1 Piyɛr 3 - Mbede Lə Luba Kone Gə Sigi

Tar lə jene je gə ngab-ɛje

¹ Sisəy jeneje kara, may kar ulaje dɔ-si no ngaw-sijee gə, mba kar nje gə ꞌmbadə ta kagə tar le, pa nja lə jeneje turuje ar ꞌtəl ꞌta ne kagə,

² logə d-o pa nja-si gə arə ngadə gə kila kuji.

³ May kar ɗa rɔ mandə kəm dəwje gə, gə neje gə to kuwa dɔ, kum ne mbi maa, gə kula kubu gə lar-ɛ ya̰ ɓa uwa kəji lə-si ang,

⁴ ngaa may kar ꞌɗaje mandə gə a tuji ang, gə kəji kaw yururu ngaɓa uy bɛm, gə ḭ mə-si gə kəy kɔrɔgə, ye ɓa to ne gə ta kəm Luba ya̰.

⁵ Be ɓa jeneje gə ləw gə to gə losang-ɛ, gə d-unda mə-je dɔ Luba gə le, mandə gə nee le ɓa ꞌɗa, d-ula ne dɔ-je no ngaw-jeje gə,

⁶ to gə Sara ila ne kuji dɔ Abəraham gə ɗaa ɓar-ɛ ꞌɓəə-mje. To gə ɓo ꞌɓəəlje ne kara ang ja ɓo ꞌɗaje to to gə ꞌne be nama gə go ɗa may lə-si ja d-a ɓar-si ne ngan-ɛ gə jene.

⁷ Ɗəw kara baa, sisəy ngaw jeneje kara, may kar na-na gə isi gə jene lə-a nama may kar-ɛ gərə to gə jeneje le darɔ-je mbɔr-ɛ unda-si. May kar ꞌɗɔyje-je mba d-inga gə si təbə naa gə kara baa ɗəw mənuji gə, be ɓa mba kar ne kara kara ɗe bəngərə̰ no dəji Luba lə-si ang.

Tar gə ɔji dɔ njetakagəje

⁸ Ɗudu tar gə m-a pa ɓa nee: Ar-je kəji lə-si um go naa gə, umje mə-si naa gə, ꞌnjigije naa gə ngan ko̰ naaje ja, ꞌɗaje məmay gə naa, ulaje dɔ-si ngulum.

⁹ Dəw ɗa si kṵra̰y nama ꞌɗ-ɛje kṵra̰y ba̰a̰ mar-ɛ gə ang nəm, ngaɓa ꞌtaji-si kara ꞌtəl ꞌtajije dəw toro mar-ɛ gə ang, sisəy ɗaa ndu ɓa ꞌtɔrje dɔ dəw gə, mba ye ɓa ꞌɓar-si mb-ɛ, mba kar ingaje ndu tɔr gə neduba.

¹⁰ Dəw gə ɓo njigi kisi gə təbə gə gə maj-ɛ Ngaɓa kuba may gə ndɔ-ndɔ, Nama, may kar ngom t-ɛ dɔ tar gə kṵra̰y gə, gə dɔ tarje gə kar kərə dəwje gə;

¹¹ May kar n-ɔsə ne gə kṵra̰y ngərəng ɗaa ne gə may ɓa n-ɗa, May kar n-sangə ɗɛgɛgɛ ngaɓa n-ndole go-e nəm;

¹² Mba kəm Mbayɓe to dɔ dəwje gə gadə-gadə gə Ngaɓa mbi-a to tagə mba ko ne dəji lə-je, Ngaa kəm Mbayɓe oso dɔ nje ɗa məyɛrje gə ang.

¹³ To gə ɓo kəji ɗa may uwa mə-si le se, na ja ɓa a ɗa si məyɛr wa?

¹⁴ Ngaa, to gə ɓo oje ko̰ mba neɗa gə gadə-gadə nama, ꞌtoje njenokarəje! ꞌƁəəl-jeje ang, ngaɓa ꞌjɔgəje rɔ-si ang nəm tɔ.

¹⁵ Ngaa ꞌsangəje dɔ ɓəngərə-si mba Kirisi, may kar isije kəgəgə mba pa tar dɔ rɔ-si kar dəw gə ɗa-ɗa gə dəji tar ne kunda mə gə lə-si,

¹⁶ ɗaa ꞌpaje gə ndu gɔsə gə kul yururu gə kila kuji, ar-je kəji gə may ɓa uwa mə-si, mba kar lo gə d-aw ꞌpa gə si kəne nama, rɔ kul ɗa ne nje pa tarje gə kṵra̰y dɔ pa nja-si gə may gə ɗəw gə lə Kirisi.

¹⁷ Kar dəw o ko̰ ɗəw ɗa may gə le, ɓo to mə njigi lə Luba nama, to ne gə may unda ɗa ne gə kṵra̰y.

¹⁸ Mba Kirisi kara o ꞌməsərə gɔl kara gə dɔbo̰ ja mba neɗaje gə kṵra̰y, ꞌne gə to dəw gə gadə-gadə ja, n-o ꞌməsərə mba sisəy gə tar uwa dɔ-si, mba kɔr ne no-si kaw ne gə si ɓə lə Luba. ꞌTɔl-ɛ ɗəw darɔ gə, ngaa d-ar n-təl n-aw kəm baa ɗəw Njil gə.

¹⁹ Be ɓa gə ɗəw Njil gə nee le ɓa, n-aw n-ila ne mbərə n-ar nje gə jabaw,

²⁰ nje gə ꞌɗa dɔ ngang gə Luba kede ləw, ngaa Luba ila m-e dɔ mar-ɛ gə, dɔ ndɔ gə Nowe ɗa ne to gə boy, ar dəwje njɛɓərɛ baa ja d-al, dəwje ji nay joo gə man uwa-je ang.

²¹ To ndaji batɛm gə aji-si ɓogəne, gə to ɗəw gə ꞌtogo ne neje gə mina darɔ dəw gə ɗaga ang, ngaa, to kun gə dəw un rɔ-ɛ gə kəji gə may ar Luba, ɗəw ce buwa yo gə lə Jeju Kirisi.

²² Jeju Kirisi gə ḭ aw dara, isi dɔ ji kɔl Luba gə, o̰ dɔ anjije, gə njeko̰ dɔ loje gə dɔ njesingamongəje gə dara tɔ.