Loma 1 - Chipangano Chabwangu

¹ Nine Paulo, umupyungi waku Klistu Yesu. Lesa alinjitile ukuti mbe umutumwa. Alinsalile ukwebati mbilishe Ubutumi bwakwe Bwawama.

² Ubutumi mbu Lesa abulayile akale ukupitila mubasoseshi bakwe. Elo bwalembelwe mu Malembo Aabuta.

³ Busosa ifya Mwana wakwe, Bashikulu wesu Yesu Klistu. Ukusosa ifyabuntu bwakwe, afyalilwe muchikoto chamfumu Davide.

⁴ Nomba ukubona pafyakubuta kwakwe ukwabulesa, alanga nefiso ifikulu ukuba Umwana waku Lesa ukupitila mukubushiwa kubafwa.

⁵ Muli Klistu ngu emo Lesa ampelele ishuko lyakuba umutumwa waku Klistu, ukuti ntungulule abantu bamitundu yonse ukumuchetekela nokumumfwila.

⁶ Namwe muli bamo abayitwa na Lesa ukuti mube abaku Yesu Klistu.

⁷ Epo nomba nkolembela mwebo bonse abali mu Loma, mwebo Lesa atemwa nokumwita ukuti mube abantu bakwe. Lesa Bata na Bashikulu wesu Yesu Klistu bamupele ubwanshi nomutende.

Ukulomba kwakutotela

⁸ Ichakubalilapo, nkototela Lesa wanji ukupitila muli Yesu Klistu pamulandu waku mwebo bonse, pakuti ichalo chonse chikoumfwa ifyachichetekelo chenu.

⁹ Lesa uwo nebo mpyungila mukubilisha Ubutumi bwakwe Bwawama nomutima wanji onse, ekamboni wanji ukuti nebo ndamwibukisha.

¹⁰ Lonse ndalomba ukuti kati Lesa akofwaya angampelako akashita kakwisa kumutandalila.

¹¹ Pantu nkofwayisha ukwinekantu ukumubona, ukuti njise mwakanyeko ifyabupe fimbi fyakumupashi ukuti mukoselesheko.

¹² Umo ndoseshe nimukuti tukoseleshanye muchichetekelo. Mwebo mukankoselesheko muchichetekelo chenu, namwe muli chanji.

¹³ Echo bawesu, nkofwaya mwishibe ukuti inshita ishinji nalikufwaya ukwisa ukumutandalila, kuntu ifintu fimbi filankanya ukuchita nchi. Nkofwaya ukwalula bamo abamuli mwebo kubati nimfilya nachitile kubenafyalo bambi.

¹⁴ Pakuti ndi nenchito yakushimika kubantu bonse, kubasambilila kubati Bagiliki nabatasambilila, kubamano nabapuneme.

¹⁵ Echo nkofwayisha ukwinekantu ukubilisha Ubutumi Bwawama nakuli mwebo mwe bena Loma.

Ifiso fya Butumi Bwawama

¹⁶ Nebo nshakwatapo nsoni pa Butumi Bwawama, pakuba efiso fyaku Lesa mukupulusha abantu bonse abachetekela, ukutatikila ku Bayuda elo nakubenafyalo.

¹⁷ Pakuti Ubutumi mbu ebufisulula emo Lesa alungamikila abantu bonse. Inshila achitilamo mfi, ukutatika pakwamba ukufika nakumpelo, yachichetekelo. Kubati nimfilya Amalembo asosa ati, “Umuntu alungamikwa pamulandu wakuchetekela, elo alaba nobumi.”

Ukubifya kwabantu bonse

¹⁸ Ubukali bwaku Lesa bukofisuluka ukufuma kumulu. Akokalipila abantu pamulandu wakubifya kwabo nokutamuchinshika. Mukubifya kwabo, bashimayisha ichine ukwebati chiyishibikwapo.

¹⁹ Lesa alabakalipila pakuti ifyo umuntu angeshiba ifyaku Lesa bo nabafishiba bwino-bwino. Lesa umwine ewabafisululwile mfi.

²⁰ Pakuba ukufuma apo Lesa atalile ichalo, abantu balishibile ifyo Lesa ali, emukuti ifiso fyakwe fitapwapo, elo nobulesa bwakwe. Abantu baleshiba mfi ulo babona ifyo Lesa alengele. Echo tabakwetepo ichakwipokolwelako.

²¹ Nachine Lesa balimwishibile, kuntu tabamupelako umuchinshi nangu ukumutotela. Elo mumalangulushi abo tamupo ifyamano. Bayiwula nemfimfi, echo balanguluka ifyabwaka.

²² Bo bayitondayisha ukuba abamulangwe, kanshi bapuneme.

²³ Muchifulo chakutotela Lesa uwabumi, batotela tungosa wakubasa utuboneka kubati bantu bwaka, nangula ifyuni nangula inama nangula ifiyikula.

²⁴ Echo Lesa abalekele mbalya bantu ukuchita ifibi ifyalikufwaya imitima yabo. Elo amalangulushi abo aakowele alengele ukuti bachite ifyamwansha nsoni nemibili yabo.

²⁵ Balishiile ifyachine ifyaku Lesa nokukonka ifyabufi. Balikulambila nokupyungila ifyo Lesa abumbile muchifulo chaku Kabumba umwine uulingile ukutondayisha umuyayaya. Ameni.

²⁶ Nipamulandu wamfi epo Lesa abalekele ukuti balokuchita ifibi ifyamwansha nsoni. Abanakashi baya kubanakashi banabo, ichitalingilepo.

²⁷ Munshila imo yenka, abalalume nabo balekele ukuya kubanakashi. Baya kubalalume banabo nokuchita ifyamwansha nsoni nabo. Echo bayiletele ukukandwa ukulingene nemilimo yabo iibipile.

²⁸ Pantu abantu mbalya balikene ukumfwila, Lesa alibalekele mumalangulushi abo aabi, ukuti bachite ifintu ifyabipisha ifyo tabalingilepo ukuchita.

²⁹ Imitima yabo yayiwilemo ubusali bonse: ububi, bukabundulu, imibele iibi, mufimbila, bukepaya, ulubo, ubuchenjeshi nolupato. Balamba,

³⁰ ukusapulula abanabo nokupata Lesa. Abansele, abamiya nakambi abakwitutumuna. Balanguluka bwaka inshila shakuchitilamo ifibi. Elo tabomfwilapo abafyashi babo.

³¹ Bapuneme, abatachetekelwapo, abatakwatapo inkumbu, abankalwe.

³² Balishiba ifunde lyaku Lesa ilikoti abantu abachita mfi balinjile ukufwa. Nomba tabachitapo bwaka fyenka mfi, kuntu basuminisha nabonse abafichita.