1 Jean 5 - Mbede Lə Luba Kone Gə Sigi

Takagə gə kula ɗa takagə

¹ Dəw gə ɗa-ɗa ɓa ta kagə to gə Jeju to Kirisi nama, Luba uji-e, Ngaɓa dəw gə ɗa-ɗa ɓa gə njigi Bɔ ngon je nama njigi ngon-e tɔ.

² Ne gə j-a gərə ne to gə j-a njigi nganje lə Luba ɓa nee: sijee j-a njigi Luba ngaɓa j-a ngom ndu-e tɔ.

³ Be ɓa, njigi lə Luba le to ngom ndu-eje. Cibi ndu-eje le ɔyi ang,

⁴ mba dəw ja gə Luba uji-e le cɛdə ɗɔ dɔ nangə, oje cɛdə ɗɔ dɔ nangə nee le to takagə lə-si.

⁵ Dəw gə nje cɛdə ɗɔ dɔ nangə to na wa? Be ang nama, dəw gə ta kagə to gə Jeju to Ngon lə Luba ja ɓa.

⁶ To ꞌNe, Jeju Kirisi gə ɗe ɗəw gə lə man gə ɗəw gə lə məsə, n-ɗe gə man baa ang, ngaa n-ɗe gə man ngaɓa gə məsə; to Njil ja pa tar naj-ɛ, mba Njil to tar gə tɔgərɔ,

⁷ mba njetar naj-ɛje d-ḭ munda:

⁸ Njil, man gə məsə, nje gə munda nee le nduje asə naa.

⁹ To gə ɓo j-o tar naji lə dəwje nama, tar naji lə Luba bo ya̰; mba tar naji lə Luba le to tar naji gə pa ɔji dɔ Ngon-e.

¹⁰ Dəw gə ta kagə Ngon lə Luba ɗaa tar naji nee le to m-e gə; ngaa dəw gə ta kagə Luba ang nama, dəb-e nee le o Luba gə njetar gə baa, mba mbadə ta kagə tar naji gə Luba pa ɔji dɔ Ngon-e le.

¹¹ Ɗaa oje tar naji nee le ɓa nee: Luba ar-si təbə gə ndɔ gə ndɔ, təbə nee le ḭ rɔ Ngon-e gə.

¹² Dəw gə Ngon isi m-e gə ɗaa, inga təbə; ngaa dəw gə ngon lə Luba isi m-e gə ang nama, kinga təbə lə-a godo.

¹³ Gəl-e gə nee ɓa, m-ɗa ne mbede m-pa ne tar neje m-ar-si mba kar ꞌgərəje to gə ingaje təbə gə gə ndɔ gə ndɔ le nam, sisəy gə ꞌtaje kagə gə ri Ngon lə Luba.

¹⁴ Oje ne gə arə si singa ɓa nee: to gə ɓo j-a dəji-e ne gə go mə njigi lə-a nama, n-o ndu-si.

¹⁵ Cibi, to gə ɓo j-a gərə to gə n-o ndu-si nama, ɗi-ɗi ɓa j-a dəji-e kara, sijee j-a gərə to gə j-inga ne le nam.

¹⁶ To gə ɓo dəw o ngon ko̰-ɛ ɗa neɗa gə kṵra̰y gə a ce yo dɔ-ɛ gə ang nama, may kar dəji Luba kar ar dəb-e nee le təbə; ye gə ɔji dɔ nje gə ꞌɗa neɗa gə kṵra̰y gə a ce gə yo dɔ-je gə ang. Neɗa gə kṵra̰y gə a ce yo to kəne əng, ngaa neɗa gə kṵra̰y gə nee ɓa m-pa kar ꞌdəji Luba ɔji dɔ-ɛ ang baa.

¹⁷ Ne gə dɔ buguru tɔ̰y to neɗa gə kṵra̰y, ɗaa neɗa gə kṵra̰y gə bənəng le a ce yo ang baa.

¹⁸ Sijee j-a gərə to gə dəw gə ɗa-ɗa gə Luba uji-e le, ɗa neɗa gə kṵra̰y ang, mba dəw lə Luba le, ngom-e, ɗaa njeməkṵra̰y ɔr rɔ-ɛ ang.

¹⁹ Sijee j-a gərə to gə j-a to kar Luba, ɗaa dɔ nangə nee tɔ̰y to gəl njeməkṵra̰y gə.

²⁰ Sijee j-a gərə ja cibi to gə Ngon lə Luba ɗe ar-si kəji negərə mba kar j-a gərə ne Luba gə tɔgərɔ, ngaɓa j-a ga̰ gə Luba gə tɔgərɔ ɗəw gə lə Ngon-e Jeju Kirisi. ꞌNe gə to Luba gə tɔgərɔ nəm gə təbə gə gə ndɔ gə ndɔ.

²¹ Ngan-m gə gɔgɔ, ꞌngom-je rɔ-si dɔ magəje.