1 Corinthiendjé 11 - Mbede Lə Luba Kone Gə Sigi

¹ ꞌNdajije kəm-m to to gə ꞌma ja kara m-ndaji kəm Kirisi be.

Tar lə jene lo mbo̰ naaje gə

² M-pidi-si mba mə-sisəy ole dɔ-m gə taar-taar, ngaɓa ji neɗaje gə m-tɔji-si kara ꞌngom-je gə lo-e gə m-tɔji-si ne ja mɔgɔgɔ.

³ Be ja kara ne gə m-njigi kar-si ꞌgərəje ɓa nee: Jingaw gə ɗa-ɗa kara dəw dɔ-ɛ to Kirisi; jingaw to dəw dɔ jene lə-a; ngaɓa dəw dɔ Kirisi to Luba.

⁴ Jingaw gə ɗa-ɗa ɓa ɓo tɔ dɔ-ɛ gə ne ɓa dəji ne Luba ose pa ne tar gə pajambərə nama ila rɔ kul dɔ dəw dɔ-ɛ gə.

⁵ Ngaa jene gə ɗa-ɗa ɓa ɓo tɔ dɔ-ɛ ang ja baa dəji ne Luba ose pa ne tar gə pajambərə nama ila rɔ kul dɔ ngab-ɛje gə, to to gə n-gisa dɔ-ɛ gə gisa be.

⁶ Mba, to gə ɓo jene tɔ dɔ-ɛ ang nama may kar unja dɔ-ɛ tɔ. Ngaa ɓo, kar jene unja dɔ-ɛ ose gisa dɔ-ɛ to rɔ kul nama, may kar n-tɔ dɔ-ɛ.

⁷ Dəw gə jingaw a tɔ dɔ-ɛ ang mba n-to ndaji ngaɓa rɔnduba lə Luba, ngaa jene ɗaa to rɔnduba lə ngab-ɛje tɔ.

⁸ Mba, d-ɔr jingaw rɔ jene gə lə-a ang, ngaa jene ɓa d-ɔr-ɛ rɔ ngab-ɛje gə;

⁹ ngaɓa ꞌɗa jingaw mba jene ang, ngaa jene ɓa ꞌɗ-ɛ mba jingaw.

¹⁰ Gəl-e gə nee ɓa mba anjije ɗaa, jene a tɔ dɔ-ɛ mba tɔji ne to gə dəw dɔ-ɛ ga̰.

¹¹ Be ɓa, no Mbayɓe gə le, kar horo jene ti gə ngab-ɛje ang nəm, horo jingaw kara a ti gə jene lə-a ang nəm tɔ.

¹² Mba ɗəw kara baa to gə d-ɔr ne jene rɔ ngab-ɛje gə le ɗaa, ɗəw kara baa ja tɔ jingaw kara jene ɓa uji-e, ngaɓa ne tɔ̰y ḭ rɔ Luba gə.

¹³ Sisəy ja unjaje kəm tar gə nee le ar-je si j-o: To dɔ gɔl-ɛ kar jene dəji Luba lal tɔ dɔ-ɛ wa?

¹⁴ Gə go ɗəw gə nekundaje to ne ja kara tɔji-si to gə kar jingaw ḭya̰ bḭ dɔ-ɛ ar-ɛ ngal ya̰ le to nerɔkul,

¹⁵ ngaa kar bḭ dɔ jene uba le to gə riɓar lə-a. Mba d-ar-ɛ bḭ dɔ mba kar to gə ne dole dɔ-ɛ.

¹⁶ Ngaa to gə ɓo dəw njigi ma̰y nama, to gə ji kula lə-sijee ang nəm, ngaɓa kar Mbo̰ naaje lə njetakagəje lə Luba ang nəm.

Muru lə Mbayɓe

¹⁷ Ndu gə m-un nee le, to pidi ɓa M-pidi-si ang: Logə ꞌmbo̰je naa nama, ꞌmbo̰je naa mba ɗa ne gə may ang, ngaa mba ɗaje ne ne gə kṵra̰y dɔ mar-ɛ gə.

