1 Corinthiendjé 16 - Mbede Lə Luba Kone Gə Sigi

Tar nembo̰ ngaɓa ɗudu tar

¹ Tar gə ɔji dɔ nembo̰ mba la ne gə njerɔsangəje le, sisəy kara, ꞌɗaje to to gə m-un ne ndu-m m-ar Mbo̰ naaje lə njetakagəje gə Galasi be.

² May kar na-na ja kara horo-sisəy gə, dɔngɔr ndɔ gə mə dɔmasi gə ja, un ne asə dɔ singa mə kəy gə lə-a ila gə lo-e, mba kar ꞌngina ndɔ ɗe lə-m ɓa ꞌmbo̰ ne ang.

³ Logə m-a kaw nama, nje gə a tɔrəje-je mba kar d-aw gə nekarə baa lə-sisəy Jerujalɛm le, m-a ɗa mbede kar d-uwa ji-je gə,

⁴ ngaa ɓo kəm kar ꞌma ja m-aw gə darɔ-m kara d-a kawje sə-m naa gə.

⁵ Kaw lə-m gə m-a kaw ɓə si le, m-a nday gə ɗəw gə Masedowan, mba m-a nday gə ɗəw gə kəne.

⁶ Bayɛ̰ m-a kisi ɓə lə-sisəy ɓəəl, ose nay kul a nday dɔ-m gə ɓə lə-sisəy, mba kar-si a la-je sə-m mba kar m-ce ne lo gə m-a kaw gə kəne.

⁷ M-njigi ko sisəy dɔ ngɔr gə taar baa ang, ngaa to gə ɓo Mbayɓe njigi go-e nama m-unda mə-m mba kisi ɓə lə-si ɓəəl.

⁸ Be ja kara m-a kisi Epɛs saar ndɔ Pa̰təkɔdə;

⁹ mba ta ɗəw ɔr to gə boy ja bəndəng kar m-ɗa kula lə-m kəne ja, ngaa njeba̰a̰je bula tɔ.

¹⁰ To gə ɓo Timoce ce ɓə lə-si nama, ꞌɗaje ar-eje n-isi gə ɓəəl ang, mba n-ɗa kula lə Mbayɓe to to gə ꞌma be tɔ.

¹¹ May kar dəw dab-ɛ dasəra ang! ꞌLaje sə-a ar-eje n-təl gə maj-ɛ n-ɗe n-inga-m, mba m-aw m-ngina-a gə ngan ko̰-mje.

¹² Ye gə ɔji dɔ ngon ko̰-si Apolos le ɗaa, m-ula jingaw m-e gə ya̰ mba kar n-aw gə ngan ko̰-si ɓə lə-sisəy, ngaa m-e njigi mba kaw ɓisine ang; ndɔ gə n-inga ɗəw ɓa n-a kaw ɓi.

¹³ ꞌCibije dɔ rɔ-si gə ang, ar-je njang dɔ takagə gə, uwaje rɔ-si gə jingawje, ar-je gədərə.

¹⁴ May kar ꞌɗaje ne tɔ̰y horo-si gə gə njigi.

¹⁵ Ngan ko̰-mje, m-un ndu m-ar-si ja cibi. ꞌGərəje to gə nje gə mə kəy gə lə Sətepanas ꞌto dɔngɔr njetakagəje gə Akayi, ngaɓa d-un rɔ-je ꞌɗa ne kula d-ar njerɔsangəje.

¹⁶ May kar ulaje dɔ-si no dəwje gə to gə be gə, gə nje gə d-ore gə je naa dɔ kula gə ngaɓa dɔ kula rɔ ndubu gə lə-je.

¹⁷ M-ɗa rɔləl mba ga̰ lə Sətepanas, gə Pɔrətunatus ngaɓa gə Akayikos; ꞌtaje toro sisəy nee,

¹⁸ mba ꞌɗaje d-ar njil-m oso nangə ngaɓa kar-sisəy nəm tɔ. May kar-si ꞌgərəje lo kɔsə gaji dəwje gə to gə be.

¹⁹ Mbo̰ naaje lə njetakagəje gə Aji na m-o-si m-ar-je. Akilas je Pirisika, gə Mbo̰ naa lə njetakagəje gə to mə kəy gə lə-je, na d-o si gə maj-ɛ ɗəw gə lə Mbayɓe.

²⁰ Ngan ko̰ naaje tɔ̰y ja d-o si. May kar-si oje naa gə yo gə nee, ꞌtoje mbi naa pu-pu gə rɔsangə.

²¹ ꞌMa Pɔl, m-ɗa mbede nee gə ji-m m-o ne si.

²² Dəw gə ɓo njigi Mbayɓe ang nama may kar ndɔɔl uwa dɔ-ɛ! Maranata, m-e na Mbayɓe, ꞌɗe.

²³ May kar mənuji lə Mbayɓe Jeju nay gə si!

²⁴ M-njigi-si tɔ̰y ɗəw gə lə Mbayɓe Kirisi Jeju.