Biblia Todo Logo
Bìoball air-loidhne

- Sanasan -

Hebele 13 - Chipangano Chabwangu


Ifyo twingasekesha Lesa

1 Twalilileni ukutemwana nga abanankashi.

2 Mulokwibukisha ukupokelela abalwendo mumananda yenu. Bambi abachitile mfi akale, balipokelele abangelo ukwambula ukwishiba.

3 Mulokwibukisha abali muchifungo, kubati mukochulila pamo nabo. Mulokwibukisha abakochula, kubati mukochulila pamo nabo.

4 Ichupo mulokuchichinshika, abalume nabanakashi babo balokuchetekelana pakuti ababulale-lale nababuchende Lesa akabapingula.

5 Mwilokutemwa indalama, kuntu sekeleleni kufyo mukwete. Pakuti Lesa asosele ati, “Nshakamushepo nangula ukumulekelesha iyowo.”

6 Echo katusose ukwambula ukutina ati, “Bashikulu ebwafwilisho bwanji, nshakatinepo. Nindo umuntu enganchita?”

7 Mulokwibukisha intungulushi shenu ishalikusosa amashiwi aku Lesa. Ibukisheni ifyabaponene pamulandu wabwikashi bwabo nakambi twalilileni muchichetekelo chabo.

8 Yesu Klistu eye enka, mayilo, lelo nenshiku shonse.

9 Mwisuminishapo ifisambisho ifipusene-pusene nefilwendo ukumufulunganya. Ichilingile. Uchitukosha imitima bwanshi bwaku Lesa tetufutopo utusosa pafyakulya. Amafunde nga tayaafwilishepo abo abali kuyakonka.

10 Nomba bachipupila ba Bayuda tekuti balye ifipupilwa pafipupo fyesu.

11 Chipupila Mukulu euleta umulopa wanama Kuchifulo Ichabutisha ukuti aupele ukuba ichipupo pamulandu wamabifyo. Nomba inama iine-iine, balikochela kunse yamushi.

12 Echo Yesu naye alifwilile kunse yamushi pakuti awamye abantu kumabifyo abo nomulopa wakwe.

13 Katiyeni nomba kuli kunse yamushi nokuchulila nakwe pamo.

14 Pakuti panonshi fwebo tatukwetepo umushi uwakwikalililamo iyowo, tukolindila umushi umbi uuli nokwisa.

15 Echo katulokutondayisha Lesa muli Yesu. Ukuti abe ichipupo chesu. Ukutotela kwesu kube kubati fitwalo fyabantu abasumina mwishina lyakwe.

16 Mwilokulabukilapo ukuchita ifiweme nokwafwilishanya pakuti mfi efipupo ifisekesha Lesa.

17 Mulokumfwila intungulushi shenu nokushikonka. Pakuti ebaletangata ubumi bwenu ukwambula ukutusha, elo bakolindila ukufisulula ifyamilimo yabo pamenso yaku Lesa. Nga mwabomfwila, bakulapyunga imilimo yabo nokusekelela. Nga tamuchitilepo mfi, bakupyunga nensoni. Elo nchi tachakamwafwepo.

18 Mulokutulombelako nafwe. Pakuba tuli namalangulushi ayaweme ayakufwaya ukuchita ifyalungama.

19 Ichikulu nkoti mulokulombesha kuli Lesa ukuti ambweshe kuli mwebo bwangu-bwangu.


Ukulomba

20 Lesa upela umutende, alibushishe Bashikulu Yesu kubafwa, Ye ali ni Chembela mukulu wambelele pamulandu wamfwa yakwe ili chishibilo ichachipangano ichitapwa.

21 Ngu Lesa amupele ifiweme fyonse ifyo mukabila ukuti muchite ifyo afwaya. Elo ukupitila muli Yesu Klistu achite muli mwebo ifyo ifimusekesha. Klistu achinshikwe umuyayaya. Ameni.


Amashiwi akupelako

22 Nkomupapata mwe bawesu, mulokumfwilako amashiwi nga ayakukoselesha pakuti ndilembele mubwipi.

23 Nkofwaya ukuti mwishibe ati wesu Timoti alifumamo muchifungo. Nga ayisa bwangu, nakwisa nakwe kuli mwe.

24 Mutuposesheko umutende kuntungulushi shenu nabantu baku Lesa bonse. Abantu bonse abaku Itali bakomuposha umutende.

25 Lesa amukwatile ubwanshi bonse.

Chilala New Testament © Bible Society of Zambia, 1998.

Bible Society of Zambia
Lean sinn:



Sanasan