1 Corinthiendjé 7 - Mbede Lə Luba Kone Gə Sigi

PƆL ILA TAR GƏ NJE GƏ KƆRƐNT ꞌDƏJI-E Ta naa

¹ Ɔji dɔ neje gə ꞌɗaje ne mbede ar-mje le ɗaa, may kar jingaw ɔr rɔ jene ang.

² Ngaa mba kar dəw ḭ oso ne dan kaya gə ang le ɗaa, may kar jingaw gə ɗa-ɗa kara ta jene lə-a ngaɓa jene gə ɗa-ɗa kara ta ngab-ɛje.

³ May kar ngaw ar jene lə-a ne gə ɔji dɔ-ɛ, jene kara ɗəw kara baa, may kar ar ngab-ɛje ne gə ɔji dɔ-ɛ tɔ.

⁴ Jene to njeko̰ dɔ rɔ-ɛ ye ja ang, ngaa to gə ngab-ɛje; ɗəw kara baa ngaw kara to njeko̰ dɔ rɔ-ɛ ye ja ang ngaa to jene lə-a.

⁵ Ɔgəje naa rɔ-si gə yo gə nee ang. Ar-je ndu-si asə naa dɔ kar gə mba dəji ne Luba ja baa ɗaa, ꞌtəlje ingaje naa gugu ɓo ar-je kuru-si əw ang na ꞌSu a kḭ kərə-si, mba a kasəje ko̰je dɔ ɓo lə-si ang.

⁶ M-pa gə mba kar ɗəw to nama ꞌɗaje to gə bənəng, ɓo m-un gə ndu ɓa m-ar-si ang nəm tɔ.

⁷ M-njigi kar dəwje tɔ̰y ja d-aw to gə ꞌma be, ngaa na-na kara Luba ar-ɛ gusu gə ɔji dɔ-ɛ ye ja, gə go mənuji lə-a. Be ɓa dəw gə nee to gə be, dəw gə kən to gə bənəng.

⁸ Nje gə ꞌta naa ang ɓi, gə jene ndubaje le, m-pa na may kar d-aw to gə ꞌma m-aw be.

⁹ Ngaa ɓo d-asə kuwa ta ɓo lə-je ang nama may kar ꞌta jene gə ꞌta ngaw; mba ta naa le may ya̰ unda ɓo lo to gə kar o̰-i gə pər.

¹⁰ Nje gə ꞌta naa ɗaa, m-pa m-ar-je, to ndu Mbayɓe ja ɓo to ndu-m ꞌma ang: May kar jene mbadə ngab-ɛje ang;

¹¹ to gə ɓo jene mbadə ngab-ɛje nama may kar ta ngaw gə ɗangə ang ose may kar n-təl n-um naa gə ngab-ɛje; ngaɓa ngaw kara tɔbə jene lə-a ang tɔ.

¹² Nje gə kɛm ɗaa, ꞌma ja m-pa ɓo Mbayɓe ang: To gə ɓo ngon ko̰-si kara ta jene gə ta kagə Kirisi ang, a ɓo jene le njigi mba kisi sə-a nama may kar n-tɔb-ɛ ang;

¹³ ngaɓa to gə ɓo jene ɓa ta ngaw gə ta kagə ang, a ɓo jingaw nee le njigi mba kisi sə-a nama may kar n-mbadə ngab-ɛje le ang.

¹⁴ Mba ngaw gə ta kagə ang nee le, a təl to njerɔsangə ɗəw gə lə jene, ngaɓa jene gə ta kagə Kirisi ang nee le kara, a təl to njerɔsangə ɗəw gə lə ngab-ɛje tɔ. Ɓo be ang nama d-a to nganje gə mina, be ɓa ngan-si d-a to ne njerɔsangəje tɔ.

¹⁵ Ngaa to gə ɓo dəw gə ta kagə ang le, ɓo njigi kɔr rɔ-ɛ nama ɔr rɔ-ɛ; ngon ko̰-si ose ko̰ nan-si le, ne kara gə tɔ-je naa gə godo. Luba ɓar-sijee mba kar j-isi dan ɗɛgɛgɛ gə.

¹⁶ Mba ꞌi gə jene, ꞌgərə to gə ngab-ije a kḭ kinga kaji ɗəw gə lə-i ang wa? Ose ꞌi ngaw, ꞌgərə to gə jene lə-i a kḭ kinga kaji ɗəw gə lə-i ang wa?

¹⁷ Ne kara baa le, may kar na-na kara nja gə go ɗəw gə Mbayɓe ar-ɛ kar nja kəne, ɓa Luba ɓar-ɛ kəne. Ye ɓa to ndu gə m-un m-ar Mbo̰ naaje lə njetakagəje tɔ̰y.

¹⁸ Ɓo Luba ɓar dəw gə unja bərə nama, may kar aw gə dəw gə unja bərə ja. Ɓo Luba ɓar dəw gə unja bərə ang nama, may kar n-ar d-unja-a bərə ang.

¹⁹ Kunja bərə to ne ang, ngaɓa kunja bərə ang kara to ne ang tɔ; ngaa kila kuji dɔ nduje gə lə Luba gə ɓa to ne.

²⁰ May kar na-na kara aw pa lo kaw lə-a gə aw ɓa Luba ɓar-ɛ ne ja.

²¹ ꞌTo ɓərə ɓa Luba ɓar-i wa? ꞌJɔgə ne rɔ-i ang; ngaa ɓo to ɗəw gə a kinga ne dɔ to doy nama al uru kəne.

