1 Corinthiendjé 14 - Mbede Lə Luba Kone Gə Sigi

Ɗa kula gə neje gə kar Njil

¹ May kar-si oreje kəm-si dɔ njigi gə. Ar-je ɓo neje kar Njil ɓa oso ur-si tɔ, ngaa ye gə kar pa tar gə pajambərəje ja ɓa.

² Mba dəw gə pa tar gə ndo̰ tarje le, n-pa n-ar dəwje ang, ngaa n-pa n-ar Luba, mba dəw o dɔ tar nee le ang, ngaɓa ɗəw gə lə njil ɓa n-pa ne tar neje gə to lokiya gə.

³ Ngaa dəw gə pa tar gə pajambərə le, pa ar ne dəwje singa nəm, n-ula ne jingaw mə-je gə, ngaɓa n-dəji-je ne nəm tɔ.

⁴ Dəw gə nje pa tar gə ndo̰ tarje le, pa ula ne jingaw m-e ye gə ja, ngaa dəw gə pa tar gə pajambərə le, ula ne jingaw mə Mbo̰ naa lə njetakagəje gə.

⁵ M-njigi kar-sisəy tɔ̰y ja ꞌpaje tar gə ndo̰ tarje, ngaa kar-si ꞌpaje tar gə pajambərə ɓa m-njigi ya̰ ja cibi. Dəw gə pa tar gə pajambərə le, to ɓəəl ya̰ unda dəw gə pa ndo̰ tarje, ɓo be ang nama, may kar nje pa tar gə ndo̰ tarje nee le ndaji ɓa, mba kar Mbo̰ naa lə njetakagəje inga ne singa.

⁶ Ngan ko̰-mje, ɓisine, to gə ɓo m-aw ɓe lə-si ɓa, m-pa ndo̰ tarje, m-pa ɔji dɔ kila gəl ne ang nəm, gərə ne ang nəm, tar pa pajambərə ang nəm, netɔji ang nəm le, may lə-a to ɗi wa?

⁷ Ɗəw kara baa to gə nekɛmje gə to bula ose konde, to gə ɓo ɓar dang-dang ang le se d-a ɗa ban ɓa d-a gərə ndu bula ose ndu konde wa?

⁸ To gə ɓo ndu kuul ɓar arə ngadə ang le, na ɓa a gɔl rɔ-ɛ mba ɗɔ wa?

⁹ Ɗəw kara baa to gə sisəy kara, to gə ɓo ꞌpaje ndo̰ tarje gə kəji negərə ang le se, d-a ɗa ban ɓa d-a gərə ne gə ꞌpaje mb-ɛ wa? To tar gə ꞌpaje mə ləl gə baa.

¹⁰ Le bar kəm tarje ꞌbula dɔ nangə nee to gə ban ja kara, kara ja gə ꞌgərə m-e ang le godo.

¹¹ To gə ɓo m-gərə mə bar kəm tar ang nama, m-to mbaa kəm nje p-e gə ngaɓa nje p-e kara to mbaa kəm ꞌma gə tɔ.

¹² Ɗəw kara baa to gə sisəy kara, tar neje gə kar Njil oso ur-si le, ar-je kəji ne gərə lə-si tɔ naa gə gə njil, ngaa mba kula ne jingaw mə mbo̰ naa lə njetakagəje gə ɓa.

¹³ Be ɓa may kar dəw gə nje pa ndo̰ tar le dəji Luba mba kar ar-ɛ n-gərə kɔr gəl-e tɔ ɓa.

¹⁴ Mba to gə ɓo m-dəji Luba gə ndo̰ tarje nama, njil-m to dɔ dəji Luba gə ja, ngaa kəji negərə lə-m aw kadə

¹⁵ Ɗi ɓa m-a ɗa wa? M-a dəji Luba ɗəw Njil gə ja, ngaa m-a dəji gə kəji negərə; m-a kɔsə pa ɗəw Njil gə ja, ngaa m-a kɔsə gə kəji negərə.

¹⁶ Be ɓa to gə ɓo ꞌi ꞌdəji Luba ꞌpidi-e ne mə Njil gə, ngaa dəw gə isi horo nje ko tarje gə baa le, a gərə to gə ban ɓa a kila kəne na oyo wa? Mba n-gərə dɔ tar gə ꞌpa le ang.

¹⁷ Tɔgərɔ, ꞌɗa Luba oyo ar may ya̰ ja, ngaa ula jingaw mə dəw gə ɗangə gə ang.

¹⁸ M-ɗa Luba oyo mba m-pa ndo̰ tarje le m-unda-si tɔ̰y,

¹⁹ ngaa mə Mbo̰ naa lə njetakagəje le, mə-m njigi pa tar ta-m mi baa gə kəji negərə, mba ndəji ne nje gə kɛm may unda ye gə kar m-pa tar ta-m tɔl-tɔl dɔg lo dɔg.

²⁰ Ngan ko̰-mje, may kar-si ꞌtoje nganje ɗəw kunja kəm tar gə ang, ngaa may kar-si ꞌtoje nganje gə na ɗəw ɗa məyɛr gə, ɗaa may kar-si ꞌtɔgəje ɗəw kunja kəm tar gə.

