1 Corinthiendjé 12 - Mbede Lə Luba Kone Gə Sigi

Tar lə gusuje gə ɗəw njil gə

¹ Ngan ko̰-mje, ꞌye gə ɔji dɔ neje gə kar njil le ɗaa, m-njigi kar isije kəne dɔ mbə gə ang.

² ꞌGərəje to gə logə ꞌtoje ne dəwje gə gərə Luba ang le, ꞌndɔr-si baa gə kəne əng dɔ-si gə ɓe lə magəje gə ꞌpa tar ang.

³ Gəl-e gə nee ɓa m-pa m-ar-si dəw gə Njil lə Luba nay sə-a a kasə pa na: Kugu uwa Jeju, a pa be ang, ngaɓa dəw gə Njil Njerɔsangə nay sə-a ja ɓa a pa na: Jeju to Mbayɓe.

⁴ Tɔgərɔ ja gusuje gə ɗəw Njil gə dang-dang, ngaa Njil kara ɗəgədə;

⁵ kulaje dang-dang, ngaa Mbayɓe kara ɗəgədə;

⁶ Ji ɗa kulaje to dang-dang ja, ngaa Luba gə kara ɗəgədə ja ar ji ɗa ne tɔ̰y gə lo dang-dang.

⁷ Be ɓa na-na kara Njil ɗa kula m-e gə mba may lə-si tɔ̰y.

⁸ Njil ar dəw gə kara tar kəm karə; ar dəw gə kən gusutar gərə ne, gə go Njil gə kara baa nee le ja;

⁹ ar dəw gə ɗangə kar takagə, Njil gə kara baa nee le ja, ar dəw gə kən, gusu gə kar kaji dəwje, ɗəw gə lə Njil gə kara baa ɗəgədə nee le ja;

¹⁰ ar dəw gə ɗangə singa ɗa nemisije; ar dəw gə ɗangə ɓi, kar pa tar gə pajambərə, ar dəw gə ɗangə ɗəw kɔr kəm njilje; ar dəw gə ɗangə pa ndo̰ tarje dang-dang; ar dəw gə ɗangə, kar ndaji ndo̰ tarje.

¹¹ Ngaa Njil gə njekara baa nee le ja ɗa neje nee le tɔ̰y, ar na-na kara to gə m-e ye njigi.

¹² Ɗəw kara baa, to gə darɔ kara baa ja ngaa bar kəm-eje bula, ngaɓa to gə bar kəm rɔje tɔ̰y, ꞌbula ja ngaa ꞌto darɔ gə kara baa le ɗaa, kar Kirisi kara to to gə be ja tɔ.

¹³ Mba mə Njil gə kara ɗəgədə nee ja sijee tɔ̰y gə ja to darɔ gə kara baa le, ꞌɗa-si batɛm tɔ̰y kəne, Jiibije, gə nje gə to Jiibije ang, gə ɓərəje, gə nje dɔ-je to doy, ngaɓa Njil gə kara nee le ja tɔl kunda lə-si tɔ̰y.

¹⁴ Be ɓa darɔ le bar kəm-e kara baa ang, ngaa ꞌbula gə ꞌbula.

¹⁵ To gə ɓo gɔl pa na: Mba ꞌma m-to ji ang ɗaa m-to nje kar darɔ ang, ɗaa ye gə nee ja n-a to ne nje kar darɔ ang yom wa?

¹⁶ Ngaɓa to gə ɓo mbi pa na: Mba m-to kəm ang, ɗaa m-to nje kar darɔ ang, ɗaa ye gə nee ja n-a to ne nje kar darɔ ang yom wa?

¹⁷ To gə ɓo darɔ to kəm ja tɔ̰y ɗaa, lo gə ɗa ɓa dəw a ko ne tar wa? To gə ɓo darɔ to mbi ja tɔ̰y ngaa, dəw a ta ba̰y gə ɗi wa?

¹⁸ Ngaa Luba unda bar kəm rɔ dang-dang darɔ gə to gə m-e njigi.

¹⁹ To gə ɓo bar kəm rɔje tɔ̰y ꞌto bar kəm rɔ ja kara baa le, darɔ a ga̰ wa?

²⁰ Ɓisine ɗaa bar kəm rɔje bula ngaa darɔ kara baa ja.

²¹ Se kəm asə pa kar ji na: Ndoo-i to-m ang wa? Se dɔ a pa kar gɔl na: Ndoo-i to-m ang nəm wa?

²² Ngaa, ꞌye gə kən ja baa ang, bar kəm rɔje gə unda rɔ-je ang ja kara may lə-je ga̰,

²³ ngaɓa nje gə j-oje kula ɗa-je gə sɔrɔgə darɔ gə ang ɓa, j-a ɗɔy-je ya̰. Be ɓa bar kəm rɔ-sijee gə j-oje gə lo rɔ kul ɓa, j-a tɔsə-je kəm-si dɔ-je baw-baw,

²⁴ ngaa nje gə to rɔ kul ang nama ja ɗɔy-je ang. Ngaa Luba unda darɔ gə go ɗəw kar bar kəm rɔ gə to ne ang kara ꞌɗɔy-ɛ,

²⁵ mba kar kay naa godo darɔ gə ngaa kar bar kəm rɔje tɔ̰y ja ꞌtɔsə kəm-je dɔ naa gə gə yo gə nee.

²⁶ Ngaɓa to gə ɓo bar kəm rɔ kara o ko̰ ne nama bar kəm rɔje tɔ̰y ja d-o sə-a ko̰ ne tɔ; to gə ɓo ꞌɗɔy bar kəm rɔ kara nama bar kəm rɔje tɔ̰y ja ꞌɗa sə-a rɔləl.

²⁷ Sisəy le ꞌtoje darɔ Kirisi, ngaɓa ꞌtoje bar kəm-eje, na-na kara horo-si gə to bar kəm-e.

²⁸ Be ɓa mə Mbo̰ naa lə njetakagəje le, Luba unda njeka̰ykulaje dɔngɔr, njekum gə joo lə-a to pajambərəje, njekum gə munda lə-a to njenetɔjije, go-e gə ɗaa gusu ɗa nemisije, cibi gusu kaji dəwje, kar la gə dəwje, kar kɔr no dəwje, kar pa ndo̰ tarje dang-dang.

²⁹ Dəwje tɔ̰y ꞌto njeka̰ykulaje wa? Dəwje tɔ̰y ꞌto pajambərəje wa? Dəwje tɔ̰y ꞌto njenetɔjije wa? Dəwje tɔ̰y ꞌɗa nemisije wa?

³⁰ Dəwje tɔ̰y d-inga gusu kaji dəwje wa? Dəwje tɔ̰y ꞌpa ndo̰ tarje dang-dang wa? Dəwje tɔ̰y ꞌndaji tar wa?

³¹ May kar-si ꞌsangəje gusuje gə ɗəw Njil gə gə may to ɓəəl. Ngaɓa m-a tɔji-si ɗəw gə may unda mar-ɛje.