1 Corinthiendjé 13 - Mbede Lə Luba Kone Gə Sigi

Njigi

¹ To gə ɓo m-gərə pa ndo̰ tar lə dəwje ngaɓa lə anjije ja ɓa, to gə ɓo njigi godo mə-m gə nama, m-to to gə ngaw lar gə ɓar be ose m-to to gə kɔr nekɛmje gə ɓar be.

² Ngaɓa to gə ɓo m-pa tar gə pajambərə, m-gərə gəl neje tɔ̰y gə to lokiya gə ngaɓa gərə ne tɔ̰y, to gə ɓo m-ta kagə gə mə-m tɔ̰y, ar asə kar m-ngɛsə ne dɔ ərje ɓa, to gə ɓo njigi godo mə-m gə nama m-to ne gə baa.

³ Ngaɓa to gə ɓo m-kay nemayje lə-m tɔ̰y, ngaɓa m-uwa darɔ-m mba kar-je ꞌɗo gə pər ɓa, to gə ɓo njigi godo mə-m gə nama, m-ɗa ne kara ang.

⁴ Njigi ila m-e dɔ mar-ɛ gə, njigi ndangə ang, njigi nər mə ang, njigi ɔsə gaji rɔ-ɛ ang, njigi unda kar-ɛ ang,

⁵ n-ɗa ne gə kṵra̰y ang, njigi sangə may lə-a ja baa ang, n-ɗa wungu ang, n-uwa ba̰a̰ ang;

⁶ n-ɗa rɔləl dɔ neɗa gə dɔ buguru gə ang, ngaa n-ɗa rɔləl dɔ tar gə tɔgərɔ gə;

⁷ n-ḭya̰ go ne tɔ̰y, n-ta kagə ne tɔ̰y, n-unda m-e dɔ ne gə tɔ̰y, n-uwa gədərə dan ne gə tɔ̰y.

⁸ Njigi to saar-saar gə no. Be ɓa tarje gə pajambərə pa, a kunda nangə, ndo̰ tarje a kunda nangə, gərə ne a kunda nangə.

⁹ Mba ja gərə neje tɔ̰y ang baa ɗaa mbərə lə Luba gə j-ila le kara j-ila gə ga̰-e baa tɔ;

¹⁰ ngaa logə ne gə may pɛdə a ɗe ɗaa, ne gə ga̰-e baa le a kunda nangə mburugu.

¹¹ Logə m-nay ngon ɓi le, m-pa tar to to gə ngon, m-əji tar to to gə ngon, m-unja kəm tar to to gə ngon nəm; ngaa logə m-tɔgə ɗaa m-ɔsə neɗa nganje gə ngərəng.

¹² Ɓogəne j-o lo gə tatara ɗaa j-o lo arə ngadə ang ngaa j-a ko gə kəm-si nda̰-nda̰ ja ɓi. Ɓogəne m-gərə tɔ̰y ang ngaa m-a gərə tɔ̰y to gə ꞌgərə-m ne be ja ɓi.

¹³ Be ɓa ɓisine neje gə munda nee le ga̰: Takagə, kunda mə, njigi, ngaa ne gə to ɓəəl ya̰ ja to njigi.