Yohane 15 - Chipangano Chabwangu

Yesu empesha ine-ine

¹ “Nebo ndi mpesha ine-ine. Bata ebalimi.

² Umusambo onse uutakotwalapo ifitwalo bakoutema nokuufumyako, nangulya uukotwala bakouwamya ukwebati ukatwale ifitwalo ifinji.

³ Mwebo muli abawamikwa kale muli nga mashiwi nsosele kuli mwe.

⁴ Ikalilileni muli nebo, nandibo muli mwebo. Ukubati nimfilya umusambo tekuti utwalepo ifitwalo apawenka nga taulipo kuchiti ichikulu, namwebo tekuti mutwalepo ifitwalo nga tamukoyikalapo muli ne.

⁵ “Nine mpesha, mwebo muli misambo. Uyo uukoyikala muli nebo, nandibo muli ye, eukotwala ifitwalo ifinji pakuti mwebo tamungachitapo akantu nangu kamo ukwambula ine.

⁶ Kati umuntu takoyikalililapo muli nebo, akoposwa kunse kubati musambo uwaputulwa, elo akuuma. Imisambo iili mfilya abantu balayilonganya pamo nokuyiposa mumulilo elo ilapya.

⁷ Nga mukoyikalilila muli nebo, namashiwi anji ayikala muli mwebo, fumbeni chonse incho mukofwaya, elo chikoyisa kupelwa kuli mwe.

⁸ Bata bakochinshikwa muli nchi ichakuti mutwale ifitwalo ifinji, elo mukoyisa kuba abakusambila banji.

⁹ Nalimutemwesha ukubati nimfilya Bata bantemwa. Ikalilileni mwebo mukutemwa kwanji.

¹⁰ Nga mukolama amafunde anji, mwakwikala mukutemwa kwanji, kubati nimulya nalamine amafunde aku Bata nokwikala mukutemwa kwabo.

¹¹ “Mfi fintu nasosa namwe ukuti ukusekelela kwanji kube muli mwebo, nokuti ukusekelela kwenu kupitilile.

¹² Ifunde lyanji nindi ilyakwebati mutemwane ukubati nimulya namutemwa.

¹³ Takupo muntu uukwete ukutemwa ukukulu ukuchila nku ukwakuti umuntu engafwila ifibusa fyakwe.

¹⁴ Mwebo muli fibusa fyanji nga mukokonka amafunde anji.

¹⁵ Lelo nshikomwita mwebo ababomfi, pakuti umubomfi teshibapo ifyo shikulu wakwe akochita. Nomba nkomwita mwebo ifibusa fyanji, pakuti fyonse ifyo naumfwa kuli Bata nalimubushishe.

¹⁶ Mwebo tamwansalilepo iyowo, kuntu ninebo uwamusalile. Nalimusalile ukuti mutwale ifitwalo, ifitwalo ifikalilila. Elo chonse icho mwakulomba kuli Bata mwishina lyanji mwakupelwa.

¹⁷ Ifunde lyanji lyakuti, mutemwane.

Abamuchalo bakumupata

¹⁸ “Nga abamuchalo bamupata, mwibukishe ukuti babalile ukupata nebo ulo batalamupata.

¹⁹ Nga mwali abamuchalo, ichalo nga chalimutemenwe ukubati abene. Nomba nebo nalimusalile ukufuma muchalo, tamuli nomba abamuli nchino chalo. Echo ichalo nomba chikomupatila.

²⁰ Ibukileni ifyo nasosele namwe ukuti, ‘Umusha tali umukulu ukuchila shikulu wakwe!’ Nga balinchushishe nebo, epo bakumuchusha namwe kumo. Nga basungile ukusambisha kwanji, elo bakusunga nokusambisha kwenu.

²¹ Nomba mfi fyonse bakumuchitila mwebo pamulandu weshina lyanji, pakuti tabakomwishiba uyo uwantumine.

²² Nga chakuti nshayishile nokusosa nabo nga tabali nako ukubifya. Nomba tabakwetepo ichakusosa pakubifya kwabo.

²³ Umuntu onse uwapata nebo, apata na Bata.

²⁴ Nga nshachitilepo milimo iyishachitwapo kale nomuntu, nga tabakwata ukubifya. Nangu baliibona imilimo yanji, kuntu balimpata nebo pamo na Bata.

²⁵ Mfi fikochitika ukubati nimulya amashiwi alembelwe mumafunde akoti, ‘Balimpatile ne uutakwetepo nomulandu!’

²⁶ “Kafwa akwisa, e Mupashi Wabuta, uwo nakutuma kuli mwe ukufuma kuli Bata. Ewakuba mwanamboni wanji.

²⁷ Namwe mwakuba bakamboni banji pakuti mwaba nandibo ukufuma pakutatika.