Imilimo ya batumwa 20 - Chipangano Chabwangu

Paulo aya ku Masedoniya naku Akeya

¹ Ulo ichimfulunganya chashilile, Paulo alongenye abena Klistu pamo nokubakoselesha. Elo abalayile nokuya kuchalo cha Masedoniya.

² Apitile monse mufifulo mfilya nokukonkobesha abena Klistu namashiwi ayenji. Elo ayile kuchalo cha Akeya,

³ nokwikalako imyeshi itatu. Ulo alikufwaya ukuya ku Siliya, aumfwile ati Abayuda balikumupingila. Elo Paulo alangulukile ukubwelela kunshila iyakupita ku Masedoniya.

⁴ Abayile na Paulo ni Sopata mwana Pilusi umwina Beliya, Alisitakasi na Sekundo abena Tesalonika, Gayo umwina Debe, Tikikasi na Tulofimasi abafumine kuchalo cha Asiya pamo na Timoti.

⁵ Mba ebatanjileko, balikutulindila kumushi wa Tulowasi.

⁶ Ulo kwapwile ukulya kwa Mufuba Uutatutumuka, nafwebo twayile nobwato ukufuma kumushi wa Filipi. Ulo papwile inshiku shisano, twabasangile ku Tulowasi. Elo twayikeleko umulungu umo.

Paulo aya ku Tulowasi

⁷ Pakasuba kakwamba ake Sabata, twalongene bonse pamo ukulya Umulalilo wa Bashikulu. Ulo twapwile, Paulo atatikile ukusosa nabantu. Pantu alikufwaya ukuya palwendo uluchelo, echo alipitilile ukusosa ukufika napakati kabushiku.

⁸ Nakambi munanda yapamulu umo twalongene mwali inyali ishinji.

⁹ Umulumbwana umo, ishina lyakwe Yutikasi alikalile pepunda pamulu. Pakuti Paulo alitwalilile ukusosa, Yutikasi atatikile ukushipula ukufikila alala nokulala. Ulo ali mutulo aponene panshi ukufuma pepunda lyamuputule uwachitatu uwapamulu. Elo bamusangile ali uwafwa kale.

¹⁰ Paulo ayikile panshi nokuwila pamulumbwana ngu nokumufukatila. Elo aebele abantu ati, “Mwisakamanapo iyowo achili nobumi!”

¹¹ Elo Paulo akwelele nakambi pamulu. Asunawile umufuba nokulya. Atwalilile ukusosa nabo bwasuka bwacha. Elo alayile nokuya.

¹² Abantu batwele Yusitasi ali umumi, nakambi balisekelele ukwinekantu.

Paulo aya ku Melitasi

¹³ Nomba fwebo twalibalilepo ukuya nobwato kumushi wa Asosi. Nkulya twapatikile Paulo mubwato. Atwebele umwine ukuchita mfi pantu ye aendele namakasa ukuya nku.

¹⁴ Ulo atukumenye ku Asosi, twamupatikile mubwato nokuya kumushi wa Mitileni.

¹⁵ Ulo bwachele twayile nobwato nokufika kumushi wa Kiyosi. Akasuba kakonkelepo twafikile kumushi wa Samosi. Nakambi ati buche twafikile kumushi wa Miletasi.

¹⁶ Paulo alangulukile ukuti apite mupepi nomushi wa Efeso pakuti eposa inshita muchalo cha Asiya, pantu alikufwaya ukufika ku Yelusalemu akasuba ka Pentekosite katalafika.

Paulo alayana nabakulu baku Efeso

¹⁷ Ulo ali ku Miletasi, Paulo alilayishe amashiwi ku Efeso ukuti abakulu bachilonganino bamukumanye ku Miletasi.

¹⁸ Ulo bafikile, Paulo asosele kuli bo ati, “Mwalishiba umo nalikwikalila namwebo inshiku shonse ukutatikila bwaka pakasuba nafikile muchalo cha Asiya.

¹⁹ Nalikupyungila Bashikulu mukuyichefya konse neminsoshi, namachushi alikumponena kumulandu wamapange Abayuda.

²⁰ Mwalishiba ukuti tanshakwetepo akaso kakumweba ichintu icho nayishibile ukuti chakumwafwa mwebo, kuntu nalikusambisha nokubilisha palwalala namumananda yenu.

²¹ Nalikukonkobesha Abayuda nabenafyalo ukuti balapile nokwalukila kuli Lesa ukuti bachetekele muli Bashikulu Yesu.

²² Boneni nomba nkoya ku Yelusalemu pantu Umupashi Wabuta efyo wanjeba. Tanshishibilepo nefyakuya kunchitikila nkulya iyowo.

²³ Nomba icho njishibile bwaka chakuti mumishi yonse umo mpitana, Umupashi Wabuta ulanchenjesha ukuti ichifungo namachushi fikonindila.

²⁴ Nomba shilanguluka ukuti ubumi bwanji buli nakantu iyowo, kuntu ichikulu chakuti nshilishe umulimo wanji, nobutumwa ubo napelwa kuli Bashikulu Yesu, ubwakubilisha Ubutumi Bwawama ubwabwanshi bwaku Lesa.

²⁵ “Ukubako ndishibile ukuti mwebo bonse nalikwendaukamo ulo nalikushimika ifya bufumu bwaku Lesa, tamwakambonepo nakambi iyowo.

²⁶ Nomba nkano kasuba nkomwebelapo limo ukuti nga chakuti bamo abamuli mwebo baluba kuli Lesa ninshi lwabo abena.

²⁷ Pantu nalimushimikila fyonse ifyo Lesa afwaya ukwambula ukushako nangu chimo.

²⁸ Echo mulokuyisunga mwebene nomukuni onse uyo Umupashi Wabuta wamupela ukwangalila. Mube bachembela bamukuni waku Lesa uyo umwine apulwishe mumfwa ya Mwana wakwe.

²⁹ Ukuba ndishibile ukwebati nga naya, imimbulu iikali yakumwinjilila nokutapa umukuni waku Klistu.

³⁰ Napali mwebo kumo, pakuba abantu bambi abalikusosa ifyabufi ukuti bapusaulepo abachetekela bambi nokubakonka.

³¹ Echo mube abayibukila nokwishiba ukuti pamyaka itatu nalikusambisha umo-umo akasuba nobushiku neminsoshi iyinji.

³² “Nomba namupela kuli Lesa nakumashiwi aasosa ubwanshi bwakwe. Ye ukuti amukoselesha nokumushukisha kuli fyonse ifyo Lesa ateyanishisha abantu bakwe.

³³ Tanshakumbwapo indalama nangu fyakufwala fyamuntu nangu umo iyowo.

³⁴ Mwe mwalishiba ukuti nalikuyipyungila namaboko anji nga ukusanga ifyo nebo nambalya twalinabo twalikukabila.

³⁵ Nalimulangilila muli fyonse ukuti mukupyungisha nefiso tufwile ukwafwa bo abatakwetepo ifiso. Ulo tulechita mfi, tufwile kwibukisha amashiwi aku Bashikulu Yesu uwasosele umwine ati, ‘Mukupela emwaba ishuko ukuchila mukupokelela.’”

³⁶ Ulo Paulo ashilile ukusosa, alifukeme nokulomba pamo nabonse abalipo.

³⁷ Bonse balikulila ulo balikumukumbatila nokumufyomfyonta pakumulaya.

³⁸ Balikulilishika pamashiwi asosele ati, “Tamwakambonepo nakambi iyowo.” Elo balimushikishe kubwato.