Ukufisulula 1 - Chipangano Chabwangu

¹ Muli ndi buku emwalembwa ifintu Lesa afisulwile kuli Yesu Klistu. Lesa amufisulwile mfi ukuti alange abapyungi bakwe ifyakwisa kuchitika bwangu-bwangu. Klistu naye alishibishe umupyungi wakwe Yohane mfi fintu ulo atumine umungelo wakwe kuli ye.

² Echo Yohane alifisulula fyonse ifintu ifyo abwene. Nga emashiwi akwe aakochitila bukamboni kumashiwi aku Lesa nakuli fyonse ifyo Yesu Klistu asosele.

³ Alishuka umuntu upenda ibuku ndi. Balishuka nabo abomfwa amashiwi amuli ndi buku nokulama ifyalembwamo. Pakuti inshita iyo fyakuchitikilamo fyonse mfi ili apepi.

Yohane akoposha umutende kufilonganino fisano na fibili

⁴ Nine Yohane nkolembela ifilonganino fisano na fibili ifyamuchalo cha Asiya. Ubwanshi nomutende ukufuma kuli Lesa, uyo uulipo, uwalipo nakambi uwakubako. Imipashi isano na ibili iyaikala pantanshi yachipuna chakwe ichamuchinshi, imushukishe nokumupela umutende.

⁵ Yesu Klistu naye amushukishe nokumupela umutende. Ye ekamboni uwakuchetekela uyo uwatatikilepo ukubuka kubafwa. Entungulushi yashamfumu shonse ishapanonshi. Yesu alitutemwa nakambi alitukakula kumabifyo yesu ayalikutukaka.

⁶ Ye atupangile ukuba bashamfumu ukuti tupyungile Lesa Wishi kubati bachipupila. Kube umuchinshi nefiso kuli Yesu Klistu inshita shonse. Ameni.

⁷ Boneni akoyisa pamakumbi! Echo bonse bakumubona pamo nabo abamulashile. Imikowa yonse yamuno chalo yakulila pamulandu wakwe. Nachine nifyenka mfi. Ameni.

⁸ “Nine uwakutatikilapo nakambi uwakupelako,” efyasosa Bashikulu Lesa Uwafiso fyonse, uulipo, uwalipo nakambi uwakubapo.

Yohane abona Klistu muchimonwa

⁹ Nine Yohane wenu, nakambi muli Klistu ndi namwebo pamo mumachushi, mubufumu namukushipikisha. Nalikakilwe pachishi cha Patimosi pamulandu wakusambisha Amashiwi aku Lesa ukubela bukamboni pali Yesu.

¹⁰ Pakasuba kaku Bashikulu, Mupashi Wabuta walifikile pali nebo, elo naumfwile ishiwi ilikulu kunuma yanji kubati kulila kwandibu.

¹¹ Ishiwi lyasosele ati, “Ifyo ukobona ulembe mwibuku nokulituma kufilonganino mfi fisano na fibili: Ku Efeso, Simuna, Pegamamu, Tayatila, Sadisi, Filadelufiya, naku Lawodisiya.”

¹² Nalichebukile ukuti mbone abali kusosa kuli nebo. Nabwene ifyakutekapo inyali ifyagolide fisano na fibili.

¹³ Elo pakati kamfi kwalipo umo uwalikuboneka kubati Mwana wa Muntu. Afwite umwingila uwalikufika napamakasa. Elo alifwite umushipi wagolide pachifuba.

¹⁴ Imishishi yakwe yali iitubile tuutu kubati nifufuta, nangula matalala. Amenso akwe ali kubakama kubati mafyanga amulilo.

¹⁵ Amakasa akwe alikubeka kubati chinshimbi bafuma mukufula mumyuuba. Ishiwi lyakwe lyalikumfwika kubati menshi aapachipoma.

¹⁶ Mukuboko kwakwe ukwamulyo mwali intandala shisano na shibili. Elo mukanwa kakwe mwafumine umwele uutwile konse-konse. Impumi yakwe yali kubeka kubati kasuba ulo kafika pakati kamutwi.

¹⁷ Ulo namubwene naliwile pamakasa akwe kubati muntu ufwile. Nomba abikile ukuboko kwakwe ukwamulyo pali nebo nokuti, “Witina! Nine wakutatika nowakupelako.

¹⁸ Nine uyo uuli nobumi. Nalifwile, kuntu nomba ndi nobumi umuyayaya. Ndikwete ifiso pamfwa elo napachalo chabafwa.

¹⁹ Echo lemba ifintu ifyo ukobona, ifintu ifilipo namfilya ifyakuchitika.

²⁰ Ichabumfinshi ichantandala shisano na shibili isho ubwene mukuboko kwanji ukwamulyo, nefyakutekapo inyali shisano na shibili ishagolide, ifyo fipilibula nimfi: Intandala shisano na shibili, bafilolo bafilonganino. Elo ifyakutekapo inyali, filonganino fisano na fibili.