Maliko 1 - Chipangano Chabwangu

Ukubilisha kwakwa Yohane Mubatishi

¹ Nku ekwamba kwa Butumi Bwawama ubwaku Yesu Klistu Umwana waku Lesa.

² Bwatatikile ukubati nimfilya Esaya umusoseshi alembele ati, “Lesa akoti, ‘Umfwa, nkotuma intumi yanji pantanshi yobe, eyikoyisa kuwamya inshila yobe.’

³ Umuntu akobilikisha muchiswebebe ati, ‘Wamyeni musebo waku Bashikulu, lungamikeni bwino inshila yabo, ukuti bese bendemo!’”

⁴ Yohane Mubatishi alikubilisha nokubatisha muchiswebebe ati, “Lapileni nokubatishiwa ukuti Lesa amunakilile amabifyo enu.”

⁵ Epo balile kuli Yohane abantu abenji ukufuma kuchalo chaku Yudeya, na mumusumba wa Yelusalemu, ukuya mukumfwa ifyo Yohane alikushimika. Epo balikuyisosela amabifyo abo, nokubatishiwa kuli Yohane munika ya Yodani.

⁶ Ifyakufwala fyaku ngu Yohane fyabililwe namasako angamila nakambi akwete nomushipi wampapa mumusana wakwe. Chakulya chakwe chali ninshe nobuchi.

⁷ Epo alikubilisha nokuti, “Uyo uwakwisa panuma yanji alinchililepo ifiso. Nebo tanshilingilepo nokwinama panshi ukuti nkakule ulushinga lwankwabilo shakwe.

⁸ Nebo nkomubatisha namenshi, kuntu Ye akwisa kumubatisha ku Mupashi Wabuta.”

Yesu abatishiwa nakambi ayeshekwa na Satana

⁹ Tapapitilepo inshita iitali Yesu alishile ukufuma kumushi wa Nasaleti muchalo cha Galili nokwisa kubatishiwa kuli Yohane, mumulonga wa Yodani.

¹⁰ Ulo afumine mumenshi, Yesu abwene kumulu kwayisuka, no Mupashi Wabuta uwapalile ukubati ninkunda wayikele pali Ye.

¹¹ Neshiwi lyafumine kumulu lyasosele ati, “Webo uli Mwana wanji uwatemwekwa. Muli we emo nkosekelela.”

¹² Bwangu-bwangu Umupashi Wabuta walimutwite muchiswebebe.

¹³ Mulya Yesu ayikele inshiku amakumi ane mukwesheka kuli Satana. Inama shamumpanga nasho emo shali, nomba abangelo ebali kumubombela.

Yesu ayita abakusambila bakwe abakwamba bane

¹⁴ Ulo bayikete Yohane nokumubika muchifungo, Yesu ayile kuchalo cha Galili mukubilisha Ubutumi Bwawama ubwabufumu bwaku Lesa.

¹⁵ Asosele ati, “Inshita yafika, nobufumu bwaku Lesa bwapalamina. Pilibukeni imitima nokuchetekela mu Butumi Bwawama!”

¹⁶ Ulo Yesu alikwenda mumbali yaku Bemba wa Galili, abwene abalofi babili, Simoni na Andileya wabo, balikuteya isumbu muli bemba pakuti bali balofi banswi.

¹⁷ Elo Yesu asosele kuli bo ati, “Nkonkeni, pakuti nkoyisa kumutala abalofi babantu.”

¹⁸ Bwangu-bwangu balishile amasumbu abo nokumukonka.

¹⁹ Ulo Yesu aendeleko panini, abwene Yemusi mwana Sebedi, na Yohane wabo. Bali mubwato pamo nabawishibo, bakososola amasumbu abo.

²⁰ Ulo Yesu ababwene, alibetile. Elo balishile bawishibo ba Sebedi mubwato pamo nabamilimo nokumukonka.

Umuntu uwali nomupashi uubi

²¹ Yesu nabakusambila bakwe bayile kumushi wa Kapenaumu, epo pabushiku bwakonkelepo ubwe Sabata, Yesu ayinjile munanda yakulombelamo Lesa nokusambisha.

