1 Piyɛr 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Piyɛr, njeka̰ykula lə Jeju Kirisi, m-ɗa mbede nee m-ar nje gə Luba mbərə-je, gə ja̰rɛ̰ naa gə mbaje dɔ nangə gə Po̰, gə Galasi, gə Kapadosə, gə Aji ngaɓa Bitini,

² Luba mbərə-si kede nam, ɗəw gə Njil unda-si ne gə losang-ɛ mba kar ila-je ne kuji dɔ Jeju Kirisi gə ɓo kar ꞌtusu ne məs-e dɔ-si gə, ɗaa may kar mənuji gə ɗɛgɛgɛ ɔsə kudu naa ngug-ngug dɔ-si gə.

Kɔsə gaji Luba

³ Ndu tɔr to dɔ Luba gə Bɔ Mbayɓe lə-si Jeju Kirisije gə, gə go məmay lə-a gə boy ɓa uji si ne to gə sigi, ɗəw ce buwa yo gə lə Jeju Kirisi horo nje gə d-uy gə, mba kar j-unda ne mə-si dɔ kisi kəm baa gə,

⁴ gə dɔ nenduba gə a ndusu ang nəm, a mina ang nəm, gə a to kəm-kəm, ne gə d-uwa dɔ gɔl-ɛ ꞌngina-si mə dara gə,

⁵ Sisəy gə ꞌtaje kagə Luba le, Luba ngom-si gəl singamongə gə, mba kaji gə a kila rɔ-ɛ gə ɗaga ɓisine baa dɔ ɗudu ndɔ gə.

⁶ Gəl-e gə nee ɓa sisəy ꞌɗaje ne rɔləl ya̰, le ɓogəne nekəmandooje ɓədə-ɓədə ɗa si kara kur-e a kəw ɓəl baa,

⁷ mba nenaje nee le ja ɓa a tɔji takagə lə-si gə tɔgərɔ, takagə lə-si may unda maa gə to ne gə a tuji ja ngaa d-aw ꞌna gə pər, be ɓa a kingaje ne pidi, gə riɓar ngaɓa d-a ɗɔy-si ne ndɔ gə Jeju Kirisi a kila ne rɔ-ɛ gə ɗaga.

⁸ O-eje ang ja ꞌnjigi-eje. O-eje ang ja ꞌtaje kag-ɛ ngaɓa ꞌɗaje rɔləl gə asə pa ang ngaɓa to ne rɔnduba.

⁹ Mba ingaje ne takagə lə-si gə to kaji lə kəm lə-si.

¹⁰ Pajambərəje gə d-ila mbərə tar mənuji gə d-uwa dɔ gɔl-ɛ mba-si le, d-un rɔ-je ꞌsangə gəl-e ngaɓa d-uru ngira nəm tɔ.

¹¹ Njil Kirisi gə to mə-je gə le, pa ar-je kede nam to gə Kirisi a ko ꞌməsərə ngaɓa rɔnduba a kore go-e. Be ɓa Pajambərəje nee le ꞌsangə ɗəw gə mba gərə dɔ ndɔ gə neje nee le a ɗe ne ngaɓa a to to gə ban wa?

¹² Be ɓa ꞌkila gəl-e d-ar-je to gə neje nee le ɔji dɔ ꞌjejee ang, ngaa ɔji dɔ sisəy, ɓa ꞌto ne nje kula-ɛje. Ɓisine ɗaa nje gə d-aw d-ila mbərə Tar gə May ꞌpa tar neje nee le d-ar-si ɗəw gə lə Njil Njerɔsangə gə ḭ dara ngaɓa anjije ja kara ꞌsangə mba gərə tɔ.

Pa nja gə ta kəm Luba

¹³ Gəl-e gə nee ɓa, ilaje ɓərə-si kagə, undaje kəm karə dɔ rɔ-si gə ngaɓa undaje mə-si dɔ mənuji gə d-a kar-si dɔ ndɔ gə Jeju Kirisi a kila rɔ-ɛ gə ɗaga.

¹⁴ ꞌƊaje to gə nganje gə d-ila kuji, ɗaa ꞌnjaje gə go ɓo neje gə d-o̰ dɔ-si to gə kede ləw d-o̰ ne dɔ-si dɔ mbə gə le ang;

¹⁵ ngaa, ɗəw kara baa to gə nje ɓar-si le to gə njerɔsangə ɗaa sisəy kara may kar ꞌsangəje rɔ-si dɔ pa nja-si gə tɔ̰y,

¹⁶ mba ꞌɗa mə mbede gə na: A toje gə losang-ɛ mba ꞌma kara m-to gə losang-ɛ tɔ.

¹⁷ To gə ɓo nje kɔr kəm dəwje ang, gə gangə tar dɔ na-na gə kara gə go kula ɗ-ɛje le, ꞌɓar-ɛje Bɔ nama, may kar dɔ ndɔ kisi kəm baa gə lə-si dɔ nangə nee ja ꞌɓəəl-eje ɗəw pa nja-si gə.

¹⁸ ꞌGərəje to gə d-un neje gə a tuji, gə to lar ose maa ɓa ndogo-si ne ɗəw pa nja gə kṵra̰y gə, gə bɔ-sijee-je d-ḭya̰ gə nenduba d-ar-si le ang,

¹⁹ ngaa ꞌndogo-si gə məsə gə may pɛdə, to to gə məsə ngon badəm gə rɔ-ɛ to təb ngaɓa arə ngadə, to məsə Kirisi;

²⁰ ꞌmbər-e kede nam ɓa d-unda dara gə dɔ nangə ngaa ɓisine ꞌkila gə ɗaga dɔ ɗudu ndɔ gə nee mba tar lə-si.

²¹ ꞌTaje kag-e to gə Luba ar n-ce buwa yo gə horo nje gə d-uy gə ngaɓa ula rɔnduba dɔ-ɛ gə, mba kar gə go takagə lə-si ɗaa undaje ne mə-si dɔ Luba gə.

²² Mba ꞌtogoje mə-si ɗəw kila kuji dɔ tar gə tɔgərɔ gə, ɓa mba kar ꞌnjigije naa gə maj-ɛ gə ngan ko̰ naaje le ɗaa, may kar uwaje ji njigi naa lə-si nee le kɛgə, gə mə gə arə ngadə,

²³ Sisəy gə ꞌtəl d-uji-si to gə sigi ɗəw gə lə ko ne gə a busu ang, ngaa ɗəw gə lə ko ne gə a to saar gə no, gə to tar lə Luba gə to kəm baa ngaɓa a kunda nangə ndɔ kara ang;

²⁴ mba Dəw gə ɗa-ɗa kara nay ɗəw kara baa to gə mu be Ngaɓa riɓar to to gə pudu mu be; Mu tudu ɗaa pudu-e gə̰y tɔ,

²⁵ Ngaa tar lə Mbayɓe to saar-saar gə no. Tar gə nee le ja ɓa to Tar gə May gə d-ila mbər-e d-ar-si.