1 Jean 2 - Mbede Lə Luba Kone Gə Sigi

¹ Ngan-m gə gɔ-gɔ, m-ɗa mbede nee m-ar-si mba kar ꞌɗaje neɗa gə kṵra̰y ang. Ngaa to gə ɓo dəw oso dan neɗa gə kṵra̰y gə nama, njetadɔ-si ga̰ no Bɔ dəwje gə, Dəw nee le to Jeju Kirisi, n-to dəw gə gadə-gadə.

² Ɗaa ꞌne n-un rɔ-ɛ gə nepolo n-uga nee dɔ neɗa gə kṵra̰y dɔ-si gə, dɔ-sijee gə ɓa gə kar-si baa ang, ngaa dɔ dəwje tɔ̰y gə dɔ nangə nee.

Njigi naa lə ngan ko̰ naaje

³ Be ɓa, to gə ɓo j-a ngom nduje lə-a gə maj-ɛ nama, ye ɓa a tɔji to gə j-a gər-e tɔ.

⁴ Dəw pa na: M-gər-e, ngaɓa ngom ndu-e ang nama, dəb-e nee le to nje ɗəgərə, cibi tar gə tɔgərɔ godo m-e gə.

⁵ Ngaa dəw gə ngom tar lə-a nama, nj-ɛ nee le njigi Luba to gə tɔgərɔ gə mə gə kara baa. Ye ɓa ar j-a gərə to gə j-a ga̰ sə-a kara baa.

⁶ Dəw gə pa na n-um sə-a naa gə le, a kasə nja to gə ꞌne nja be.

⁷ Ngan ko̰-mje gə m-njigi-si ya̰, to ndu gə sigi ɓa m-ɗa mbede gə m-ar-si ang baa, ngaa to ndu gə ləw gə ga̰ ji-si gə lo kuma kudu neje gə kede ləw baa. Ndu gə ləw gə to tar gə oje le.

⁸ Cibi, m-ɗa ndu gə sigi mə mbede gə m-ar-si, ndu nee le to ndu gə tɔgərɔ ɔji dɔ-ɛ nəm ngaɓa ɔji dɔ sisəy tɔ; mba cil ciməri nday ar lokarə gə tɔgərɔ arə nam ngaa.

⁹ Dəw gə pa na n-isi dan lokarə gə, ɓa njigi ngon ko̰-ɛ ang gə kɔrɔ le, nj-ɛ to dəw gə nay cil ciməri baa ɓi.

¹⁰ Dəw gə njigi ngon ko̰-ɛ le, to dəw gə isi dan lokarə gə, n-a to jigi tunga lə-a ang.

¹¹ Ngaa dəw gə njigi ngon ko̰-ɛ ang gə kɔrɔ le to dəw gə isi cil ciməri gə, dəb-e nee le nja dan cil ciməri gə ngaɓa gərə logə aw gə kəne ang, mba cil ciməri təl-e gə dəw gə kəm-e tɔ.

¹² M-ɗa mbede m-ar-sisəy, ngan-m, mba tar neɗaje gə kṵra̰y ɔr dɔ-si gə gə ri Jeju.

¹³ M-ɗa mbede m-ar-si, bɔ nganje, mba ꞌgərəje dəw gə isi lo kuma kudu neje gə kede ləw baa. M-ɗa mbede m-ar-sisəy, basa̰je, mba ꞌcɛdəje ɗɔ njeməndul nam. M-ɗa mbede m-ar-si, ngan-m, mba ꞌgərəje Bɔ dəwje.

¹⁴ M-ɗa mbede m-ar-si, bɔ nganje, mba ꞌgərəje dəw gə isi lo kuma kudu neje gə ləw baa. M-ɗa mbede m-ar-si, basa̰je, mba uba-je singa ya̰, tar lə Luba uwa mə-si ar ꞌcɛdəje ne ɗɔ njeməndul.

