Yemusi 1 - Chipangano Chabwangu

¹ Nine Yemusi, umupyungi waku Lesa na Bashikulu Yesu Klistu. Namuposha umutende bonse mwe bantu baku Lesa abapalangana mpanga yonse.

Ichichetekelo nomulangwe

² Mwe bawesu mulokusekelela ulo mukoyeshekwa kumachushi ayapusene-pusene.

³ Pakuba mwalishiba ukwebati ulo ichichetekelo chenu chayeshekwa mulashipilako.

⁴ Lekeni ukushipa nku kutwalilile ukwambula ukufilwa ukwebati mube abakaele nokufikapo, abatakokabilapo akantu akali konse.

⁵ Kati umo pali mwe takwetepo umulangwe, alombe kuli Lesa uupela namaboko abili ukwambula ukuyilishanya.

⁶ Nomba uyo uukolomba, alombe ukwambula ukukayikapo. Pakuti onse ukayika ali kubati matamba amuli bemba ngalya aakoyima nokusesemunwa nomwela.

⁷ Umuntu uwamfi elangulukapo ukuti angapokelela ichintu ichili chonse ukufuma kuli Bashikulu iyowo.

⁸ Pakuba alikwete imitima ibili. Tayimakanapo ndi munshila shakwe.

Ifyabuchushi nobusambashi

⁹ Wesu umuchushi ayilumbe ulo Lesa amusumbula.

¹⁰ Naye umusambashi ayilumbe ulo Lesa amuchefya pakuba, akuloba ukubati liluba ilyamumpanga.

¹¹ Pakuti akasuba kalatula. Elo kalocha isani. Amaluba ayayiko aloma nokulukutila panshi. Ubune bwamaluba nga bulashila. Munshila imo yenka, umusambashi akushila ulo akopyunga umulimo wakwe.

Ukweshekwa

¹² Alishuka umuntu uushipikisha panshita ulo eshekwa, pakuti ulo achimfya akupokelela ingala yabumi iyo Lesa alayile ukupela kuli bo abamutemwa.

¹³ Nga muntu ayeshekwa, esosa ati, “Nayeshekwa na Lesa.” Pantu Lesa teshekwapo nobubi iyowo. Elo teshapo umuntu nangu umo.

¹⁴ Nomba umuntu onse eshekwa ulo ubufwayo bwabuntunse bwakwe bwakula nokumwikata.

¹⁵ Ulo ubufwayo bwabuntunse bwaba kubati bulimitile, bulafyala ifibi. Elo ifibi nga fyakula, filafyala imfwa.

¹⁶ Mwibepwapo mwe bawesu abatemwekwa.

¹⁷ Ichabupe chonse ichiweme nechakufikapo chifuma kumulu kuli Lesa, katala wamfilya ifisanika kumulu. Ye taalukapo, elo ukusanika kwakwe takwaalukapo kubati chimfule.

¹⁸ Pamulandu uwakutemwa kwakwe umwine, alitupela ubumi ukupitila mumashiwi akwe ayachine ukwebati pali fyonse ifyo alengele, fwebo tube kubati abakwamba.

Ukumfwa nokuchita

¹⁹ Mwe bawesu abatemwekwa, ishibeni nchi: umuntu onse angufyanye ukumfwa, kuntu eyangufyanyapo ukusosa nangula ukukalipa.

²⁰ Pantu umuntu uwakalipa tekuti achitepo ifili fyonse ifiweme ifyo Lesa afwaya.

²¹ Kanshi lekeni inshila shonse ishabusali nobubi ubwayisula muli mwebo. Pokeleleni mukuyichefya Amashiwi aku Lesa ayabyalilwe mumitima yenu ayo angamupulusha.

²² Mwiyibepapo mwenka mukumfwa Amashiwi aku Lesa bwaka, kuntu chitenipo ifyo akososa.

²³ Elo umuntu uukomfwa bwaka Amashiwi ukwambula ukuchitapo ifyo akososa, ali kubati muntu uulolesha bwaka muchilola.

²⁴ Nomba ulo afumapo pachilola, bwangu-bwangu alalabukila ifyo aboneka.

²⁵ Amafunde aku Lesa alilungama, elo alapela ubumi. Umuntu uulolekesha mumafunde nga nokushipikisha muli wo, tomfwa bwaka, nokulabukila, kuntu aleyakonka, Lesa akumushukisha muli fyonse akochita.

²⁶ Nga chakuti kuli umuntu uukoyilanguluka ukuti alalomba Lesa, elo tasungapo akanwa kakwe, ukulomba kwakwe kwabwaka nakambi akoyibepapo.

²⁷ Ukulomba ukwachine nokwafikapo pamenso aku Lesa Bata ninku ukwakuti umuntu asunge banshiwa nabamukamfwilwa pakuchula kwabo, elo nokuyisunga ukutina ukwebati ububi bwapanonshi bwimukoweshapo.