1 Corinthiendjé 4 - Mbede Lə Luba Kone Gə Sigi

¹ Be ɓa may kar d-o sijee gə njengom ne lə Kirisi ngaɓa nje ka dɔ neje lə Luba gə to lokiya gə.

² Ne gə ꞌnjigi ko rɔ nje ka dɔ ne gə le ɗaa, kar n-to dəw gə dana gadə.

³ ꞌMa le ɗaa kar-sisəy ɓa ꞌgangəje tar dɔ-m gə ose no ngɔ gangə tar lə dəwje ɓa gangə tar dɔ-m gə kara jɔgə-m ang. ꞌMa ja kara m-gangə tar dɔ darɔ-m gə ang tɔ; mba mə-m ila tar dɔ-m gə ang,

⁴ ngaa ɔji dɔ ꞌye gə nən ɓa d-o-m ne gə dəw gə gadə-gadə ang, nje gangə tar dɔ-m gə to Mbayɓe.

⁵ Gəl-e gə nee ɓa may kar ꞌgangəje tar ne kede ɓa dɔ kar asə ang, kede no ɗe gə lə Mbayɓe, gə a kila dɔ neje gə d-iya dan cil ciməri gə ngaɓa a kila kəjije gə mə dəwje gə. Be ɓa na-na kara Luba a pid-e.

⁶ Ngan ko̰-mje, m-un ndaji neje nee le ɔji dɔ Apolos gə dɔ ꞌma mba tar lə-sisəy. Be ɓa a ndo-je ne ne gə oje rɔ-sijee gə, mba kawje əw gə tar ne gə ꞌɗa mə mbede gə ang, mba kar dəw kara kara horo-si gə uwa dəw gə kara unda ne kar-ɛ tɔsə ne kəm dəw gə kara ang.

⁷ Mba, ɗi ɓa to ne gə unda-i ɓədə wa? Ɗi ja ɓa ꞌi inga gə kinga ang wa? Ngaɓa to gə ɓo inga gə kinga baa ɗaa, mba ɗi ɓa ꞌi unda ne kar-i to to gə ne gə ꞌi inga gə singa-i ja be wa?

⁸ Ne asə sisəy mbagə nam, ꞌtoje njenekingaje nam, sijee j-a godo ja unje kudu ko̰je mbay le! Ngaɓa ɓo o̰je mbay le gə ko̰ ja tɔgərɔ nama, mba kar-sijee kara j-o̰ gə si mbay tɔ.

⁹ Mba m-əji to gə sijee njeka̰ykulaje le, Luba unda-si gə bo̰ dəwje, gə dəwje gə tar yo uwa dɔ-je be, gə nekogo lə dɔ nangə nee, kəm anjije gə ngaɓa kəm dəwje gə.

¹⁰ J-a to mbəje mba Kirisi, ngaa sisəy ɗaa ꞌtoje kəm karəje gə mə Kirisi gə, sijee j-a to nje tɔgə godoje ngaa sisəy ꞌtoje njesingaje. Sisəy ꞌɗɔy-si ngaa sijee ꞌdabə-si dasəra!

¹¹ Saar dɔ kar gə nee ja kara j-isi dan labə gə, kunda tɔl si, j-aw kudu-si dum, ꞌkunda si mbɔgə-mbɔgə, ja to nje kaw taarje;

¹² J-ula rɔ-si ndubu j-a ɗa kula gə ji-si ja; ꞌtaji-si kara j-a tɔr ndu dɔ-je gə, d-ula kəm-si ndoo kara j-uwa gədərə;

¹³ ꞌpa tar lə-si kṵra̰y kara, j-ula jingaw mə-je gə; j-a təl to dɔ yibi kəm dəwje gə dɔ nangə nee, j-a to ya̰ neje tɔ̰y, saar ɓisine.

¹⁴ ꞌM-ɗa mbede gə nee le mba kila ne rɔ kul kəm-si gə ang; ngaa m-ndəji-si to gə ngan-m gə m-njigi-je.

¹⁵ Mba, le njetɔji sisəy neje gə mə Kirisi gə d-ḭ tɔl-tɔl dɔg lo dɔg kara bɔ-sijee-je gə ɗəw lə Kirisi ɗaa ꞌbula ang baa, mba to ꞌma ja m-uji si ɗəw gə lə Kirisi Jeju gə go Tar gə May.

¹⁶ Be ɓa m-ndəji sisəy m-pa na: ꞌNdajije kəm-m.

¹⁷ To gə be ɓa m-ula Timoce ɓə lə-si, ꞌne gə to ngon-m gə m-njig-e ya̰ ngaɓa n-to dəw gə dana gadə ɗəw gə lə Mbayɓe le, n-a kole mə-si dɔ pa nja-m gə ɗəw gə lə Kirisi Jeju, to to gə m-tɔji ne gə lo tɔ̰y, lo Mbo̰ naaje lə njetakagəje.

¹⁸ Nje gə kɛm d-ɔsə gaji rɔ-je to to gə m-a kaw ɓə lə-si ang ja yom.

¹⁹ Ngaa, to gə ɓo Mbayɓe njigi nama m-a kaw ɓə lə-si ɓisine baa, ɗaa nje kɔsə rɔ-jeje nee le, m-a gərə tar pa lə-je ja baa ang, ngaa ne gə d-a kasə ɗa kara nəm.

²⁰ Mba ɓeko̰ lə Luba to tar gə pa ja baa ang, ngaa to gə singa ɗa kula.

²¹ Ɗi ɓa ꞌnjigije wa? ꞌNjigije kar m-aw gə guru ɓa ji-m gə, ose gə njigi gə kəji gə kul yururu wa?