¹⁵ ꞌNjigije dɔ nangə nee ang gə neje gə to kəne ang nəm. To gə ɓo dəw gə njigi nemay gə dɔ nangə nee nama njigi le Bɔ-sijee godo m-e gə;

¹⁶ mba ne tɔ̰y gə to dɔ nangə nee: ɓo gə darɔ gə, kəm kə̰y gə kunda kar mba nekinga gə, neje nee le ḭ rɔ Bɔ-sijee Luba gə ang, ngaa neje le ɗe gə ɗew nemayje gə dɔ nangə nee.

¹⁷ Ɗaa neje gə dɔ nangə nee a nday gə ɓo-e tɔ̰y; ngaa dəw gə nje ɗa mə njigi lə Luba a kisi kəm baa gə ndɔ gə ndɔ.

Nje kəm tarje lə Kirisi

¹⁸ Ngan-m gə gɔgɔ, oje, j-isi dɔbo̰ ndɔ gə, to gə sisəy oje tar-ɛ na nje kəm tar lə Kirisi aw ɗe; ngaɓa ɓogəne ne kara nje kəm tarje lə Kirisi bula ꞌga̰ nee, gəl-e gə nee ɓa sijee ja gərə ne to gə dɔbo̰ ndɔ ɗe nam.

¹⁹ Nje kəm tarje lə Kirisi le ꞌce horo-sijee gə ja ɓa d-aw, ngaa ꞌto kar-sijee ang ngaa; mba to gə ɓo ꞌto dəwje lə-si nama d-a kisi gə si; ngaa, to arə ngadə to gə ꞌjejee tɔ̰y ja ꞌto dəwje lə-si ang.

²⁰ Kar-sisəy le ɗaa, Njerɔsangə uwa dɔ-si gə ubu, ngaɓa ingaje ne negərə.

²¹ M-ɗa mbede m-ar-si mba sisəy ꞌlalje tar gə tɔgərɔ ang baa, ngaa mba sisəy gərə tar gə tɔgərɔ, ngaɓa tar gə ɗəgərə ce mə tar gə tɔgərɔ gə ang.

²² Na ɓa to nje ɗəgərə wa? Dəw gə nje ma̰y to gə Jeju to Kirisi ang. Dəb-e nee le to nje kəm tar lə Kirisi, ꞌne gə n-ma̰y to gə n-gərə Luba gə Bɔ gə Ngon.

²³ Dəw gə ɗa-ɗa ɓa mbadə Ngon nama mbadə Bɔ dəwje, dəw gə gərə Ngon nama gərə Bɔ dəwje tɔ.

²⁴ Gəl-e gə nee ɓa, tar gə sisəy oje kede dɔngɔr le, may kar uwaje Ngon gə Bɔ dəwje mə-si gə tɔ.

²⁵ Ye ɓa to ne gə ɔji dɔ təbə gə ndɔ gə ndɔ gə n-uwa dɔ gɔl-ɛ n-ar-si.

²⁶ M-ɗa mbede nee m-pa ne tar lə dəwje gə njigi kuru-si muu.

²⁷ Sisəy le ɗaa, Njerɔsangə uwa dɔ-si gə ubu le nam, ɓo dəw a tɔji-si ne ang ngaa; ngaa mba ubu gə n-uwa ne dɔ-si le tɔji neje tɔ̰y, to gə n-to ne tar gə tɔgərɔ ja ɓo tar gə ɗəgərə ang, ɗaa umje sə-a naa gə to gə n-tɔji le.

Kum naa gə Kirisi

²⁸ Ɗaa nganje, ɓisine ɗaa, umje naa gə sə-a, mba kar dɔ ndɔ gə n-a tɔji rɔ-ɛ gə ɗaga ɗaa j-a ɓəəl ang, ngaɓa rɔ kul a kuwa-si ndɔ təl gə lə-a ang.

²⁹ To gə ɓo sisəy ꞌgər-eje gə dəw gə gadə-gadə nam, to gə ɓo dəw ɗa-ɗa ɓa ɗa ne gə gadə-gadə nama may kar ꞌgərəje to gə ꞌne ja n-uji-e.