1 Corinthiendjé 15 - Mbede Lə Luba Kone Gə Sigi

TAR KUY ƁA NDOL Kuy ɓa ndol lə Jeju

¹ Ngan ko̰-mje, m-ole mə-si dɔ Tar gə May gə m-ila mbər-e m-ar-si le, gə ꞌtaje, gə to gə uwaje ne gədərə

² ngaɓa to gə ɓo ꞌngomje gə lo-e gə m-ila ne mbərə m-ar-si ja mɔgɔgɔ nama, mbɔr dɔ-ɛ ɓa ingaje ne kaji, ɓo be ang nama, takagə lə-si tor-e godo.

³ Ne gə ꞌma m-inga ja, m-ar-si dɔngɔr: Gə go tar mə mbede gə ɗaa Kirisi uy mba neɗaje gə kṵra̰y lə-si;

⁴ ꞌdub-e, ɗaa ndɔ gə njekum gə munda ɗaa n-ndol, to gə mbede pa,

⁵ ngaɓa n-tɔji rɔ-ɛ n-ar Sepas, cibi ɓa nje dɔg gə gir-je gə joo.

⁶ Go-e gə ɗaa, n-tɔji rɔ-ɛ n-ar ngan ko̰ naaje gə kɔr-je nday tɔl-tɔl mi ja d-o-e, nje gə kɛm bula horo-je gə d-aw kəm baa ɓi, ngaa kara karaje d-uy tɔ.

⁷ Go-e gə ɗaa n-tɔji rɔ-ɛ n-ar Jagə, gə njeka̰ykulaje tɔ̰y.

⁸ Go-je gə tɔ̰y ɗaa n-tɔji rɔ-ɛ n-ar ꞌma gə to to gə ngon gə d-ɔr-ɛ gə kɔr be;

⁹ mba ꞌma gə m-to dəw gə njɛ̰ baa horo njeka̰ykulaje gə; m-asə kar ꞌɓar-m njeka̰ykula ang, mba m-ula kəm Mbo̰ naa lə njetakagəje lə Luba ndoo.

¹⁰ Ngaa gə go mənuji lə Luba ɓa m-to ne ne gə m-to ɓogəne, ngaɓa mənuji gə m-inga le to ne gə baa ang, m-ɗa kula m-unda-je tɔ̰y, gə go singa-m ꞌma ang ngaa gə go mənuji gə Luba ɓa nay sə-m.

¹¹ Be ɓa, le to ꞌma ose ꞌjeje kara, tar gə j-ila mbər-e ja kən, ngaɓa ye ja ɓa to gəl takagə lə-sisəy.

¹² Be ɓa, to gə ɓo d-ila mbərə to gə Kirisi uy ɓa ndol horo nje gə d-uy gə ɗaa, nje gə kɛm horo-sisəy gə ꞌpa na ce buwa yo gə lə nje gə d-uy godo to gə ban wa?

¹³ To gə ɓo kuy ɓa ndol godo nama Kirisi kara uy ɓa ndol ang tɔ,

¹⁴ ngaɓa to gə ɓo Kirisi uy ɓa n-ndol ang nama kila mbərə lə-sijee kara to ne gə baa ja, ngaɓa takagə lə-sisəy kara to ne gə baa tɔ.

¹⁵ Cibi j-a to njetar najije lə Luba gə gə mbɔr-ɛ baa, mba j-a gangə tar j-unda ta Luba gə, to gə n-ndol Kirisi, ngaa n-ndol-e ang baa, to gə ɓo tɔgərɔ ja, nje gə d-uy le ꞌndol ang.

¹⁶ Mba to gə ɓo nje gə d-uy ꞌndol ang nama Kirisi kara uy ɓa ndol ang tɔ.

¹⁷ Ngaɓa ɓo Kirisi uy ɓa n-ndol ang nama takagə lə-si kara to ne gə baa tɔ, ꞌna̰yje dan neɗaje gə kṵra̰y gə lə-si ɓi,

¹⁸ ngaɓa nje gə d-uy ɗəw gə lə Kirisi kara d-igi gə kigi ja yom ngaa.

¹⁹ To gə ɓo j-unda mə-si dɔ Kirisi gə mba kaw ne gə təbə dɔ nangə nee baa nama, ja to kəmandoo ya̰ unda dəwje tɔ̰y.

Jeju Kirisi to dɔngɔr dəw gə uy ɓa ndol

²⁰ Ngaa ɓisine ɗaa, Kirisi uy ɓa ndol horo nje gə d-uy gə, n-to dɔngɔr dəw gə ndol horo nje gə d-uy gə.

