1 Jean 4 - Mbede Lə Luba Kone Gə Sigi

Ɗəw kɔr kəm njilje

¹ Ngan ko̰-mje gə m-njigi-si ya̰, ꞌtaje kagə njil tɔ̰y baa ang, ngaa ꞌnaje njilje oje se ꞌtoje kar Luba ja wa; mba pajambərəje gə gə mbɔr-ɛ bula ꞌɗe dɔ nangə nee.

² Ne gə a gərəje ne njil lə Luba ɓa nee: njil gə ɗa-ɗa gə pa na Jeju Kirisi ɗe təl rɔ-ɛ to dəw ɗaa to Njil lə Luba;

³ ngaa ɓo njil gə ɗa-ɗa gə gərə Jeju ang nama, to njil lə Luba ang, ɗaa to njil lə nje kəm tar lə Kirisi, to gə oje tar ɗe lə-a le, ɗaa ɓisine n-ga̰ dɔ nangə gə nee nam ngaa.

⁴ Ngan-m gə gɔgɔ, sisəy le ꞌtoje kar Luba, ngaɓa ꞌcɛdəje ɗɔ pajambərəje gə mbɔr-ɛ, mba ye gə isi mə-si gə le to ɓəəl unda nje kisi dɔ nangə gə nee.

⁵ ꞌJejee le, ꞌto dəwje gə dɔ nangə nee, gəl-e gə nee ɓa, tar paje to to gə tar pa dəwje gə dɔ nangə nee, ye ɓa dəwje gə dɔ nangə d-o tar lə-je.

⁶ Sijee le, j-a to dəwje lə Luba, nje gə gərə Luba ɓa d-o tar lə-si, dəw gə to dəw lə Luba ang le a ko tar lə-si ang; ɗəw gə nee ɓa j-a gərə ne Njil tar gə tɔgərɔ gə njil tar gə baa.

Luba to njigi

⁷ Ngan ko̰-mje gə m-njigi-si ya̰, j-a njigi naa gə yo gə nee; mba njigi to Luba. Dəw ɗa-ɗa gə njigi to m-e gə nama, Luba uji-e ngaɓa gərə Luba tɔ.

⁸ Dəw gə njigi to m-e ang le, gərə Luba ang mba Luba to njigi.

⁹ Oje ɗəw gə Luba kila ne njigi lə-a ar-si ɓa nee: Luba ula Ngon-e gə kara baa dɔ nangə gə nee mba kar j-inga təbə ɗəw lə-a.

¹⁰ Ɗəw njigi gə Luba njigi-si le, to gə sijee ɓa j-a njigi-e kede ang baa, ngaa ꞌne ja ɓa n-njigi-si dɔngɔr ngaɓa n-ula Ngon-e to gə nekuga dɔ neɗa gə kṵra̰y lə-si.

¹¹ Ngan ko̰-mje gə m-njigi-si ya̰, to gə ɓo Luba njigi-si ya̰ bənəng nama, may kar j-a njigi naa tɔ, j-a njigi naa gə yo gə nee.

¹² Dəw gə o Luba ja kara kara godo. To gə ɓo j-a njigi naa gə yo gə nee nama, Luba isi mə-si gə, ngaɓa njigi lə-a kara may ɔr njal mə-si gə tɔ.

¹³ Ne gə sijee j-a gərə to gə j-um ne sə-a naa gə ngaɓa ꞌne n-isi ne mə-si gə le ɓa nee: n-ar-si Njil-e.

¹⁴ Cibi sijee le, j-o ngaɓa j-a pa tar naji to gə Bɔ dəwje ula Ngon gə to Njekaji dəwje dɔ nangə nee.

¹⁵ Dəw gə pa gə t-ɛ na Jeju to Ngon lə Luba nama, Luba isi m-e gə ngaɓa dəb-e le um naa gə Luba gə tɔ.

¹⁶ Cibi sijee le, j-a gərə njigi gə Luba njigi-si, j-a ta ne kag-ɛ. Luba to njigi; dəw gə njigi to m-e gə nama, um naa gə Luba, ngaɓa Luba kara isi m-e gə tɔ.

¹⁷ Oje ne gə tɔji to gə njigi may ne ɔr njal mə-si gə le ɓa nee: mba sijee j-a ɓəəl ndɔ gangə tar le ang, j-a ɓəəl ang mba kaw kəm baa lə-si dɔ nangə nee to asə naa gə kar Jeju be tɔ.

¹⁸ Ɓəəl godo mə njigi gə, ngaa njigi gə may ɔr njal le ɔr ɓəəl mə dəwje gə, mba ɓəəl to kaw kəm pər gə. Dəw gə ɓəəl le, njigi gə ɔr njal godo m-e gə.

¹⁹ Ye gə ɔji dɔ sijee ɗaa, njigi to mə-si gə mba ꞌne ja n-njigi-si dɔngɔr.

²⁰ To gə dəw pa na: M-njigi Luba, ɓa n-njigi ngon ko̰-ɛ ang gə kɔrɔ nama, n-to nje ɗəgərə, mba dəw gə o ngon ko̰-ɛ nda̰ ɓa njigi-e ang, ngaa a njigi Luba gə o-e ang na ban wa?

²¹ Ndu gə j-inga ji-a gə ɓa nee: Dəw gə njigi Luba nama a njigi ngon ko̰-ɛ tɔ.