1 Piyɛr 2 - Mbede Lə Luba Kone Gə Sigi

¹ Ne ja gə ne gə kṵra̰y nama ɔsə-je ngərəng, ngaɓa kərə dəw, tar mula, ɗa mal ne gə pa tarje gə kṵra̰y dɔ dəw gə.

² Ngaa ɗəw kara baa to gə ngan tayje ꞌnjigi ne mbaa be le, ar-je ɓo mbaa gə arə ngadə, gə to tar lə Luba ɔr-si, mba kar mbɔr dɔ-ɛ ɗaa ꞌtɔgəje ne ɓo ingaje ne kaji,

³ to gə ɓo ꞌnaje to gə Mbayɓe may ya̰.

Jeju to kɔr ər kil kəy

⁴ ꞌƊəmje gə rɔ-ɛ gə, ꞌne gə n-to kɔr ər gə to kəm baa gə dəwje ꞌmbadə, ngaa n-may ta kəm Luba gə ɓa mbər-e.

⁵ Sisəy ja kara, ꞌnayje ɗəw kara baa to gə kɔr ərje gə to kəm baa mba kar undaje rɔ-si naa gə, gə kəy gə ɗəw Njil gə, kəy lə Luba gə to gə losang-ɛ, mba kar unje ne nepoloje gə ɗəw Njil gə, gə ta kəm Luba ɗəw gə lə Jeju Kirisi;

⁶ mba ꞌpa mə mbede gə na: Oje, m-a kila kɔr ər kil kəy Siyo̰ gə, to kɔr ər gə ꞌmbərə, gə may ya̰, A ɓo dəw gə unda m-e kəne nama rɔ kul a kuwa-a ang.

⁷ Ɗɔy to kar-sisəy gə ꞌtaje kagə. Ngaa kar nje gə ta kagə ang ɗaa, Kɔr ər gə njekunda kəyje d-un d-ila kɔrɔ le ja Ye ja təl to kɔr ər gə kil kəy gə Ngaɓa kɔr ər le təl to jigi tuga gɔl To kɔr ər gə təl to ɗəw koso.

⁸ ꞌƊe ꞌtuga gɔl-je jigi gə ꞌce d-oso mba ꞌmbadə kila kuji dɔ tar gə, ꞌnay mba ne gə ɔji dɔ-je.

⁹ Sisəy le ɗaa, ꞌtoje ko dəwje gə ꞌmbərə-je, njekapoloje gə kəy mbay gə, gəl kuji gə to gə losang-ɛ, dəwje gə n-unda-je gə njeka-ɛje, mba kar ilaje mbərə lə nje kɔr-si dan cil ciməri gə, kar isije dan lokarə gə al dɔ lo gə.

¹⁰ Sisəy gə kede ꞌtoje dəwje gə d-aw baa gə nangə əng ngaa ɓisine ꞌtoje dəwje lə Luba; Luba o kəmtondoo lə-si ang, ngaa ɓisine ɗaa n-o kəmtondoo lə-si ngaa.

Pa nja gə may

¹¹ Ngan ko̰-m gə m-njigi-si ya̰, may kar-si ꞌgərəje to gə ꞌtoje nje kaw taarje ngaɓa gə mbaje dɔ nangə nee, ɗaa aje rɔ-si dɔ ɓo neje gə darɔ gə, gə d-aw ɗɔ gə si le.

¹² Ar-je pa nja-si to gə maj-ɛ horo dəwje gə ꞌgərə Luba ang gə, mba kar logə ꞌpa na ꞌɗaje ne gə kṵra̰y kəne nama, kula ɗa si gə may ɓa d-o kəne ngaɓa kar d-ɔsə ne gaji Luba dɔ ndɔ ɗe gə lə-a.

¹³ May kar osoje kul no njeko̰ dɔ dəwje gə tɔ̰y mba Mbayɓe, no mbay gə gə njeko̰ dɔ-si gə,

¹⁴ osoje kul no njeko̰ ɓeje gə n-ula-je mba kar ꞌbɛ̰ ta nje gə ɗa ne gə kṵra̰y, gə mba kar ꞌpidi nje ɗa ne gə may,

¹⁵ mba Luba njigi kar pa nja-si to gə maj-ɛ ar mbəje d-o ne lo pa tar ang,

¹⁶ may kar isije to gə dəwje gə dɔ-je to doy, ɗaa kar dɔ to doy lə-si to ɗəw ɗa ne gə kṵra̰y ang, ngaa ꞌnjaje gə njekulaje lə Luba.

¹⁷ ꞌƊɔyje dəwje tɔ̰y, ꞌnjigije ngan ko̰-si gə mə Kirisi gə, ꞌɓəəlje Luba, ilaje kuji dɔ mbay gə tɔ.

¹⁸ Ngan njekulaje, may kar ꞌɓəəlje ꞌɓəə-sijee dan neje gə tɔ̰y, osoje kul no-je gə, nje gə may gə kul yururu ja gə kar-je baa ang ngaa nje gə ꞌmongə gə si ya̰ kara nəm tɔ.

¹⁹ Dəw gə ɗa-ɗa ja ɓa d-ula kəm-e ndoo dɔ buguru baa ngaa ila m-e dɔ mar-ɛ gə mba to nje ɓəəl Luba nama, to ne gə may ja.

²⁰ To gə ɓo d-ula kəm dəw ndoo mba kula ɗ-ɛ gə kṵra̰y le se, riɓar gə ban ɓa nj-ɛ a kinga wa? Ngaa to gə ɓo ꞌɗaje may ɓa uwaje gədərə dan ꞌməsərə gə nama, to ne gə may ta kəm Luba gə.

²¹ Ye gə kən le ja ɓa ꞌɓar-si mb-ɛ, mba Kirisi kara o ꞌməsərə mba-si tɔ ngaɓa ḭya̰ gə ne kɔji mar-ɛ ar-si, mba kar unje ne dɔ gɔl-ɛ.

²² ꞌNe gə n-ɗa neɗa gə kṵra̰y ang, ꞌne gə tar kərə dəw ce t-ɛ gə ang;

²³ ꞌne gə ꞌtaj-ɛ kara, n-təl n-taji-je toro-e gə ang, n-o ꞌməsərə ja kara n-ɗa singa ang, ngaa n-ḭya̰ rɔ-ɛ yag mə ji nje gangə tar gə gə dɔ gɔl-ɛ gə;

²⁴ ꞌne gə n-unda dɔ-ɛ kede n-ta ne neɗaje gə kṵra̰y lə-si, n-uy ne dɔ kagə gə, mba kar-sijee gə ja to dəwje gə j-uy ɗəw neɗa gə kṵra̰y gə le, j-aw ne kəm baa ɔji dɔ neɗa gə dana gadə, ngaɓa do gə ninga le ɓa ajije ne kəbərə.

²⁵ Mba ꞌnayje to gə badəmje gə d-igi be, ngaa ɓisine ɗaa ꞌtəlje dɔ-si gə ɓə lə njekuul-si ngaɓa nje tɔsə kəm-e dɔ kəm gə lə-si nəm tɔ.