1 Corinthiendjé 9 - Mbede Lə Luba Kone Gə Sigi

Pɔl mbadə neje ɔji dɔ-ɛ

¹ Dɔ-m to doy ang wa? M-to njeka̰ykula ang wa? M-o Mbayɓe lə-sijee Jeju ang wa? ꞌToje nduji kula lə-m ɗəw gə lə Mbayɓe ang wa?

² Le nje gə kɛm ɓa m-to njeka̰ykula kəm-je gə ang kara m-to njeka̰ykula kəm-sisəy gə; mba sisəy le ꞌtoje bəngə ji-m ɗəw kila mbərə gə lə Mbayɓe.

³ Dəwje gə d-ila tar dɔ-m gə le, oje tar gə m-a pa dɔ rɔ-m gə ɓa nee:

⁴ Ɗəw to ɔji dɔ sijee kar j-usa gə j-ay ang wa?

⁵ Ɗəw to ɔji dɔ sijee kar j-ar ko̰ nan-si gə njetakagə Kirisi kara, dan si ang wa? To gə njeka̰ykulaje gə kɛm ꞌɗa ne, ngaɓa ngan ko̰ Mbayɓe, gə Sepas ꞌɗa be ang wa?

⁶ Ose əji-je to gə, ꞌma sijee gə Barənabas ja gə kar-si baa ɓa ɗəw to ɔji dɔ-si mba kar j-a ɗa kula ang wa?

⁷ Na ja ɓa ɗa kula gə njeɗɔ lal kar d-uga lar ɗɔ lə-a wa? Na ja maa bḭyə̰ ngaɓa usa kand-ɛ ang wa? Na ja uul nekuulje ngaɓa odo rɔ-ɛ gə mba nekuulje ang wa?

⁸ Tar neje gə m-pa nee le, ḭ rɔ dəwje gə wa? Torondu kara pa to gə be tɔ ang wa?

⁹ Mba ꞌɗa mə mbede torondu gə lə Moyiji na: ꞌI a tɔ ta mangə gə aw ɗa kula lo kunda wa gə ang. Luba jɔgə rɔ-ɛ mba mangəje wa?

¹⁰ Ose Luba pa ɔji dɔ sijee ja kara baa wa? Tɔgərɔ, mba sijee ja ɓa ꞌɗa ne mə mbede gə; nje gə ndɔ-ndɔ a ndɔ gə məkunda, ngaɓa nje ɗa kula kunda wa kara, a ɗa gə məkunda mba kinga k-ɛ kəne tɔ.

¹¹ To gə ɓo sijee j-a dubu nemayje gə ɗəw Njil gə mba sisəy ɗaa, to ne gə kṵra̰y mba kar-sijee j-inga dəbə nekingaje lə-sisəy wa?

¹² To gə ɓo nje gə kɛm d-inga ne gə ɔji dɔ-je ji-si gə ɗaa sijee j-a kasə kinga ne gə ɔji dɔ-si ang mba ɗi wa? Ngaa sijee j-a ɗa to gə bənəng ang baa, j-ore ur-si ndəng mba j-a njigi kila kagə no Tar gə May gə lə Kirisi ang.

¹³ May kar-si ꞌgərəje to gə nje gə ꞌɗa kula mə kəy gə lə Luba le, ne gə kəne ja ɓa d-odo ne rɔ-je, ngaɓa nje d-aw d-un nepolo no kɔgə gə kara nepolo nee le ja kar-je to kəne tɔ.

¹⁴ To to gə be ja tɔ ɓa Mbayɓe ja kara un ndu to gə nje kila mbərə Tar gə Mayje le, Tar gə May ja ɓa a kodo-je tɔ.

¹⁵ Ngaa ɔji dɔ ꞌma le ɗaa, neje gə ɔji dɔ-m le, m-ta kara ang nəm, ngaɓa m-ɗa mbede nee mba kar-si ar-mje ne neje le ang nəm tɔ. Mba kar m-uy ja ɓa m-njigi! Ne riɓar lə-m nee le dəw a ta ji-m gə ang.

¹⁶ Kila mbərə Tar gə May le to ne kɔsə gaji rɔ-m ang baa, mba to kula gə ꞌtɔ gɔbə-m gə. Ɓo m-ila mbərə Tar gə May ang nama m-a to kəmandoo.

¹⁷ To gə ɓo to kula gə ꞌma ja m-ɗa gə mə njigi lə-m nama kuga-a a ga̰; ngaa ɓo d-uwa-m gə singa nama to kula gə d-um ji-m gə gə kum.

¹⁸ Ɗi ɓa gə nekuga dɔ ji-m wa? To gə mba kar m-ila mbərə Tar gə May le baa ja lal kar m-ta neje gə ɔji dɔ-m gə Tar gə May pa tar-ɛ le.

¹⁹ Mba dəw kara kara o̰ dɔ-m ang ngaa m-ɗa rɔ-m gə ɓərə lə dəwje tɔ̰y, ɓa gə mba kinga ne nje gə kɔr-je bula al dɔ lo.

²⁰ Ɓə lə Jiibije ɗaa m-ɗa rɔ-m to to gə Jiibi be, mba kinga ne Jiibije, m-godo gəl torondu gə ngaa, ngaa ɓo ɓe lə nje gə d-isi gəl torondu gə nama m-ɗa rɔ-m to to gə dəw gə isi gəl torondu gə be mba kinga ne nje gə d-isi gəl torondu gə;

²¹ ɓə lə nje gə d-aw baa lal torondu nama, m-ɗa to gə m-aw baa lal torondu be, be ja kara ꞌma le m-aw lal torondu lə Luba ang, ngaa m-isi gəl torondu gə lə Kirisi, mba kinga ne nje gə d-aw lal torondu.

²² M-ɗa rɔ-m gə nje tɔgə godo horo nje tɔgə godoje gə mba kinga ne nje tɔgə godoje. M-ɗa rɔ-m to to gə dəwje tɔ̰y mba kinga ɗəw kaji ne nje gə kɛm.

²³ Be ɓa m-ɗa neje tɔ̰y mba Tar gə May ɓa mba kinga ne kar ꞌma kəne tɔ.

²⁴ May kar-si ꞌgərəje to gə nje kuma naa gə ngɔdə ꞌɓaraje le d-a̰y gə ka̰y ja tɔ̰y ngaa dəw kara baa ja inga ne dɔ ji-a. Ɗaa a̰yje gə go ɗəb-e mba kinga ne ne dɔ ji.

²⁵ Dəw gə njeka̰y ngɔdə gə ɗa-ɗa kara sangə rɔ-ɛ dɔ neje gə tɔ̰y, ngaa ꞌjejee nee le ꞌɗa be mba kinga ne dɔ gugu gə a tuji pugudu baa, ngaa kar-sijee le ɗaa to dɔ gugu gə a tuji ang.

²⁶ ꞌMa le ɗaa m-a̰y ngɔdə ja, ngaa m-a̰y baa gə nangə əng ang; m-ɔr ji-m nama m-unda ne m-uwa ɓo m-unda ləl baa ang.

²⁷ M-o̰ dɔ darɔ-m gə singa ya̰, ngaɓa m-uwa darɔ-m gə ɓərə, ɓo be ang nama ꞌma gə m-ila mbərə m-ar nje gə kɛm le, go-e gə ɗaa, d-a kḭ kɔr ꞌma ja gə gugu.