Lùcas 2 - Laoidhean o na Sgriobtaran Naomha 1987

LAOIDH 37 Lùc. 2.8-15

¹ Air bhith do bhuachaillean le chèil a' faireadh treud san oidhch, Thaisbeanadh aingeal dhaibh o nèamh, 's am magh lìon e le soills.

² Bu mhòr an oillt, ach thuirt e riutha, na gabhaibh geilt no sgàth, Oir sgeul ro ait tha agam dhuibh, is do gach linn gu bràth.

³ 'N‑diugh rugadh dhuibh am baile 'n Rìgh, an Slànaighear, seadh Crìosd, Feuch, cluinnibh uamsa comharra, le 'm mothaich sibh gur fìor:

⁴ An naoidhean nèamhaidh gheibh sibh 'n sin follais do rosgan dhaoin, 'S e paisgt an trusgan an‑uasal. 's na laigh am prasaich fhaoin.

⁵ Labhair an seraph seo, 's air ball bha 'm magh de dh'ainglean làn, A' seinn gu binn do Dhia na sìth, 's b' e seo bu bhrìgh don dàn,

⁶ “Gach glòr do Dhia sna nèamhan shuas, sìth bhuan air thalamh ta; Nochd Dia dheagh‑thoil don chinne‑daoin 's cha traogh am feasd a ghràdh.”

LAOIDH 38 Luc. 2.25-33

⁷ Do Shimeon an duine naomh dh'innseadh le Spiorad Dhia, Gu faiceadh e roimh uair a bhàis, an Slàn'ghear, Crìosd an Triath.

⁸ An gealladh sòlasach seo dh'fheith an naomh, o latha gu latha; Is cha do mhealladh e na dhùil, choileanadh chùis na tràth.

⁹ Nuair thugadh Ìosa rèir an lagh a‑staigh don teampall naomh. Do Shimeon dh'fhoillsicheadh cò e, le Spiorad nèimh gu saor.

¹⁰ Na ghàirdean aosda ghlac an naomh an naoidhean, 's thug e cliù Do Dhia, 's e seinn le aoibhneas àrd, 's le gàirdeachas na ghnùis.

¹¹ “Nis leig dod òglach triall an sìth chum sìorraidheachd mar gheall; On chunnaic mi do shlàint, a Thriath mo thriall na bitheadh mall.

¹² Na làmhan seo, a ghlac mo Rìgh, na glacadh nì na dhèidh; 'S na sùilean seo a chunnaic Crìosd, na faiceadh nì fon ghrèin.

¹³ “Tha 'n t‑slàinte gheall thu dhuinn o shean 's a cho‑gheall thu faraon. A' dearbhadh dhuinn gur fìor do ghràdh gu bràth don chinne‑daoin.

¹⁴ Seo Grian an àigh le 'm fògrar duibhr a' Gheintilich gun iùl, Is anns an cuir do theaghlach taght, clann Israeil, an dùil.”