²¹ ꞌƊa mə mbede torondu gə na: Ɗəw gə lə dəwje gə ndo̰ tar lə-je dangə Ngaɓa gə ta dəwje gə to mbaje Ɓa m-a pa ne tar kar dəw mə ɓeje nee le, Ngaɓa le to gə be ja kara d-a ko ang, Mbayɓe pa be.

²² Be ɓa pa ndo̰ tarje le, to netɔji ar njetakagəje ang, ɓo kar njetakagəje nama to ne gə baa. Ngaa ɓo tar lə pajambərə nama, ye ɓa to netɔji lə njetakagəje, ngaa kar njetakagəje ang ɗaa to ne gə baa.

²³ Ne kɔji mar-ɛ to nee: To gə ɓo Mbo̰ naa lə njetakagəje tɔ̰y ja ꞌmbo̰ naa, ɗaa dəwje tɔ̰y ja d-ar ꞌpa ndo̰ tarje ngaɓa njetakagəje ang ose dəwje gə baa ce dɔ-si gə le a pa na ꞌtoje mbəje ang wa?

²⁴ To gə ɓo dəwje tɔ̰y ja d-ar ꞌpa tar gə pajambərə ngaɓa njetakagə ang ose dəw gə baa ja ɗe ce dɔ-je ɗaa tarje gə n-o a mbudu dɔ ɓəngər-e, ngaɓa a kar n-ɔr ne kəm ne gə go tar lə-si tɔ̰y.

²⁵ Neje gə iya rɔ-je dɔ ɓəngər-e gə ꞌkila rɔ-je gə ɗaga. Be ɓa n-ce n-uwa nangə burugə, n-unda ꞌburamba no Luba gə n-polo-e ngaɓa n-pa na: Tɔgərɔ ja Luba ga̰ horo-sisəy gə.

²⁶ Ngan ko̰-mje, ɗi ɓa to ne gə kəm ɗa wa? Logə uwaje dɔ naa nama, na-na kara asə kɔsə pa, dəw kara gə nje tɔji ne, dəw gə nee pa tar ne gə ꞌkila gəl-e d-ar-ɛ, dəw gə kən pa ndo̰ tar, dəw ɗangə to njendaji-e, ngaa may kar neje tɔ̰y nee le ar-si singa tɔ̰y ja ɓa.

²⁷ To gə ɓo dəw gə nje pa ndo̰ tar ga̰ nama, dəwje joo ose munda ꞌpa d-ɔr ne go na-na ɗaa kar dəw gə ɗangə ndaji tɔ ɓa.

²⁸ To gə ɓo njendaji-e godo nama, may kar nje pa ndo̰ tarje nee le isi t-ɛ munduru lo Mbo̰ naa lə njetakagəje, ɗaa n-pa tar gə darɔ-ɛ ja ngaɓa n-pa tar gə Luba tɔ.

²⁹ Ɔji dɔ pa tar gə pajambərəje le ɗaa, may kar dəwje joo ose munda ꞌpa tar nama, nje gə kɛm d-unja kəm-e,

³⁰ ngaa ɓo dəw isi kəne ɓa ꞌkila gəl ne d-ar-ɛ nama, may kar dəw gə dɔngɔr udu t-ɛ ngaa.

³¹ Mba tɔ̰y ja asəje paje tar gə pajambərə, ngaa ꞌpaje kara kara ɓa a kar dəwje tɔ̰y ꞌndo ne ne ngaɓa d-inga ne singa.

³² Njil pajambərəje le ula dɔ-ɛ no pajambərəje gə.

³³ Mba Luba le to Luba gə nje ɗa ne wɔr-wɔr ang ngaa nje gəl ɗɛgɛgɛ. To to gə lo Mbo̰ naaje lə njetakagəje gə njerɔsangəje le,

³⁴ may kar jeneje d-isi ta-je munduru mə Mbo̰ naa lə njetakagəje, mba d-un ɗəw d-ar-je mba kar ꞌpa tar kəne ang; may kar d-oso kul, to to gə torondu pa ne le tɔ.

³⁵ To gə ɓo ꞌnjigi gərə gəl ne kara nama may kar ꞌdəji ngaw-jeje ja mə kəy gə; mba kar jene pa tar mə Mbo̰ naa lə njetakagəje le to nerɔkul.

³⁶ Se tar lə Luba le ḭ ɓə lə-sisəy wa? Ose ɓə lə-sisəy ja gə kar-si baa ɓa tar lə Luba ce kəne wa?

³⁷ Dəw gə to gə ɓoo rɔ-ɛ gə pajambərə ose gə dəw njil ɔr kəm-e nama may kar gərə gə maj-ɛ tar gə m-ɗa mə mbede gə nee le gə ndu Mbayɓe.

³⁸ Ngaa ɓo dəw gə gərə bənəng ang nama tɔji to gə nj-ɛ kara ꞌgər-e ang tɔ.

³⁹ Be ɓa ngan ko̰-mje, may kar pa tar gə pajambərə oso ur-si ja ngaa ɔgəje ɗəw pa.

⁴⁰ Ngaa may kar ꞌɗa neje tɔ̰y gə lo-e ngaɓa gə bar-ɛ yaw-yaw.