Luka 1 - Chipangano Chabwangu

Amashiwi akwambilapo

¹ Mwe batemwekwa ba Teyofilasi, Abantu abenji balyeseshe ukulemba bwino-bwino ukuti balondolole ifintu ifyachitika pakati kesu.

² Balilembele ifyo batwebele abantu abaliko ulo fyatatikile mfi fintu. Pakuba bo baliyibwenene namenso abo, nokubilisha nga mashiwi.

³ Nomba nebo nalikonka bwino-bwino nji milandu ukutula pakutatika. Echo nati kanembe bwino nakuli mwebo mwe batemekwa ba Teyofilasi

⁴ pakuti mwishibishe ukwebesha kwaku nga mashiwi mwaebelwe.

Ukubilisha kwakufyalwa kwakwa Yohane Mubatishi

⁵ Munshiku nshilya ulo Helodi ali mfumu muchalo cha Yudeya, kwalipo chipupila umo uwali kwitwa Sekaliya. Ali wamulupwa lwaba chipupila bakwa Abiya. Umukashi wakwe naye Elisabeti ali wamulupwa lwaba chipupila bakwa Aloni.

⁶ Bonse mba babili bali abantu abaweme nakambi abasekesha Lesa. Balikumfwila amafunde onse nokukonka ukufwaya kwaku Bashikulu.

⁷ Nomba tabakwetepo bana pantu Elisabeti ali ng’umba. Elo bonse babili bali abakote.

⁸ Akasuba kamo Sekaliya alikupyunga umulimo wakwe uwabu chipupila munanda yaku Lesa. Yali ninshita yakwe iyakupyungila Lesa ngu mulimo.

⁹ Alisalilwe ukulingana muli bumwine-mano ukuti akoche ifyabwema buweme nga kafuto kabo akabuchipupila. Elo alinjile munanda yaku Lesa.

¹⁰ Ibumba lyabantu lyalikulombela panse ulo Sekaliya alikocha ifyabwema.

¹¹ Elo umungelo waku Lesa alibonekele kuli ye, nokwimakana kulubali lwakuboko kwamulyo ulwakochelapo ifyabwema.

¹² Ulo Sekaliya amubwene alyebekele nokuba nomwenso.

¹³ Nomba umungelo amwebele ati, “Witina, Sekaliya! Lesa alyumfwile ukulomba kobe. Echo nomukashi obe Elisabeti akoyisa kukufyalila umwana umwalalume. Ukoyisa kumwinika ishina lyakwe Yohane.

¹⁴ Wakuba nokusekelela nokwanga, nabenji bakwisa kusekelela pamulandu wakufyalwa kwakwe.

¹⁵ Pantu akuba umuntu umuchindami pachinso chaku Bashikulu. Takanwepo waini nangula ifyakukola, ukufumina kukufyalwa kwakwe ifiso fya Mupashi Wabuta fyakuba pali Ye.

¹⁶ Akubwesha abantu abenji abana Isilaeli kuli Bashikulu Lesa wabo.

¹⁷ Ewakuntangila pantanshi yaku Bashikulu, uushipile umuntu nakambi uuli nefiso kubati musoseshi Eliya. Akwisa kuwikishanya bawishibo nabana, nakambi akwisa kulenga abaminsuula ukuti babe namalangulushi kubati ningalya ayachumfwila. Akwisa kuwamya abantu baku Bashikulu mitima ukuti babe abakubapyungila.”

¹⁸ Sekaliya afumbile umungelo ati, “Nga kanshi ningeshiba shani ukuti mfi fyachine? Pakuti nebo ndimukote, umukashi wanji naye mukote.”

¹⁹ Elo umungelo amwasukile ati, “Nebo nine Gabuliele, ne wimakana pachinso chaku Lesa uyo uuntumine mukukweba nji mbila iiweme.

²⁰ Nomba webo tauchetekelepo amashiwi anji ayakwisa kuchitika panshita iyapelwa. Pakuba webo tauchetekelepo amashiwi anji, wakuba chibulu ukufikila nkalya kasuba nga mashiwi akufikilishiwa.”

²¹ Pali njilya nshita abantu abalikulindilila Sekaliya, balishimbilwe pakubona ukuti akokola munanda yaku Lesa.

²² Sekaliya pakufuma, chalimukangile ukusosa kubantu. Echo abantu balishibile ukuti abonekelwa muchimonwa nechintu chimo muchipinda chachipupililo. Sekaliya naye alikubachebwisha bwaka pakuti ayalukile chibulu.

