1 Corinthiendjé 8 - Mbede Lə Luba Kone Gə Sigi

Da gə ꞌpolo ne magəje

¹ Ne gə ɔji dɔ da gə ꞌpolo ne magəje le, gərəje to gə tɔ̰y ja negərə lə-si ga̰. Negərə ɗa dəw gə nje kɔsə rɔ-ɛ ngaa njigi ula jingaw mə dəw gə.

² To gə ɓo dəw əji na n-gərə ne kara nama kəm kar n-gərə to gə n-gərə ne ang ɓi.

³ Ngaa to gə ɓo dəw njigi Luba nama Luba gərə nj-ɛ nee le tɔ.

⁴ Be ɓa, ne gə ɔji dɔ ko̰ da gə ꞌpolo ne magəje le ɗaa, j-a gərə to gə magə godo dɔ nangə nee, magə gə ɗangə godo, ɗaa ɓɛl Luba ja gə kar-e ɗəgədə.

⁵ Mba, nekundaje gə dara ose dɔ nangə nee gə dəwje na to magəje le ꞌga̰ ja, tɔgərɔ ja magəje bula nəm ngaɓa mbayɓeje kara ꞌbula tɔ,

⁶ be ja kara kar-sijee le, Luba kara baa ɗəgədə, Bɔ dəwje, gə neje tɔ̰y ḭ rɔ-ɛ gə ngaɓa j-a to njeka-ɛje, ngaɓa Mbayɓe kara baa, Jeju Kirisi gə ne tɔ̰y ɗe ɗəw gə lə-a ngaɓa mbɔr dɔ-ɛ ɓa j-aw ne kəm baa.

⁷ Ngaa dəwje tɔ̰y d-inga negərə gə nee le ang. Mba nje gə kɛm gə pa polo magəje uwa mə-je ja ɓi le, d-usa daje gə nee le gə nepolo, ngaɓa kəji lə-je gə mbɔr-ɛ le mina ne.

⁸ To nekusa ɓa a ɗəm gə sijee gə rɔ Luba gə ang. To gə ɓo j-usa ang kara ne kara lal-si ang nəm, to gə ɓo j-usa kara ne kara gə j-inga j-ila dɔ mar-ɛ gə godo nəm tɔ.

⁹ Be ja kara, oje gə maj-ɛ ɓa, may kar dɔ to doy lə-sisəy təl to jigi tuga lə nje tɔgə godoje ang.

¹⁰ Mba to gə ɓo dəw o-i, ꞌi gə ꞌgərə ne nee le, lo kusa ne kəy polo magə gə le, kəji lə-a, ꞌne gə nje tɔgə godo le a kɔs-ɛ kar n-usa ne daje gə polo ne magəje ang wa?

¹¹ Be ɓa nje tɔgə godo uba tuji gə go negərə lə-i, ngon ko̰-si gə Kirisi uy mba tar lə-a le!

¹² Logə ꞌɗa neɗa gə kṵra̰y gə ngan ko̰-si to gə be ngaɓa ꞌtuji-je ne kəji lə-je gə tɔgə ang le ɗaa, to gə Kirisi ja ɓa ꞌɗa sə-a neɗa gə kṵra̰y.

¹³ Gəl-e gə nee ɓa, to gə ɓo nekusa a təl to jigi tuga gɔl ngon ko̰-m nama, m-a kusa da ang gə dɔbo̰ ja, mba kar m-ɗa ne ngon ko̰-m m-ar-ɛ oso ang.