1 Corinthiendjé 10 - Mbede Lə Luba Kone Gə Sigi

Ne kɔji mar-ɛ lə Ijirayɛlje ndag lo gə

¹ Ngan ko̰-mje, ne gə m-njigi kar-si ꞌgərəje ɓa nee: Ka-sijee le nja tɔ̰y gəl kil gə lə nji ngaɓa ꞌnday mə babo gə,

² ꞌjejee tɔ̰y d-inga batɛm ɗəw gə lə Moyiji, mə kil gə lə nji ngaɓa dan babo gə,

³ ꞌjejee tɔ̰y d-usa nekusa gə kara baa ɗəw njil gə,

⁴ ngaɓa d-ay man gə kara baa ɗəw njil gə, mba d-ay man gə ɗəw njil gə ce mə kɔr ər gə gə nja ndole go-je, ngaɓa kɔr ər nee le to Kirisi.

⁵ Ngaa nje gə kɛm bula horo-je gə, pa nja-je ta kəm Luba ang, mba d-oso d-uy ndag lo gə.

⁶ Be ɓa neje gə nee le to nekɔji mar-ɛ mba sijee, mba kar j-ar ɓo neje gə kṵra̰y o̰ dɔ sijee to to gə d-o̰ ne dɔ ꞌjejee be ang.

⁷ ꞌTəlje nje polo magəje to to gə nje gə kɛm horo-ꞌjeje gə ang, gə go tar gə ꞌɗa mə mbede gə na: Dəw mə ɓeje d-isi nangə mba kusa gə kay, cibi d-uba nangə d-ḭ tar ꞌndam

⁸ J-unje rɔ-si j-a ɗaje ne kaya to to gə nje gə kɛm horo-je gə kede d-un rɔ-je ꞌɗa ne ɓa dəwje tɔl-tɔl dɔg lo dɔg joo gə gir-je gə tɔl-tɔl dɔg lo munda d-uy ndɔ kara baa be.

⁹ Ja naje mə Kirisi to to gə nje gə kɛm horo-je gə ꞌna-e ne ɓa lije tɔ̰-je tɔl-je mburugu-mburugu be ang.

¹⁰ ꞌYṵrṵje ang, to gə nje gə kɛm horo-je gə ꞌyṵrṵ ɓa anji gə to yo bo ɗe tɔl-je.

¹¹ Neje gə əng le ꞌɗe gə nekɔji mar-ɛ ngaɓa ꞌɗa mə mbede gə mba ndəji ne sijee gə j-isi dɔ ɗudu ndɔ gə.

¹² Be ɓa, may kar dəw gə əji to gə n-ar taar nama o gə maj-ɛ mba a ce koso.

¹³ Nekərəje gə ce dɔ-si gə le to neje gə asə singa dəw ja; mba Luba gə gadə-gadə le a kḭya̰ ɗəw kar nekərə gə al dɔ singa-sisəy ce dɔ-si gə ang baa, ngaa logə nekərə ce nama n-a gɔl ɗəw gə kar ce ne t-ɛ gə, mba kar-sisəy uwaje ne gədərə.

Tar lə magəje

¹⁴ To gə be ɓa, sisəy gə m-njigi-si ya̰, a̰yje polo magəje gə ka̰y.

¹⁵ M-pa gə si tar to gə dəwje gə njekəm karəje; sisəy ja kara ꞌtənje mə tar gə m-pa le oje.

¹⁶ Ngo nekay kar ndu tɔr gə ja tɔr ndu si kəne le, to gə kum naa gə gə məsə Kirisi ang wa? Mbə gə j-a cɛdə le, to gə kum naa gə gə darɔ Kirisi ang wa?

¹⁷ Mba mbə kara baa ɗəgədə, ɗaa sijee gə j-a bula le, j-a to darɔ gə kara baa ɗəgədə; mba mbə gə kara baa ja j-a kay naa tɔ̰y.

¹⁸ Oje Ijirayɛlje gə ɗəw darɔ gə le: Nje gə d-usa da gə d-un gə nepolo le, d-um naa gə gə no kɔgə ang wa?

¹⁹ M-pa na ɗi wa? M-a pa na da gə ꞌpolo ne magəje le to ɓəəl ya̰ wa? Ose m-a pa to gə magə to ne gə to ɓəəl wa?

²⁰ Ngaa ne gə d-un gə nepolo le, d-un gə nepolo d-ar njilje gə kṵra̰y ɓo d-un d-ar Luba ang; be ɓa m-njigi kar-si um-je naa gə gə njilje gə kṵra̰y ang.

²¹ Sisəy asəje kay-je nekay lə Mbayɓe ngaɓa kar njilje gə kṵra̰y nəm ang; asəje mba kisi ta ka nekusa gə lə Mbayɓe ngaɓa ta ka nekusa gə lə njilje gə kṵra̰y ang.

²² Ja njigi kɔsəje kudu nər mə lə Mbayɓe wa? J-uba singa j-unda-a wa?

²³ D-un ɗəw kar ꞌɗa ne tɔ̰y ja, ngaa ne tɔ̰y to ne gə may ang baa; d-un ɗəw kar ꞌɗa ne tɔ̰y ja, ngaa ne tɔ̰y ar dəw singa ang baa.

²⁴ May kar dəw sangə may lə-a ye ja baa ang, ngaa kar dəw gə ɗangə tɔ.

²⁵ Usaje ne tɔ̰y gə d-unda nadə ne ndogo gə le, ɓo ꞌdəjije gəl-e ang na kəji a jɔgə si;

²⁶ Mba nangə to kar Mbayɓe, gə neje tɔ̰y gə to kəne.

²⁷ To gə ɓo dəw gə ta kagə Kirisi ang ɓar-si a ɓo ꞌnjigi kawje kəne nama, usaje ne tɔ̰y gə d-a kunda no-si gə, lal dəji tar kəne na kəji a jɔgə si.

²⁸ Ngaa to gə ɓo dəw pa na: Ne gə nee le to ne gə d-un gə nepolo, nama usaje ang mba dəw gə nje pa kar-si ɗɔdə nee le, ngaɓa mba a jɔgə kəji.

²⁹ M-pa nee, ɔji dɔ kəji lə-sisəy ang, ngaa kar dəw gə ɗangə. Mba ɗi ɓa dɔ to doy lə-m ꞌma ja, kəji lə dəw gə ɗangə ɓa a gangə tar kəne wa?

³⁰ To gə ɓo m-ɗa Luba oyo ɓa m-usa kar ꞌma ɗaa, mba ɗi ɓa d-a pa sə-m mba ne gə m-ɗa ne Luba oyo wa?

³¹ Be ɓa, le usaje ne ne, le ayje ne ne, ngaɓa le ɗi-ɗi ɓa ꞌɗaje kara, ꞌɗaje ne tɔ̰y mba rɔnduba lə Luba.

³² May kar ꞌtoje jigi tuga gɔl mba Jiibije ang nəm, mba dəwje gə ꞌgərə Luba ang ang nəm, mba Mbo̰ naa lə njetakagəje lə Luba ang nəm,

³³ to to gə ꞌma kara, m-ɗa ga mba may kəm dəwje gə ɔji dɔ neje tɔ̰y le, m-sangə ne may lə-m ꞌma ja baa ang, ngaa mba may lə nje gə bula, mba kar d-inga ne kaji.