¹⁸ Ngaɓa dɔngɔr-ɛ ja, m-o tar-ɛ na logə ꞌmbo̰je naa lo Mbo̰ naa lə njetakagəje nama kay naa to horo-si gə, ɗaa m-ta kag-e tɔ̰y ang baa.

¹⁹ Mba kəm kar kay naa to horo-si gə ja tɔ ɓa, d-a gərə ne nje gə d-uwa gədərə ta nena gə.

²⁰ Be ɓa, logə uwaje dɔ naa ɗaa, uwaje mba ko̰ muru lə Mbayɓe ang;

²¹ Mba logə kar kusa ne asə ɗaa, na-na kara ndəbə mba ko̰ muru la ye ja ɗaa, ɗa ar dəw gə nee isi m-e ɓo, ɗaa dəw gə kən kodo ɗ-ɛ.

²² Mə kəy lə-sisəy godo gə mba kar-si usaje gə ayje kəne wa? Ose ꞌdabəje Mbo̰ naa lə njetakagəje lə Luba dasəra, ngaɓa nje gə ne lə-je godo ɗaa ilaje ne rɔ kul kəm-je gə wa? M-a pa na ɗi ɓa kar-si wa? M-a pidi si wa? Ye gə nee ɗaa M-pidi-si ne ang.

²³ Mba ꞌma le, ne gə m-tɔji-si le m-inga ji Mbayɓe gə: Mbayɓe Jeju le, mə cil gə d-un dɔ-ɛ kəne ja, un mbə;

²⁴ ɗaa n-ar oyo Luba, n-uwa n-cɛdə dana ngaɓa n-pa na: ꞌYe gə nee le to darɔ-m gə m-un m-ar-sisəy; ꞌɗaje ne gə nee le oleje ne mə-si dɔ-m gə.

²⁵ Ɗəw kara baa, go nekusa gə ɗaa, n-un nekay ngaɓa n-pa na: Nekay gə nee le to kone gə sigi ɗəw məsə-m gə; may kar-si ꞌɗaje, dɔ karje tɔ̰y gə a kayje nama, ayje oleje ne mə-si dɔ-m gə.

²⁶ Mba kusa ja usaje mbə gə nee ngaɓa kay ja ayje nekay gə nee le taar ja nama, ilaje mbərə kuy lə Mbayɓe saar mba kar təl ɗe ne.

²⁷ Gəl-e gə nee ɓa, dəw gə a kusa mbə ngaɓa a kay nekay lə Mbayɓe gə go ɗəb-e ang nama, tar a kuwa dɔ-ɛ ɔji dɔ darɔ Mbayɓe gə məs-e.

²⁸ May kar na-na kara tən m-e ye ja so-so o ɓa usa mbə gə ay nekay nee ɓi.

²⁹ Mba dəw gə usa ngaɓa ay, lal kɔr ne kəm darɔ Mbayɓe nama usa gə ay ila ne tar dɔ darɔ-ɛ ye gə ja.

³⁰ Gəl-e gə nee ɓa njerɔko̰je ꞌbula ne horo-si gə, gə nje gə dəbə rɔ-je uy ngaɓa dəwje ꞌbula d-asə mbagə d-uy ne.

³¹ To gə ɓo sijee ja tən mə-si so-so nama d-a gangə tar dɔ-si gə ang ngaa.

³² Ngaa Mbayɓe siri-si gə ɗəw gangə tarje lə-a, mba kar tar uwa dɔ-si naa gə kara baa gə dəwje gə dɔ nangə nee ang.

³³ Be ɓa, ngan ko̰-mje, logə ꞌmbo̰je naa mba ko̰je muru lə Mbayɓe nama, may kar-si ꞌnginaje naa yo gə nee.

³⁴ To gə ɓo ɓo ɔr dəw nama, may kar-ɛ usa ne kəy lə-a, mba kar logə uwaje dɔ naa ɗaa kar tar uwa dɔ-si ang. Ɔji dɔ tarje gə kɛm gə ꞌdəjije le ɗaa, logə m-a kaw ɓa m-a gɔl ɓi.