1 Corinthiendjé 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Pɔl gə ꞌɓar-m gə go mə njigi lə Luba kar m-to njeka̰ykula lə Kirisi Jeju, gə ngon ko̰-si Sosətɛn.

² J-a ɗa mbede nee j-ar Mbo̰ naa lə njetakagəje lə Luba gə to Kɔrɛnt, nje gə d-unda-je gə losang-ɛ gəl Kirisi Jeju gə, mba kar-je ꞌto njerɔsangəje gə go ɓar gə ꞌɓar-je, naa gə kara baa gə sijee tɔ̰y, gə lo tɔ̰y gə ꞌɓar ri Mbayɓe Jeju Kirisi gə to Mbayɓe lə-sijee gə lə-ꞌjejee tɔ.

³ May kar mənuji gə ɗɛgɛgɛ lə Bɔ-sijee Luba je gə Mbayɓe Jeju Kirisi nay gə si.

⁴ M-ɗa Luba lə-m oyo taar-taar ɔji dɔ-si mba mənuji lə-a gə ingaje ɗəw lə Kirisi Jeju;

⁵ mba ɗəw gə lə-a ja d-unda ne si dan may gə ɔji dɔ ne tɔ̰y, ɔji dɔ tar tɔ̰y ngaɓa gə negərə tɔ̰y nəm,

⁶ mba tar naji lə Kirisi gə ɓar mii mə-si gə.

⁷ Be ɓa ne kara gə ɔji dɔ mənuji lal-si ang, aw nginaje ne ndɔ gə Mbayɓe lə-si Jeju Kirisi a kila ne rɔ-ɛ gə ɗaga.

⁸ ꞌNe ja n-a kar-si singa saar ce ne ɗud-e gə mba kar tar uwa ne dɔ-si ang dɔ ndɔ gə lə Mbayɓe lə-sijee Jeju Kirisi.

⁹ Luba gə ɓar-sisəy um-si naa gə gə ngon-e Jeju Kirisi Mbayɓe lə-sijee le, to Luba gə gadə-gadə.

Tḭ naa oso mə Mbo̰ naa gə lə Njetakagəje gə Kɔrɛnt

¹⁰ Ngan ko̰-mje, m-ula jingaw mə-si gə gə ri Mbayɓe lə-si Jeju Kirisi, mba kar ndu-si asə naa dɔ tar gə, may kar kay naa godo horo-si gə, ar-je kəji lə-si to kara baa ngaɓa njil-si kara baa nəm tɔ.

¹¹ Mba ngan ko̰-mje, nje gə kəy lə Kolohe ꞌɗe ꞌpa ngadə ja d-ar-m na tɔsə tar to horo-si gə.

¹² M-o tar-ɛ to gə na-na ja horo-si gə nama pa na: ꞌMa m-to nje kar Pɔl, ꞌma ɗaa m-to nje kar Apolos, ꞌma ɗaa m-to kar Sepas, ꞌma ɗaa m-to kar Kirisi!

¹³ Ngaa se Kirisi le kay rɔ-ɛ dana wa? Se Pɔl ɓa ꞌɓər-e kagə dəsə gə mba tar lə-si ose, gə ri Pɔl ɓa ꞌɗa ne si batɛm wa?

¹⁴ ꞌM-ɗa Luba oyo mba dəw kara baa be horo-si gə ja kara m-ɗ-e batɛm ang, ɓɛl Kirisəpus je gə Gayus.

¹⁵ Be ɓa dəw a kasə pa na ingaje batɛm gə ri-m ang.

¹⁶ Tɔgərɔ ja, m-ɗa nje gə kəy lə Sətepanas batɛm tɔ; ngaa kɛs-ɛje ɗaa se m-ɗa dəw gə ɗangə batɛm ɓi kara m-gərə ang ngaa.

Jeju Kirisi, singamongə gə Kəmkarə lə Luba

¹⁷ Mba Kirisi ula-m mba kar m-ɗa batɛm ang ngaa mba kar m-ila mbərə Tar gə May; mba kar m-pa tar kəm karə ang na kagə dəsə lə Kirisi a to ne gə baa.

¹⁸ Tar gə ɔji kagə dəsə le, to tar mbə baa kəm nje gə d-inga tuji gə, ngaa kəm sijee gə j-inga kaji ɗaa to gə singamongə lə Luba.

¹⁹ Mba ꞌɗa mbede gə na: M-a tɔji kəm karə lə njekəm karəje pugudu, Ngaɓa m-a tɔji negərə lə njenegərəje pugudu.

²⁰ Nje kəm karə le aw ɗa wa? Njekɔr gəl torondu lə Jiibije le aw ɗa wa? Njekunja kəm tar gə dɔ nangə nee le aw ɗa wa? Se kəm karə gə dɔ nangə gə nee le Luba təl-e mbə ang wa?

²¹ Mba dəwje gə dɔ nangə nee gə kəm karə lə-je ꞌgərə ne Luba gə kəm karə lə-a ang ɗaa, gə go mə njigi Luba ja aji ne nje gə ꞌta kagə ɗəw kila mbərə tar kagə dəsə gə d-o gə tar mbə baa le ja.

²² Mba Jiibije dəji netɔjije, Gərɛgəje ɗaa sangə kəm karə.

²³ Ngaa sijee le, Kirisi gə ꞌɓər-e kagə dəsə gə ɓa j-ila mbər-e, ye ja to gəl koso lə Jiibije ngaɓa dəwje gə ꞌto Jiibije ang gə d-o gə tar mbə.

²⁴ Be ja kara, nje gə ꞌɓar-je, Jiibije ang nəm, gə dəwje gə ꞌgərə Luba ang nəm le d-o Kirisi gə singamongə lə Luba ngaɓa gə kəm karə lə Luba tɔ.

²⁵ Mba ne mbə lə Luba to kəm karə unda kar dəwje, ngaɓa tɔgə godo lə Luba le uba singa unda singa dəwje tɔ.

²⁶ Ngan ko̰-mje, oje ɗəw gə Luba ɓar-si ne: Ɗəw darɔ gə le, njekəm karəje ꞌbula horo-si gə ang, njesingamongəje ꞌbula horo-si gə ang nəm, ꞌmay kujije kara ꞌbula horo-si ang nəm tɔ.

²⁷ Ngaa Luba mbərə ne gə to ne mbə dɔ nangə nee mba kila ne rɔ kul kəm njekəm karəje gə, ngaɓa Luba mbərə neje gə mbɔr-ɛ dɔ nangə nee mba kila ne rɔ kul kəm njesingaje gə tɔ.

²⁸ Luba mbərə neje gə to gə neje gə baa dɔ nangə nee, neje gə ꞌdabə dasəra, ne gə godo mba tɔji ne ye gə d-o gə ne gə tɔgərɔ,

²⁹ be ɓa mba kar dəw ɔsə ne rɔ-ɛ no Luba gə ang.

³⁰ Ngaa to gə ꞌne ja ɓa n-um ne sisəy ne naa gə gə Kirisi Jeju, gə to kəm karə lə-sijee gə ḭ rɔ Luba gə, ngaɓa Kirisi təl-si gə dəwje gə gadə-gadə, unda-si gə losang-ɛ ngaɓa ɔr ne tar neɗa gə kṵra̰y dɔ-si gə.

³¹ Be ɓa to to gə ꞌɗa ne mə mbede gə na: May kar dəw gə ɔsə rɔ-ɛ nama, ɔsə rɔ-ɛ ɗəw gə lə Mbayɓe.