²² Abantu abamumfwileko balishimbilwe pakusambisha kwakwe, pakuti alikusambisha umo abelele nensambu. Tali kubati basambishi ba Mafunde iyowo.

²³ Penkapo umuntu uwali nomupashi uubi ayinjile munanda yakulombelamo Lesa nokwaula ati,

²⁴ “Yangwee! Nindo ukofwaya kuli fwe, we Yesu waku Nasaleti? Napo wayishila ukutonaula? Ne ndikwishi, niwe Wabuta waku Lesa!”

²⁵ Nomba Yesu aliukalipile umupashi uubi ati, “Talala, fumamo muli ngu muntu!”

²⁶ Umupashi uubi walimufulungenye, nokwaula neshiwi ilikulu, elo walifuminemo mumuntu.

²⁷ Abantu bonse balishimbilwe nokutatika ukufumbashanya ati, “Chindo nchi? Napo nku ekusambisha kwabwangu? Ngu muntu ali nensambu shakukalipila imipashi iibi nayo ikomumfwila!”

²⁸ Bwangu-bwangu munkunta wakwe walyumfwikile konse-konse muchalo chonse icha Galili.

Yesu aposha abalwele abenji

²⁹ Ulo bafumine munanda yakulombelamo Lesa, bayile kunanda yakwa Simoni na Andileya, bali pamo na Yemusi na Yohane.

³⁰ Nomba basangile banafyala wakwa Simoni balilele pakuti balilwele, umubili walikukaba. Ulo Yesu afikile, bwangu-bwangu balimwebele ifyakulwala kwabo.

³¹ Alile uko balele, nokubekata pakuboko, nokubemya. Penkapo balipolele, epo batatikile nokubatebeta.

³² Nomba muchungulo, katile ukwinjila akasuba, batwite kuli Yesu bonse abalwele, nabayiketwe imipashi iibi.

³³ Abantu bonse abamumushi ngu balongene pamulyango wananda.

³⁴ Yesu aliposeshe abantu abenji abalikulwala amalwele aapusene-pusene, elo alifumishe nemipashi iibi iinji. Tasuminishepo ukuti mipashi iibi isose, pantu yalimwishibile.

Yesu abilisha Ubutumi Bwawama mu Galili

³⁵ Muluchelo-chelo ubushiku bwakonkelepo, Yesu alibukile nokufuma munanda. Afumine mumushi nokuya enka kumpanga mukulomba kuli Lesa.

³⁶ Ulo Simoni nambalya abali nakwe babwene ukuti talipo, bayile mukumufwaya.

³⁷ Ulo bamusangile bamwebele ati, “Abantu bonse bakokufwaya.”

³⁸ Elo Yesu abasukile ati, “Katulokuya kumishi imbi iikonkelepo, ukuti nako nkabilisheko pakuti echo nayishile.”

³⁹ Epo ayile akopitana muchalo chonse icha Galili, ukubilisha Ubutumi Bwawama mumananda yakulombelamo Lesa nokufumya mipashi iibi.

Yesu aposha uwafyona

⁴⁰ Umuntu umo uwalikulwala ifyona, ayile kuli Yesu, nokumufukamina nokumupapatila ukuti amwafwe. Asosele ati, “Kati mukofwaya, kuti mwamposha.”

⁴¹ Yesu aliketwe inkumbu, aatambulula ukuboko kwakwe nokumukumya. Elo asosele ati, “Ina, nkofwaya, pola!”

⁴² Bwangu-bwangu nefyona fyakwe fyalipolele.

⁴³ Elo Yesu amwebele ukuti aye nokumukonkobesha ati,

⁴⁴ “Umfwa, wisosapo kumuntu nangu umo pali nchi. Koya bwaka ukayilange kuli chipupila, elo ukatwale ichipupo nga mfilya Mosesi amwebele ukwebati chibe bumwanamboni kubantu ukuti ulipolele.”

⁴⁵ Nomba ngu muntu ulo afuminepo bwaka, ayile nokutatika ukubilisha ilyashi konse-konse. Nachine alibilishe ukwinekantu, ichalengele na Yesu ukutenjila mumishi apabuta. Ayikele kunse mumpanga. Nangu chali mfi, abantu balikuya kuli Ye ukufuma konse-konse.