²³ Ulo inshita yamilimo yakwe yashilile munanda yaku Lesa, Sekaliya abwelele kunanda yakwe.

²⁴ Ulo papitile inshita, umukashi wakwe Elisabeti alimitile, aleka nokuboneka kubantu pamyeshi isano.

²⁵ Alikusosa bwaka ati, “Eya mwandi, tempa Lesa aling’umfwile nandibo, anyangulwileko insoni kubantu!”

Umungelo Gabuliele abilisha ukufyalwa kwaku Yesu

²⁶ Mumweshi wachisano naumo apo Elisabeti alimitile, umungelo Gabuliele atuminwe na Lesa kumushi waku Nasaleti muchalo cha Galili.

²⁷ Akwete amashiwi kumwanansungu uutayishiba umwalalume uwalumbililwe kumwalalume uwali kwitwa Yosefe, uwamumukowa wakwa Davide. Ishina lyangu mwanansungu ni Maliya.

²⁸ Umungelo ayile kuli Maliya nokuti, “Umutende ube nawebo! Bashikulu Lesa bali nawebo, elo bakushukisha ukwinekantu!”

²⁹ Maliya pakumfwa nga mashiwi alipapukile nokulanguluka ati, “Ngoyu mutende wamusango shani?”

³⁰ Elo umungelo asosele ati, “Witina Maliya. Wasanga ishuko kuli Lesa.

³¹ Bona, ukoyisa kwimita nokupapa umwana umwalalume uyo wakwinika ishina lyakwe Yesu.

³² Ngu mwana akwisa kuba umukulu, nokwitika Umwana waku ngulya uwapulamo. Elo Bashikulu Lesa bakoyisa kumupela ubufumu kubati nimbulya Davide bawishi aakwete.

³³ Akoyisa kuteka palupwa lwakwa Yakobe kunshita shonse, nobufumu bwakwe tabwakashilepo iyowo!”

³⁴ Elo Maliya afumbile umungelo ati, “Ngechi kuti chaba shani pakuti nebo nshayishibapo umwalalume?”

³⁵ Umungelo amwasukile ati, “Umupashi Wabuta wakwisa pali webo, nefiso fyaku Lesa uwapulamo fyakwisa pali we. Efyo umwana uwakufyalwa akoyisa kwitwa, Umwana waku Lesa.

³⁶ Kubati Elisabeti umufyala obe, uyo abantu balikwita ing’umba, naye nomba alimitile mubukote bwakwe, nanguno mweshi wakulenga isano naumo.

³⁷ Pakuba takwabapo ichili chonse ichingamukanga Lesa iyowo.”

³⁸ Maliya asosele ati, “Nebo ndimusha waku Bashikulu. Kube kuli nebo ukulingana namashiwi obe.” Elo umungelo afuminepo kuya.

Maliya atandalila Elisabeti

³⁹ Pali njilya nshita Maliya aliyipekenye, ayimine nakasaku ukuya kumushi wakumitunta, muchalo cha Yudeya.

⁴⁰ Ayinjile munanda yakwa Sekaliya nokupela Elisabeti umutende.

⁴¹ Ulo Elisabeti aumfwile umutende wakwa Maliya, umwana alisakene mwifumo lyakwe. Elo Elisabeti ayiwile no Mupashi Wabuta,

⁴² abilikishe neshiwi ilikulu ati, “We washuka pabanakashi bonse, nomwana wakufyalwa alishuka.

⁴³ Nomba mbelishuko lyayisa shani kuli nebo ichakuti banyinabo baku Bashikulu wanji bantandalila?

⁴⁴ Pakuti ulo naumfwa umutende wenu, elo umwana asakana nokusekelela mwifumo lyanji.

⁴⁵ Alishuka umwanakashi uwachetekela ukuti amashiwi Bashikulu basosa kuli ye akuchitika!”

Ulwimbo lwakwa Maliya lwakutondayisha Lesa

⁴⁶ Elo Maliya asosele ati, “Umutima wanji ukotondayisha Bashikulu,

⁴⁷ ndatondayisha shikulu elo ndi wasekelela, muli Lesa Umupulushi wanji.

⁴⁸ Pakuti Ye anjibukisha nemusha wakwe uwachepesha! Ukufuma pali njino nshita, inkulo shonse shakunjita uwashuka.

⁴⁹ Pakuba Lesa uwafiso fyonse, anchitila ifintu ifikulu, ishina lyakwe lyabuta,

⁵⁰ Ukufuma kunkulo imo nokufika kuli iimbi Lesa alanga inkumbu kuli bo abamupela umuchinshi.