²¹ Mba, yo ɗe ɗəw gə lə dəw le ɗaa, ɗəw gə lə dəw ja tɔ ɓa nje gə d-uy d-a ndol ne.

²² Ngaɓa to gə tɔ̰y ja d-uy gəl Adam gə le, ɗəw kara baa d-a təl kaw kəm baa tɔ̰y gəl Kirisi gə tɔ,

²³ ngaa na-na kara gə lo kar-ɛ kar-ɛ: Kirisi ja to dɔngɔr-je tɔ̰y, ngaɓa nje kar Kirisije dɔ ndɔ gə təl gə lə-a.

²⁴ Go-e gə, gə a to ɗud-e ɗaa, logə n-a tuji nje dum dɔ loje tɔ̰y, gə njeko̰ dɔ loje tɔ̰y ngaɓa singamongə tɔ̰y ɗaa, n-a təl gə ɓeko̰ kula ji-a ꞌne gə to Luba gə Bɔ dəwje.

²⁵ Mba, kəm kar no ɓe saar kar n-turu njeba̰a̰je lə-a tɔ̰y n-nja dɔ-je gə.

²⁶ Dɔbo̰ njeba̰a̰ gə n-a tuj-e pugudu ja to yo.

²⁷ Mba n-um ne tɔ̰y gəl gɔl-ɛ gə. Neje tɔ̰y d-oso kul no-ɛ gə. Ngaa logə n-pa na neje tɔ̰y d-oso kul no ꞌne gə le, n-pa n-ɔr ne kəm ye gə nje kar neje tɔ̰y d-oso kul no-ɛ gə le.

²⁸ Ngaɓa logə neje d-a koso kul no-ɛ gə ɗɔdə ɗaa ngon gə darɔ-ɛ ja kara a koso kul no nje kar neje tɔ̰y d-oso kul no-ɛ gə nee le, mba kar Luba to ne dəw dɔ neje tɔ̰y.

²⁹ Ngaa ɓo bənəng ang nama, nje gə d-inga batɛm yo le d-a ɗa ban ngaa wa? To gə ꞌpa nena nje d-uy d-a təl ndol ang le, ꞌɗa-je batɛm mba ɗi cibi wa?

³⁰ Ngaɓa sijee, ja cila kəm yo gə dɔ karje tɔ̰y mba ɗi wa?

³¹ Ngan ko̰-mje, gə ndɔ-ndɔ ja m-o yo gə kəm nda̰-nda̰, m-pa tɔgərɔ ja, mba ꞌtoje ne rɔləl lə-m ɗəw gə lə Jeju Kirisi, Mbayɓe lə-sijee.

³² To gə ɓo ɗɔ gə m-ɗɔ gə daje gə mu mə ɓe gə Epɛs le, m-ɗɔ mba kəm dəwje baa ɗaa, ɗi ɓa to may lə-m kəne wa? To gə ɓo nje gə d-uy d-a təl ndol ang nama, J-usaje gə j-ayje, mba bara nama j-a kuyje!

³³ Ərəje rɔ-si ang: Riya gə adə le unda mar-ɛje gə may mə jo gə.

³⁴ ꞌNdolje dɔ rɔ-si gə to gə tɔgərɔ ngaɓa undaje ngangə ɗa neɗa gə kṵra̰y, mba nje gə kɛm ꞌgərə Luba ang, m-pa m-ila ne rɔ kul dɔ-si gə.

Darɔ nje gə d-uy ɓa ꞌndol

³⁵ Ngaa dəw kara a pa na: Nje gə d-uy d-a ndol to gə ban wa? Ngaɓa gə darɔ gə ɗa ɓa d-a təl ɗe ne wa?

³⁶ Mbə dəw! Ne gə ꞌi dubu le, ɓo uy ang baa ja a təl cee wa?

³⁷ Ngaɓa ne gə ꞌdubu le, to darɔ gə dɔ ndɔ gə bara ang, to kandə ne ja baa, bayɛ̰ to kandə waa ose ko ne gə ɗangə kara nəm;

³⁸ ngaɓa Luba ar-ɛ darɔ to gə m-e njigi; cibi ko ne gə ɗa-ɗa kara n-ar-ɛ darɔ gə ɔji dɔ-ɛ ja.

³⁹ Nekundaje tɔ̰y gə d-aw kəm baa le, taal rɔ-je to to gə na-na ang baa; ngaa kar dəwje to dang, kar daje to dang, kar əlje to dang, kar kənjije to dang.

