mə-si gə, kuwa baa nekay mbə, ngaɓa polo magəje gə ngabula.

⁴ Logə d-o to gə a̰yje gə je ngɔdə dɔ-si gə lo neɗaje gə kṵra̰y gə al dɔ lo le ang ɗaa d-o gə ne gə sigi, ɗaa ꞌtəlje ꞌpaje tar gə kṵra̰y dɔ-si gə.

⁵ Be ɓa d-a kɔr-je gəl neje gə əng le no dəw gə isi dɔ gɔl-ɛ gə mba gangə tar dɔ nje d-aw kəm baa gə gə nje gə d-uy gə.

⁶ Gəl-e gə nee le ɓa, nje gə jabaw kara d-ila mbərə d-ar-je tɔ, ꞌgangə tar dɔ-je gə ɗəw darɔ gə nam ja ngaa, mba kar njilje inga ne lokisi rɔ Luba gə.

⁷ Ɗudu neje nay njɛ̰ baa, ɗaa ꞌcibije dɔ rɔ-si gə ang ngaɓa undaje kəm karə dɔ rɔ-si gə ɗəw dəji Luba gə.

⁸ Ne gə may ya̰ ja, njigije naa gə yo gə nee jaga-jaga, mba njigi on dɔ neɗaje gə kṵra̰y bula.

⁹ ꞌƊaje naa mba lal yɛngə ne tar.

¹⁰ Mba na-na kara Luba ar-ɛ gusu ɗəw mənuji gə, ɗaa gusu gə Luba ar-si le, ꞌɗaje ne ne ar-je gə nje gə kɛm tɔ. Be ɓa a toje njengom ne mənujije ɓədə-ɓədə gə Luba ar-si.

¹¹ Dəw gə Luba ar-ɛ gusu pa tar nama pa ne tar lə Luba, ɓo gusu ɗa may gə dəwje nama, may kar-ɛ ɗa gə je may gə singa gə Luba ar-ɛ le, mba kar Luba gə njerɔnduba gə njesingamongə gə gə ɓal-ɓal inga ne riɓar ɗəw gə lə Jeju Kirisi. Oyo.

¹² Ngan ko̰-m gə m-njigi-si ya̰, nena gə inga si to gə yɛl pər gə ubaje nangə be le, oje gə ne sigi ang.

¹³ Ngaa ꞌɗaje rɔləl mba oje ꞌməsərə gə Kirisi naa gə, mba kar ndɔ gə n-kila ne rɔnduba lə-a gə ɗaga nama ingaje ne rɔləl gə boy.

¹⁴ To gə ɓo ꞌtaji-si mba ri Kirisi nama, ꞌtoje njenokarəje, mba Njil rɔnduba gə to Njil lə Luba nay gə si.

¹⁵ May kar dəw kara ja horo-si gə o ꞌməsərə gə nje tɔl dəwje ose gə nje ɓogo, ose gə nje ɗa məyɛr, ose gə njenəni ang;

¹⁶ ɓo n-o ꞌməsərə mba to gə n-to njetakagə Kirisi nama n-ar rɔ kul-e uwa ang ngaa n-ula rɔnduba dɔ Luba gə mba ri gə d-unda dɔ-ɛ gə le.

¹⁷ Mba dɔ kar-ɛ asə nama gangə tar a kun kud-e mə kəy gə lə Luba ja. Be ɓa, to gə ɓo d-un kud-e dɔ sijee gə ja nama, nje gə ꞌmbadə ta kagə Tar gə May lə Luba nee le d-a tɔl t-ɛ to gə ban wa?

¹⁸ Ngaa ɓo dəw gə gadə-gadə ja ɓi ɗa ya̰ ɓa ta rɔ-ɛ ngaa, kar dəw gə nje gərə Luba ang ngaɓa gə njeneɗa gə kṵra̰y a to to gə ban wa?

¹⁹ Be ɓa, nje gə d-o ꞌməsərə gə go mə njigi lə Luba nama may kar d-ila kəm lə-je mə ji-a ꞌne gə Njekunda-je gə gadə-gadə, ꞌɗa ne may dɔ-je gə kede.