⁵¹ Shikulu abomfya ukuboko kwakwe ukwafiso, ukupalanganya bo abayitutumuna.

⁵² Lesa afumishepo balumbwe pafipuna fyabufumu bwabo, nomba asumbula ababufuke.

⁵³ Ayikusha abansala nefintu ifiweme, nomba abasambashi abatamfya minwe-nkutwa.

⁵⁴ Asungile ichipangano alayene nefikolwe fyesu, elo ayisa kwafwilisha umupyungi wakwe Isilaeli.

⁵⁵ Talabilepo ukulanga inkumbu kuli Abulahamu, elo nakubana bakwe umuyayaya.”

⁵⁶ Ukufumapo Maliya ayikele na Elisabeti ukubati imyeshi itatu, elo abwelelemo kwabo.

Ukufyalwa kwakwa Yohane Mubatishi

⁵⁷ Inshita yakupapilapo umwana Elisabeti yalikumanine. Elo apapile umwana umwalalume.

⁵⁸ Abena mupalamano nabantu bakwe balyumfwile ifyo Lesa amulangulukile nokumukwatila ichisa ichikulu. Balile nokusekelela nakwe pamo.

⁵⁹ Pabushiku bwakulenga shisano nashitatu, balile mukumushilimuna umwana. Epo bafwayile ukumwinika ishina lyaku bawishi ba Sekaliya.

⁶⁰ Nomba banyina balyasukile ati, “Iyowo, ishina lyakwe ni Yohane.”

⁶¹ Bonse basosele kuli Elisabeti ati, “Tapapo nangu umo uwamumukowa uwitwapo neshina ndi!”

⁶² Elo bachebwishe wishi ukwebati beshibe ishina umwana wakwe akwinikwa.

⁶³ Sekaliya afumbile ichakulembapo. Elo alembelepo ati, “Ishina lyakwe ni Yohane.” Abantu bonse balishimbilwe!

⁶⁴ Pali yenka njilya nshita, Sekaliya atatikile ukusosa nokutotela Lesa.

⁶⁵ Abena mupalamano bonse bayiwile nomwenso, nelyashi lyamfi fintu lyapalangene muchalo chonse champili icha Yudeya.

⁶⁶ Kuli bonse abalikumfwako balikulanguluka mumitima yabo nokufumba bati, “Nga kanshi ngu mwana akuba shani?” Pantu chilishibikilwe ukuti ifiso fyaku Lesa ali nafyo.

Ulwimbo lwakwa Sekaliya

⁶⁷ Sekaliya, wishi wakwa Yohane, ayiwile no Mupashi Wabuta, aliloseshe ati,

⁶⁸ “Kabatotwe Bashikulu, Lesa waku Isilaeli! Pakuti ayisa kwafwilisha abantu bakwe, elo abapela ubwanalale.

⁶⁹ Atuletele umupulushi uwafiso, uwamuchikolwe chakwa Davide umupyungi wakwe.

⁷⁰ Ukubati nimulya asosele kale, ukupitila mubasoseshi bakwe ababuta.

⁷¹ Alayile ukutupulusha kutupondo twesu, nakufiso fyaku bo bonse abatupata.

⁷² Aebele ukubachitila inkumbu banshifwe, nokwibukisha ichipangano chakwe ichabuta.

⁷³ Ukulapa nkulya alapile kuli banshifwe Abulahamu,

⁷⁴ ukuti atupokolole kufiso fyatupondo twesu, nokumupyungila ukwambula umwenso.

⁷⁵ Ukuti tube abapatulikwa nabaololoka pamenso akwe, munshiku shonse ishabumi bwesu.

⁷⁶ “Mwandi, wemwana wanji, wakwitwa umusoseshi waku Lesa, uwapamulu pali fyonse. Wakwisa kutanjila pantanshi yaku Bashikulu, ukuya kuwamya inshila yabo.

⁷⁷ Ukwishibisha abantu bakwe ukuti bakwisa kupuluka, mukunakililwa kwamabifyo abo.

⁷⁸ Lesa wesu aba uwankumbu nowamutembo. Akwisa kutusanikila nechipulusho chakwe, kubati kutuba kwakumacha.

⁷⁹ Akubasanikila bonse abayikala mumfinshi namuchintelelwe chamfwa, ukulangilila munshila yabwanalale.”

⁸⁰ Umwana alikulile mwifumbi namumano. Ayikele muchiswebebe ukufikila akasuba ayishile kuyilanga kubena Isilaeli.