Ukufisulula 19 - Chipangano Chabwangu

¹ Panuma yakumfi nalyumfwile kubati mashiwi ayebumba lyabantu ilikulu kumulu ayalikusosa ati, “Tondayisheni Lesa! Ukupuluka, ubuleme nefiso fyakwe!

² Ukupingula kwakwe konse kwalilungama, elo kwachine. Apingula umwanakashi wabulale-lale uwalumbikwa uyo uwabifishe ichalo kubuchenchemeshi bwakwe. Lesa amukanda pamulandu wakwipaya abatumwa baku Lesa.”

³ Nakambi babilikishe neshiwi ilikulu ati, “Tondayisheni Lesa! Ichushi chamushi ngu chakukwela kumulu umuyayaya.”

⁴ Bachilolo mbalya abali amakumi abili nabane, pamo nefyabumi fine mfilya, balifukeme panshi nokulomba Lesa uyo wayikele pamupando wabufumu. Elo basosele ati, “Ameni! Tondayisheni Lesa!”

Amatebeto yachupo aya Mwana wambelele

⁵ Elo kumupando wabufumu kwalifumine amashiwi ayali kusosa ati, “Tondayisheni Lesa wesu, mwe bapyungi bakwe nabantu bonse abamulomba abayiche nabakulu pamo.”

⁶ Nakambi nalyumfwile kubati mashiwi ayebumba lyabantu nakambi ukubati chipoma chamenshi ayenji nangu ukubuluma kwakubyata. Lyalisosele ati, “Tondayisheni Lesa! Pakuti Bashikulu Lesa wesu Wafiso fyonse ni Mfumu!

⁷ Natusekelele nokutemwa, nakambi tumutondayishe pamulandu wabuleme bwakwe. Elo inshita yabwinga bwa Mwana wambelele ilifikile, elo na nabwinga aliyipekenye kale.

⁸ Nabwinga ye asuminishiwa ukufwala insalu ishibeka ishibutile.” (Ifyakufwala ifyabuta mfi milimo iiweme iyabantu baku Lesa.)

⁹ Penkapo umungelo alisosele kuli nebo ati, “Lemba amashiwi nga: Balishuka bantu abetwa kukusefya kuchupo cha Mwana wambelele.” Nakambi umungelo ati, “Nga mashiwi yaku Lesa ayachine.”

¹⁰ Epo nalifukeme pamakasa akwe ukwebati mulombe, kuntu ye asosele kuli nebo ati, “Wichitapo mfi iyowo! Nandibo ndimupyungi bwaka kubati niwe. Nandibo ndi uwabachetekela kubati niwe nabanobe abo abakochitila Yesu bukamboni. Ulokulomba Lesa!” Pakuti ukuchitila Yesu bukamboni ebusoseshi ubwine-bwine.

Ifyawakwela pali kabalwe uwabuta

¹¹ Panuma yaku mfi nalibwene kumulu kwayisuka. Nalibwene nakabalwe uwabuta. Uwakwelele pali ye bamwita ukuti Uwachetekelwa nakambi Uwachine. Eupingula nokulwa mubulungami.

¹² Amenso yakwe yali kubati mafyanga amulilo. Pamutwi alifwite ingala ishinji. Alilembelwepo ishina ilyo tapalipo umuntu nangu umo uwalishiba, kuntu umwine enka.

¹³ Alifwite mwinjila uwayinjishiwe mumulopa. Ishina lyakwe ni, “Ishiwi lyaku Lesa.”

¹⁴ Abashilikali abakumulu abamukonkele balifwite insalu ishabeka ishabuta tuutu. Balikwelele pali bakabalwe ababuta.

¹⁵ Mukanwa kakwe mwalifumine umwele uwatwa uwakuchimfishako ifyalo fyonse. Ifyalo mfi akufitungulula nenkonto yachela. Nakambi ewakunyantawila namuchikamino chawaini uwabukali bwaku Lesa Uwafiso fyonse.

¹⁶ Pamwinjila wakwe napachibelo chakwe palilembelwepo ishiwi ilikoti, “Imfumu iyashamfumu, Bashikulu wabashikulu bonse.”

¹⁷ Elo nalibwene umungelo umo alimakene pakasuba. Alibilikishe neshiwi ilikulu kufyoni fyonse ifipalala mulwelele ati, “Iseni mukolonganye pamo pamulandu wamutebeto uukulu uwaku Lesa.

¹⁸ Iseni mulye inama yamfumu, yabakulu bankondo nabashilikali, iyabakabalwe nabakwelapo, inama yabantu bonse, ababwanalale nabasha, yabachindami nabantu bwaka!”

¹⁹ Panuma nabwene ichiswango nchilya, imfumu shapanonshi nabashilikali babo. Balilongene ukuti balwishanye nangulya uwakwelele palikabalwe nabashilikali bakwe.

²⁰ Ichiswango nchilya chalikakilwe pamo nabasoseshi ababufi abachitile ifintu ifikulu pamenso akwe. (Ukupitila mufintu ifyafiso ifikulu mfi achitile, alibepele abantu abo abakwete ichishibilo ichachiswango nambalya abalombele ichimpasho ichachiswango.) Ichiswango nabasoseshi ababufi baliposelwe abomi muli bemba wamulilo uwalikwaka nasilubale.

²¹ Abashilikali babo balipayiwe nomwele ngulya uwafumine mukanwa kangulya uwakwelele pali kabalwe. Elo ifyoni fyalilile ifitumbi fyabantu nokwikuta.