Ukufisulula 22 - Chipangano Chabwangu

¹ Nakambi umungelo alinangile inika yamenshi ayapela ubumi ayali kubeka kubati ligalashi. Inika nji yalikufuma kumupando waku Lesa nowa Mwana wambelele.

² Walikuchilinganya pakati kamusebo uwamumusumba. Pambali shibili ishanika palipo ichiti chimo chipela ubumi. Ichiti nchi chitwala ifitwalo umuku umo pamweshi umo-umo pamwaka umo. Amabula akuposhako abantu bamitundu yonse.

³ Mumusumba ngu tamwakasangwemo akantu akali konse akatipwa na Lesa. Umupando uwaku Lesa nowa Mwana wambelele fyakuba muli ngu musumba. Elo abapyungi bakwe bakumupyungila.

⁴ Bakubona ichinso chakwe neshina lyakwe lyakuba ilyalembwa pampumi shabo.

⁵ Takwakabepo nakambi ubushiku iyowo. Abantu tabakafwayepo ukusanika kwanyali nangu ukwakasuba pakuti Bashikulu Lesa umwine akuba ukusanika kwabo. Elo nabo bakutungulula umuyayaya.

Ukwisa kwaku Yesu

⁶ Nomba umungelo asosele kuli nebo ati, “Amashiwi nga yachine nakambi alingile ukuyachetekela. Bashikulu Lesa abapela Umupashi wabo kubasoseshi, balitumine umungelo wabo ukuti balange abapyungi babo ifilingile ukuchitika bwangu-bwangu.”

⁷ Yesu akososa ati, “Boneni, nkoyisa bwangu! Alishuka uyo ulama amashiwi ayabusoseshi ayasangwa muli ndi buku!”

⁸ Ninebo Yohane, ne waumfwile nokubona ifintu mfi. Ulo nafyumfwile nokufibona, nalifukeme pamakasa amungelo uyo uwanangile mfi ukuti mulombe.

⁹ Nomba asosele kuli nebo ati, “Wichitapo mfi iyowo! Nandibo ndimupyungi bwaka kubati niwe. Ndi umo uwaba wenu abasoseshi, nakambi ndi umo waku bo abomfwa amashiwi ayabasoseshi ayali mwibuku ndi. Ulokulambila Lesa.”

¹⁰ Elo asosele kuli nebo ati, “Wifisapo amashiwi ayakososa ifyakuntanshi ayali muli ndi buku pakuti inshita yafiko ili mupepi.

¹¹ Uyo uuchita ifibi atwalilile ukufichita, nangulya uuchita ifyabusali atwalilile ukufichita. Uyo uwalungamikwa alokuchita ifyalungama nangulya uwabuta alokubuta.”

¹² Yesu asosele ati, “Boneni, nakwisa bwangu! Nakwisa nechilambu chandi mukupela umuntu umo-umo ukulingana nemilimo yakwe.

¹³ Ninebo ukutatika nakupelako, wakwamba nowakupelako.”

¹⁴ Abashuka nimbalya abasamfya imikanjo yabo ukuti basuminishiwe ukulyako ifitwalo fyaku chiti ichipela ubumi nokwinjila mumilyango yamusumba.

¹⁵ Nomba panse yamusumba paba imbwa, indoshi, ababulale-lale, ifipondo, abalomba tungosa wakubasa nambalya abatemwa nokuchita ifyabufi.

¹⁶ “Ninebo Yesu uutumine umungelo wanji ukuti abilishe ifintu mfi kuli mwe ifyakuchilonganino. Nebo ndiwamukowa wakwa Davide. Nine intandala isanika yakumatanda-cha.”

¹⁷ Umupashi Wabuta na nabwinga bakoti, “Iseni!” Na uyo onse uukoumfwa amashiwi nga asose ati, “Iseni!” Uli onse uukwete ichilaka ese apokelele bwaka amenshi aapela ubumi.

Amashiwi akupelako

¹⁸ Nebo ne Yohane, nkochenjeshako umuntu onse uumfwako amashiwi ayabusoseshi ayali muli ndi buku ukuti, umuntu onse uulundako pamashiwi nga, Lesa na Ye akumulundilako ifinkunka ifyalembwa mwibuku ndi.

¹⁹ Na uyo uufumyako kumashiwi ayamwibuku ilyabusoseshi ndi, Lesa akufumyako ichabupe chakwe ichafitwalo ichamuti uupela ubumi, ichamumusumba uwabuta, ifyalembwa mwibuku ndi.

²⁰ Uyo uukopela bukamboni kumashiwi nga akoti, “Ina, nkoyisa bwangu.” Ameni. Iseni Bashikulu Yesu!

²¹ Ubwanshi bwaku Bashikulu Yesu bube namwebo bonse. Ameni.