1 Corinthiendjé 6 - Mbede Lə Luba Kone Gə Sigi

¹ Dəw kara horo-si gə, logə ɓo tar to horo ꞌje gə ngon ko̰-e gə nama nje ɗa ne dɔ buguruje ɓa aw səg-e no-je gə, ɓo no njerɔsangəje gə ang wa?

² Njerɔsangəje ja ɓa d-a gangə tar dɔ dəwje gə dɔ nangə nee le, ꞌgərə-je ang wa? Ngaa ɓo sisəy ja a gangəje tar dɔ dəwje gə dɔ nangə nee nama mba ɗi ɓa asəje mba gɔl-je ngan tarje gə njɛ̰-njɛ̰ gə to horo-sisəy gə ang wa?

³ Anjije kara j-a gangə tar dɔ-je gə le, ꞌgərəje ang baa wa? Ngaa ɓədə ɓa tarje gə ɓogəne wa?

⁴ Ngaa tar to horo-si gə ɓogəne nama, dəwje gə Mbo̰ naa lə njetakagəje oje gə ne ang ɓa undaje-je gə nje gangə tarje.

⁵ M-pa m-ar to rɔ kul lə-sisəy. Be ɓa horo-si gə le, dəw gə nje kəm karə kara gə asə gangə tar horo ngan ko̰ naaje gə ja godo wa?

⁶ Ngaa ngan ko̰ naaje ja d-aw səgə naa, ngaɓa no nje gə ꞌta kagə Kirisi ang gə səmə!

⁷ Be ɓa, kar tar to horo-sisəy gə ja le, to ne gə kṵra̰y ɗɔdə ngaa kən. Mba ɗi ja oreje ur-si ndəng dɔ ne gə dɔ buguru gə ꞌɗa gə si ang wa? Mba ɗi ɓa ɓo dəw ɓogo si nama ḭya̰je ar-ɛje ang wa?

⁸ Ngaa to gə sisəy ja cibi ꞌɗaje ne dɔ buguru ngaɓa ꞌɓogo nje gə kɛm, ngaɓa ꞌto ngan ko̰-si ja cibi.

⁹ ꞌGərəje ang baa wa? Nje ɗa ne dɔ buguruje le d-a kuwa ɓeko̰ lə Luba gə nenduba ang. Ərəje rɔ-si dɔ-ɛ gə ang: njekayaje nəm, nje polo magəje nəm, nje ɓogo lo toje nəm, njetəl rɔ-je gə jeneje nəm, jingawje gə njeto gə naaje nəm,

¹⁰ nje ɓogoje nəm, nje gə ɓo neje uwa-je ɓərə gə nəm, mbə kodoje nəm, njetaji kilje ose njekunda bagəraje, ꞌjejee tɔ̰y nee le, d-a kuwa ɓeko̰ lə Luba gə nenduba ndɔ kara ang.

¹¹ Ngaɓa ye ja, to neje gə nje gə kɛm horo-si gə, ꞌɗa kede ja tɔ. Ngaa ꞌtogo-si, ngaa d-unda si gə losang-ɛ, ngaa ꞌturu-si gə dəwje gə gadə-gadə gə ri Mbayɓe Jeju Kirisi ngaɓa gə ɗəw Njil Luba gə lə-sijee nəm tɔ.

¹² Ɗəw to kar m-ɗa neje tɔ̰y ja, ngaa ne tɔ̰y may ang baa; ɗəw to kar m-ɗa ne tɔ̰y ja ngaa ꞌma m-a kḭya̰ ɗəw kar ne kara kara uwa-m ɓərə gə ang.

¹³ Nekusa to mba mə dəw, to to gə mə dəw kara to mba nekusa tɔ; ngaa Luba a tuji-je joo kɛm. Ngaa darɔ dəw to kar kun ɗa ne kaya ang; darɔ to kar Mbayɓe, to to gə Mbayɓe kara to kar darɔ tɔ.

¹⁴ Be ɓa Luba gə nje kar Mbayɓe uy ɓa ndol le, a kar-sijee j-a kuy mba ndol gə singamongə lə-a tɔ.

¹⁵ ꞌGərəje to gə darɔ-sisəy le to bar kəm rɔ Kirisi ang wa? Ɗaa m-a kun bar kəm rɔ Kirisi mba təl ɗ-ɛ gə bar kəm rɔ kaya jene wa? Ndɔ kara ang.

¹⁶ ꞌGərəje ang wa? Dəw gə um naa gə gə kaya jene le ꞌtəl ꞌtoje gə darɔ gə kara. Mba, ꞌpa na: ꞌJejee joo kɛm d-a to darɔ gə kara baa.

¹⁷ Ngaa dəw gə um naa gə gə Mbayɓe nama njil-e kara um sə-a naa gə kara baa tɔ.

¹⁸ A̰yje kaya gə ka̰y. Neɗa gə kṵra̰y gə ɗa-ɗa gə dəw ɗa le, ɗa darɔ-ɛ gə ɗaga nee baa, ngaa dəw gə un rɔ-ɛ ɗa ne kaya nama ɗa kṵra̰y gə darɔ-ɛ ye ja.

¹⁹ ꞌGərəje ne gə nee ang wa? Darɔ-sisəy le to kəy lə Njil Njerɔsangə gə Luba ja ar-ɛ isi mə-si gə; ɗaa darɔ-sisəy le to kar-si ang.

²⁰ Mba ꞌndogo-si gə ne ndogo gə gad-e al dɔ lo. Ɗaa may kar unje darɔ-si ulaje ne rɔnduba dɔ Luba gə.