1 Corinthiendjé 5 - Mbede Lə Luba Kone Gə Sigi

Kɔsə ji dɔ neɗa gə kṵra̰y gə

¹ Tar kaya gə to horo-si gə le, ꞌpa tar-ɛ gə lo tɔ̰y, mba to kaya gə dəwje gə ꞌgərə Luba ang ja kara d-asə ɗa ndɔ kara ang; ꞌpa tar-ɛ to gə dəw kara horo-si gə to gə jene lə bɔ-ɛje.

² Kəm kar ndoo ɓa uwaje, mba kɔr ne dəw gə nje ɗa ne gə to gə be le horo-si gə gugu, ngaa gaji rɔ-si ɓa ɔsəje.

³ Ɔji dɔ-m ꞌma ɗaa darɔ-m godo horo-si gə ja, ngaa njil-im ga̰ gə si naa gə, ɗaa dəw gə nje ɗa ne gə əng le, m-ila tar dɔ-ɛ gə ɗɔdə to to gə m-ga̰ gə si naa gə be.

⁴ Mba, gə ri Mbayɓe Jeju ɗaa, njil-m a kum gə sisəy naa gə kara baa, gə go singamongə lə Mbayɓe lə-sijee Jeju ɗaa,

⁵ dəw gə to gə be le, may kuba-a kḭya̰-a̰ ji ꞌSu gə kar tuji darɔ-ɛ, ɓo ar njil-e inga ne kaji dɔ ndɔ təl gə lə Mbayɓe!

⁶ Kɔsə gaji rɔ lə-sisəy le, kud-e arə ang! Guway kodo njɛ̰ baa ja ꞌmbɔ̰y ne mbə ɗaa, mbə ḭ ne tɔ̰y le ꞌgərə-je ang wa?

⁷ ꞌSangəje rɔ-si dɔ guway kodo gə ləw gə ɓo ꞌtoje ne mbə gə mbɔ̰y to gə sigi, be ɓa guway kodo godo rɔ-si gə; mba Kirisi gə to Pagə lə-sijee le d-un-e gə nepolo.

⁸ J-a ɗa-je nay le gə mbə gə ꞌɗa gə guway kodo gə ləw ang nəm, ɓa guway kodo məndul gə ɗa məyɛr ang nəm, ngaa j-a ɗaje gə mbə gə arə ngadə, gə tar gə tɔgərɔ gə guway kodo godo kəne.

⁹ M-pa mə mbede gə m-ɗa m-ar-si m-pa na uwaje ba-ɛ gə nje gə d-un rɔ-je ꞌɗa ne kaya ang.

¹⁰ M-pa ɔji dɔ dəwje gə d-un rɔ-je gə njekayaje dɔ nangə nee ang nəm, dəwje gə ɓo neje uwa-je ɓərə, ose nje kəm kə̰yje tɔ̰y ang nəm, ose nje polo magəje ang nəm; ɓo be ang nama a kɔr-je rɔ-si dɔ nangə nee gə kɔr ja.

¹¹ Ngaa ɓisine ɗaa, mbede gə m-ɗa m-ar-si nee le, mba kar dəw gə ɗa rɔ-ɛ gə ngon ko̰-si, ɓa un rɔ-ɛ gə njeɗa kaya, nje kəm kə̰y, nje polo magə, njetaji kil, mbə kodo ose njekunda ne bagəra le, uwaje sə-a ba-ɛ ang ngaɓa kar dəw gə to gə bənəng le ne ja kara usaje sə-a ang.

¹² Dəwje gə ta kagə Kirisi ang le, to tar lə-m kar m-gangə tar dɔ-je gə ang, nje gə ta kagə Kirisi le ɓa to tar lə-sisəy kar ꞌngangəje tar dɔ-je gə.

¹³ Dəwje gə ta kagə Kirisi ang le, Luba ɓa a gangə tar dɔ-je gə. Ɔrəje njeməyɛr horo-si gə gə gugu.