²² Be ɓa ɓərə gə Mbayɓe ɓar-ɛ le, Mbayɓe ɔr kula ɓərə gɔs-ɛ gə, ɗəw kara baa gə dəw gə to ɓərə ang ɓa ɓo Luba ɓar-ɛ nama to ɓərə lə Kirisi.

²³ ꞌNdogo-si gə ndogo; ɓo ꞌtəl toje ɓərəje lə dəwje ang.

²⁴ Ngan ko̰-mje, may kar na-na kara nja gə go pa kunda rɔ-ɛ gə unda ɓa Luba ɓar-ɛ ne ja.

Tar lə ngaw baje

²⁵ Tar gə ɔji dɔ ngaw baje le, ꞌma m-inga ndu gə Mbayɓe un ar-m ɔji dɔ-ɛ ang; ngaa gə go ɗəw gə Mbayɓe o ne kəmtondoo lə-m, ɓa turu-m ne gə dəw gə gadə-gadə le ɗaa, kəji lə-m ɓa nee.

²⁶ Oje ne gə m-əji gə ne gə may ɓa nee: Gə go ne jɔgəje gə ɓogəne le ɗaa, may kar na-na kara aw be ja.

²⁷ Ngaa ɓo um naa gə jene nama, may kar ꞌcḭ sə-a ang. Ɓo um naa gə jene ang nama, may kar ꞌsangə jene ang.

²⁸ To gə ɓo ꞌta jene nama to neɗa gə kṵra̰y ang ngaɓa to gə ɓo ngon mandə ta ngaw kara to neɗa gə kṵra̰y ang tɔ; ngaa dəb-eje nee le d-a ko ꞌməsərə ɗəw darɔ gə, ɗaa m-njigi kɔsə dɔ sisəy gə gə ɗangə.

²⁹ Ngan ko̰-mje, oje tar gə m-pa ɓa nee: Dɔ kar guji baa, un kud-e ɓisine ja, nje gə ꞌta jene kara may kar ꞌnja to to gə ꞌta ang be,

³⁰ nje gə ꞌno kara may kar ɗa to to gə ꞌno ang be, nje gə ꞌɗa rɔləl kara may kar ꞌɗa to to gə ꞌɗa rɔləl ang be, nje gə ꞌndogo ne kara may kar ꞌɗa to to gə ne godo ji-je gə be,

³¹ ngaɓa nje kuba mayje gə dɔ nangə nee kara may kar ꞌɗa to to gə d-uba may ang be, mba dɔ nangə gə lo kunda rɔ lə-a d-a nday.

³² Be ɓa m-njigi kar ꞌnoje rɔ-si ang. Dəw gə ta jene ang ɓi le, no rɔ-ɛ mba neje lə Mbayɓe, ngaɓa sangə ɗəw mba ləl ne Mbayɓe tɔ.

³³ Dəw gə ta jene le, may kar no rɔ-ɛ mba neje gə dɔ nangə nee, sangə ɗəw mba ləl ne jene lə-a.

³⁴ Ngaɓa m-e tɔ joo. Ɗəw kara baa, jene gə ngab-ɛje godo ɗəw kara baa gə ngon mandə le, ꞌno rɔ-je mba neje lə Mbayɓe, mba kar darɔ-ɛ gə njil-e to ne gə losang-ɛ; ngaɓa jene gə ta ngaw le, no rɔ-ɛ mba neje gə dɔ nangə nee, sangə neje gə gə mba ləl ne ngab-ɛje tɔ.

³⁵ M-pa tar gə nee le mba may lə-sisəy; m-iya gə kula ɓa no-si gə ang ngaa mba kar ꞌɗaje ne ne gə gə dɔ gɔl-ɛ ngaɓa kar oreje ne kəm-si ndəng dɔ Mbayɓe gə ɓo aje ne lo gə ɗangə ang.

³⁶ To gə ɓo dəw əji to gə ɓo lə-a al dɔ-ɛ, ɓa əji to gə njemɔrə lə-a le ɓal-ɛ asə mbagə, ngaɓa lo gə neje a nja ne go ɗəb-e godo nama, may kar ɗa to gə m-e njigi, ɗaa may kar ꞌɗa neɗa gə kṵra̰y ang, ngaa ꞌta naa.

³⁷ Ngaa dəw gə uwa rɔ-ɛ gədərə, lal kar ɓo lə-a al dɔ-ɛ ngaɓa gə mə njigi lə-a ja, ngaɓa gɔl m-e gə mba ɗɔy njemɔrə lə-a ɗaa, nj-ɛ nee le ɗa ne gə may ja.

³⁸ Be ɓa dəw gə ta njemɔrə lə-a ɗaa, ɗa ne gə may ja, dəw gə t-ɛ ang kara ɗa may ɓəəl tɔ.

³⁹ Jene le, ɓo ngab-ɛje aw kəm baa ɓi nama, kula tɔ-je naa gə ja saar-saar; ngaa to gə ɓo ngab-ɛje uy nama ɗəw to kar n-ta ngaw gə m-e njigi, be ja kara, n-a ta gə go ɗəw gə Mbayɓe njigi ɓa.

⁴⁰ Be ɓa, gə go kəji lə-m ɗaa, to gə ɓo n-isi lo kisi-e gə nama n-a kisi gə rɔləl ya̰. Mba ꞌma ja kara m-əji to gə Njil Luba isi mə-m gə tɔ.