Mateyo 1 - Chipangano Chabwangu

Ifikolwe fyaku Yesu Klistu

¹ Umu emwakonkanina ifikolwe fyaku Yesu Klistu, umwana wakwa Davide, umwana wakwa Abulahamu.

² Abulahamu afyele Isake, Isake, afyele Yakobe, Yakobe afyele Yuda nabawakwe.

³ Yuda afyele Pelesi na Sela muli Tama, Pelesi afyele Hesiloni, Hesiloni afyele Lamu.

⁴ Lamu afyele Aminadabu, Aminadabu afyele Nashoni, Nashoni afyele Salimoni.

⁵ Salimoni afyele Bowasi muli Lahabu, Bowasi afyele Obedi muli Lute, Obedi afyele Yese.

⁶ Yese afyele imfumu Davide. Davide afyele Solomoni mumwanakashi uwali muka Uliya.

⁷ Solomoni afyele Lehobowamu, Lehobowamu afyele Abiya, Abiya afyele Asa.

⁸ Asa afyele Yehoshafati, Yehoshafati afyele Yeholamu, Yeholamu afyele Usiya.

⁹ Usiya afyele Yotamu, Yotamu afyele Ahasi, Ahasi afyele Hesekiya.

¹⁰ Hesekiya afyele Manase, Manase afyele Amoni, Amoni afyele Yosiya.

¹¹ Yosiya afyele Yehoiyakini nabawabo ulo Abaisilaeli bapintilwe ubusha ku Babiloni.

¹² Panuma yakupintwa mubusha ku Babiloni, Yehoiyakini afyele Shealitiyeli, Shealitiyeli afyele Selubabeli.

¹³ Selubabeli afyele Abiyudi. Abiyudi afyele Eliyakimu, Eliyakimu afyele Aso.

¹⁴ Aso afyele Sadoki, Sadoki afyele Akimu, Akimu afyele Eliyudi.

¹⁵ Eliyudi afyele Eliyesa, Eliyesa afyele Matani, Matani afyele Yakobe.

¹⁶ Yakobe afyele Yosefe uwaupile Maliya, Maliya naye afyele Yesu, uwitwa Klistu.

¹⁷ Kanshi inkulo umo shakonkanina niumu, ukufumu kuli Abulahamu nokufika kuli Davide ninkulo ikumi limo nashine. Elo ukufumu kuli Davide ukufika nokupintwa mubusha ku Babiloni ninkulo ikumi limo nashine. Ukufuma kubusha bwaku Babiloni ukufika nakukufyalwa kwaku Klistu Uwasubwa ngulya, napo ninkulo ikumi limo nashine.

Ukufyalwa Kwaku Yesu Klistu

¹⁸ Ukufyalwa kwaku Yesu Klistu kwali mfi: Maliya banyina balayilwe kuli Yosefe uwafumine kumukowa wakwa Davide. Nomba ulo tabalakumana pamo, Maliya alisangilwe ali nefumo ukupitila mu Mupashi Wabuta.

¹⁹ Pakuti Yosefe umulume wakwe ali umuntu uwakaele, tafwayilepo ukumusebanya. Echo afwayile ukumubenga mubumfisolo.

²⁰ Ulo achili akolanguluka mfi, boneni umungelo waku Bashikulu alimubwenekele muchoshi nokusosa ati, “Yosefe, we mwana wakwa Davide, witina ukubula Maliya ukuti abe umukashi obe pakuti ifumo akwete lyakupitila mu Mupashi Wabuta.

²¹ Akufyala umwana umwalalume. Elo webo wakwisa kumwinika Yesu, pakuti eukapulusha abantu bakwe kumabifyo abo.”

²² Mfi fyonse fyachitikile ukuti chifikilishiwe ichasoselwe na Bashikulu ukupitila mumusoseshi ati,

²³ “Boneni umwanansungu uutayishibapo umwalalume akoyisa kwimita, elo akufyala umwana umwalalume uwo bakwisa kwinika Imanueli,” (ilikoalula ati, “Lesa ali nafwe.”)

²⁴ Ulo Yosefe abukile mutulo, achitile mwenkomo umungelo wa Bashikulu amwebele. Elo apintile Maliya umukashi wakwe kunanda.

²⁵ Nomba tabakumenepo nakwe ukufikila ulo afyele umwana umwalalume. Elo Yosefe amwinikile Yesu.