⁴⁰ Ngaɓa darɔ neje gə dara gə darɔ neje gə nangə nee; ngaa ndogo lə neje gə dara to dang, kar neje gə nangə nee to dang tɔ.

⁴¹ Ndogo lə kar to dang, ndogo lə nay to dang tɔ; ndogo lə ndɛ̰ndərɛ̰ndɛ̰je to dang ngaɓa ndɛ̰ndərɛ̰ndɛ̰je nee ja kara ndogo lə ꞌye kara to dang gə ye gə ɗangə.

⁴² Be ɓa, ndol lə nje gə d-uy kara to to gə be ja tɔ. ꞌDubu ne gə a ndum, ngaa a ce gə ne gə a ndum ang.

⁴³ ꞌDubu ne gə to yɛm, ngaa a ndol gə rɔnduba, ꞌdubu ne gə mbɔr-ɛ, ngaa a ndol gə singamongə.

⁴⁴ ꞌDubu darɔ gə to da, ngaa a ndol to darɔ gə ɗəw njil gə. To gə ɓo darɔ gə to da ga̰ nama, darɔ gə ɗəw njil gə ga̰ tɔ.

⁴⁵ Gəl-e gə nee ɓa ꞌɗa ne mə mbede gə na: Dɔngɔr dəw, Adam, təl nekunda gə aw kəm baa. Bo̰ Adam, təl njil gə nje kar təbə.

⁴⁶ Dɔgɔr-ɛ ɓa to ꞌye gə to njil ang, to ꞌye gə to da; ngaɓa ꞌye gə to njil ɗe go-e gə.

⁴⁷ Dɔngɔr dəw gə d-ɔr-ɛ nangə le, to dəw gə nangə nee. Njekum gə joo le ḭ dara.

⁴⁸ ꞌYe gə nangə nee unda rɔ nje gə nangə nee ja tɔ, ngaɓa ꞌye gə dara unda rɔ nje gə dara tɔ.

⁴⁹ Ngaɓa, ɗəw kara baa to gə ja to ndaji ꞌye gə nangə nee le, j-a to ndaji ꞌye gə dara tɔ.

Mbəl rɔ ngaɓa cɛdə ɗɔ gə ɗudu

⁵⁰ Ngan ko̰-mje, tar gə m-pa le, mba darɔ gə məsə le d-a kasə kuwa ɓeko̰ lə Luba gə nenduba ang, ngaɓa ne gə a ndum le, a kuwa nduba ne gə a ndum ang ang.

⁵¹ M-a kila gə ne gə iya rɔ-ɛ kar-si oje: Sijee le, j-a kuy tɔ̰y ang, ngaa tɔ̰y ja d-a mbəl rɔ-si:

⁵² mə ngon kar gə njɛ̰ baa be ja, to gə tuga kəm jib be ɗaa, gə ndu kuul gə gə bo̰. Mba kuul a ɓar, ngaɓa nje d-uy d-a ndol gə darɔ gə ndum ang, ngaɓa sijee le, d-a mbəl rɔ-si.

⁵³ Mba darɔ gə ndum nee le, a kula darɔ gə ndum ang ja ɓa, ngaɓa darɔ nje kuy nee le, a kula ye gə nje kuy ang ja ɓa.

⁵⁴ Logə darɔ gə ndum nee a kula ꞌye nje ndum ang, ngaɓa darɔ nje kuy a kula darɔ gə nje kuy ang ɗaa, tar gə ꞌɗa mə mbede gə le a kaw lo-e gə na: Yo ꞌcɛdə-i ɗɔ ngaa.

⁵⁵ Yo, cɛdə ɗɔ lə-i ga̰ ɗa ngaa wa? Yo, ngab-i to ɗa ngaa wa?

⁵⁶ Ngaw yo le to neɗa gə kṵra̰y; singamongə neɗa gə kṵra̰y to torondu.

⁵⁷ Ngaa oyo ar Luba, gə ar-si j-a cɛdə ɗɔ ɗəw gə lə Mbayɓe lə-sijee Jeju Kirisi!

⁵⁸ Be ɓa, ngan ko̰-mje gə m-njigi-si ya̰, uwaje gədərə, ulaje ngira-si nangə, awje gə kede-kede mə kula gə lə Mbayɓe, mba ꞌgərəje to gə kula lə Mbayɓe gə ꞌɗaje le to ne gə baa ang.