1 Corinthiendjé 3 - Mbede Lə Luba Kone Gə Sigi

Njetakagəje gə tɔgə ɗəw Njil gə ang

¹ Ngan ko̰-mje, ꞌma le ɗaa, m-pa gə si tar to gə dəwje gə Njil isi mə-je gə ang ngaa m-pa gə si tar to to gə dəwje gə darɔ gə, to gə nganje mə tar gə lə Kirisi be.

² Mba ɓa m-ar-si ay-je ɓo m-ar-si nekusa gə kədərə ang, mba asə kar-si ang ɗɔdə, ngaɓa ɓisine ja kara a kase-je ang ja dɔro ɓi,

³ mba darɔ o̰ dɔ-si ɓi. Mba nər mə ngaɓa ko ta naa ang to horo-si gə nəm le se, to neje gə darɔ gə ang wa? Ngaɓa se ꞌnja-je gə go kəji gə darɔ gə ja dɔngɔ ang wa?

⁴ Logə dəw gə kara pa na: ꞌMa m-to nje kar Pɔl! Ngaɓa dəw gə ɗangə na: ꞌMa m-to nje kar Apolos le se to gə kəji lə dəwje ang wa?

⁵ Apolos ɓa to gə ɗi wa? Pɔl ɓa to gə ɗi wa? ꞌTo gə njekulaje gə ɗəw gə lə-je ɓa ꞌta-je ne kagə, gə go ɗəw gə Mbayɓe ar-je ne ne kara kara.

⁶ ꞌMa m-maa, ɗaa Apolos um man kəne, ngaa Luba ɓa ɗa ar-ɛ tɔgə.

⁷ Be ɓa nje maa-e kara to gə ne kara ang nəm, ngaɓa njekum man kəne kara to ne ang nəm, ngaa Luba gə nje ɗa kar tɔgə ja gə kar-e baa.

⁸ Nje maa-e je gə njekum man kəne le d-ore naa kara baa, ngaa na-na kara a kinga kuga lə-a gə go kula lə-a gə ɗa.

⁹ Mba j-a to nje baa kulaje lə Luba. Sisəy ꞌtoje ndɔ lə Luba, ꞌtoje kəy lə Luba.

¹⁰ Gə go mənuji lə Luba gə m-inga le ɗaa, m-ɔsə gɔl kəy le to to gə njegusu kunda kəy gə kəm-e arə be, ngaɓa dəw gə ɗangə ɗe unda kəy dɔ-ɛ gə. Ngaa may kar na-na kara pa kunda gə unda ne le o gə maj-ɛ ɓa.

¹¹ Mba dəw asə kɔsə gɔl kəy gə ɗangə dɔ ꞌye gə kede, gə to Jeju Kirisi le ang.

¹² Be ɓa gɔl kəy nee le, dəw gə unda kəy dɔ-ɛ gə gə maa, gə lar, gə kɔr ərje gə ndɔ̰y, gə kagə, gə mu, gə kabəra, ɗaa kula lə na-na kara a kila rɔ-ɛ gə ɗaga ɓi.

¹³ Mba dɔ ndɔ-ɛ nama kula nee le a to gada, mba d-a ce ne dan pər gə ngaɓa na-na kara d-a gərə ne singa kula lə-a gə d-a na dan pər gə.

¹⁴ To gə ɓo kula gə dəw ɗa le ce kəm pər gə gə maj-ɛ nama, ye ɓa nj-ɛ a kinga kuga.

¹⁵ To gə ɓo pər o̰ kula lə dəw biriri nama n-a lal kuga lə-a, ꞌne ɗaa n-a kinga kaji ngaa a to ɗəw kara baa to to gə dəw gə ɔsə lo ce kəm pər gə be.

¹⁶ ꞌGərəje to gə sisəy ꞌtoje kəy lə Luba, gə Njil Luba isi mə-si gə ang wa?

¹⁷ Dəw gə ɓo tuji kəy lə Luba nama Luba a tuj-e; mba kəy lə Luba to gə losang-ɛ, ɗaa sisəy ja ꞌtoje kəy gə nee le.

¹⁸ May kar dəw ərə rɔ-ɛ ang. To gə ɓo dəw kara horo-si gə o rɔ-ɛ gə nje kəm karə gə dɔ ndɔ gə ɓogəne nama may kar-e təl mbə ɓa mba təl to nje kəm karə ɓi.

¹⁹ Mba kəm karə gə dɔ nangə nee le to ne mbə kəm Luba gə. ꞌƊa mə mbede gə tɔ, na: N-uwa njekəm karəje dɔ gusu gə lə-je

²⁰ Cibi ngaɓa: Mbayɓe gərə ɗəw gə njekəm karəje unja ne kəm tar le, n-gərə to gə to neje gə baa.

²¹ May kar dəw uwa dəw ɔsə ne gaji rɔ-ɛ ang, mba ne tɔ̰y to kar-sisəy,

²² Pɔl, ose Apolos, ose Sepas, ose dɔ nangə nee, ose təbə, ose yo, ose neje gə ɓogəne, ose neje dɔ ndɔ gə bara; tɔ̰y to kar-sisəy;

²³ ngaɓa sisəy ꞌtoje kar Kirisi, ɗaa Kirisi to kar Luba.