Taitasi 1 - Chipangano Chabwangu

¹ Nine Paulo umupyungi waku Lesa, nakambi umutumwa waku Yesu Klistu. Nalisalilwe ukutangilila abasalwa ukuti bachetekele nokwishiba ichine, ichingabafikisha kubumi ubwakuchinshika Lesa

² nokubapela ukulindilila kwabumi butapwa. Lesa uutabepapo, alayile ubumi mbu ulo inshita tayilatatika.

³ Elo panshita iilingile, afisulwile nchi mumashiwi akwe. Nomba nkosambisha amashiwi nga ukubati nimfilya Lesa Umupulushi wesu andayile.

⁴ Kalata nji nkolembela webo Taitasi mwana wanji pamulandu wachichetekelo icho fwebo babili tuli nacho. Lesa Bata pamo na Klistu Yesu Umupulushi wesu bakupele ubwanshi nomutende.

Imilimo yakwa Taitasi ku Kileti

⁵ Nalikushile ku Kileti ukuti ulungike fyonse ifyali ifitalungemepo, ukusala abakulu bafilonganino mumishi yonse kubati nimulya nakulangile.

⁶ Umukulu wachilonganino talingilepo ukukwata akalema, icho ekale nomukashi wakwe umo bwaka. Abana bakwe balingile ukuchetekela Klistu, tabalingilepo ukuba nemibele iibipile nangula bachintomfwa.

⁷ Uutungulula ichilonganino, talingilepo ukutwishikwa. Talingilepo ukuba nakalema pantu eukobona umulimo onse waku Lesa. Talingilepo ukuba nechipyu nangula chakolwa nangu uwachitala nakambi uwatemwa indalama.

⁸ Nomba abe uupokelela bwino abalwendo, uwatemwa ifiweme, uwayibaka, uuchita ifyalungama, uwabuta, nakambi uwatekanya.

⁹ Ekale uwayikatilila amashiwi aachine ayo twamusambishe. Muli nchi kuti akoselesha nabambi amasambilisho yachine nokushinina bo abakwetepo fitala.

¹⁰ Nomba ekobali abenji, maka-maka pakati kabantu abapwilibwike ukufuma ku Chiyuda. Mba balikosele imitima, nakambi basosa ifyabuchenjeshi ifishikwetepo namano.

¹¹ Ulingile ukubakanya mba ukusambilisha pakuti bekonaula ulupwa lonse ulo batandalile kukusambilisha ifintu ifyo tabalingilepo ukuti basambilishe. Bakochita mfi ukuti basangilepo ububoni.

¹² Umo umusoseshi waku bo asosele ati, “Abantu baku Kileti babufi lonse, balibipile ukubati ninama, nakambi batemwa umusheto abanang’ani.”

¹³ Amashiwi nga akwebesha. Echo ubashinine ukwinekantu bantu mba ukuti bakose ndi muchichetekelo chabo.

¹⁴ Ekuti baleke ukukonkelela utufuto twa Chiyuda nokulama amafunde bwaka abakana ukukonka ifyachine.

¹⁵ Kubantu abaololoka imitima, ifintu fyonse fiweme. Nomba kuli bo ababi nokutachetekela, tapapo akantu nangu akanini akaololoka pantu imitima namano yabo fibipile.

¹⁶ Balasosa ati balimwishiba Lesa, kuntu ifyo bachita filabakanina. Bantu balupato abatalama amafunde, abatangachitapo imilimo iiweme.