Galatiya 1 - Chipangano Chabwangu

¹ Nine Paulo umutumwa, tanshatuminwepo nomuntu, kuntu Yesu Klistu na Lesa Bata bo ababushishe Yesu Klistu kubafwa.

² Nebo nabawesu bonse nkuno, tukomuposha umutende mwe bafilonganino ifyamu Galatiya.

³ Lesa Bata na Yesu Klistu Shikulu wesu bamupele ubwanshi nomutende.

⁴ Yesu aliipele pamulandu wamabifyo yesu ukuti atupulushe kumabifyo amuno chalo, ukubati ifyo Lesa Bata balikufwaya.

⁵ Kuli Lesa kube ubuleme inshiku shonse. Ameni.

Ubutumi Bwawama bumo bwenka

⁶ Ndishimbilwe ukwinekantu pakuti mwaendesha ukusha Lesa uyo uwamwitile mubwanshi bwaku Yesu nokukonka ubutumi bumbi.

⁷ Pakuba tapapo “Ubutumi Bwawama bumbi” iyowo, kuntu kuli bantu bambi abakofwaya ukumufulunganya ukupitila mukusendeka Ubutumi Bwawama ubukososa ifyaku Klistu.

⁸ Umuntu uuli onse, nangula fwebo nangu umungelo uufuma kumulu, nga amusambisha ubutumi bwawama ubupusene kuli mbulya twamusambishe, Lesa amupingule ukumuposa mumulilo uutashimapo.

⁹ Tulisoselepo kale, nakambi tukobweleshapo, nga umuntu amusambisha ubutumi bwawama ubupusene kuli mbulya mwapokelele, Lesa amupingule ukumuposa mumulilo uutashimapo.

¹⁰ Ulo nkososa mfi, napo nkofwaya ukulumbanishiwa kubantu? Nangu panini, kuntu Lesa bwaka. Napo nkofwaya ukusekesha abantu? Iyowo, nga nalikufwaya ukuchita mfi, tekuti mbepo umupyungi waku Klistu.

Ifyo Paulo abele umutumwa

¹¹ Mwe bawesu, kamwebe ukuti Ubutumi Bwawama mbu nsambisha tabwafuminepo kumuntu.

¹² Nshapelwepo nangula ukusambilishiwa kumuntu iyowo. Yesu Klistu ewabufisulwile kuli nebo.

¹³ Mwalyumfwile ifyamyendele yanji ulo nali mu Chiyuda. Nalikuchusha ichilonganino chaku Lesa ukwinekantu ukuti nchonaule.

¹⁴ Echo nali pantanshi yabananji bonse mukuchita ifya Chiyuda. Nachine nali uwachinchila mutufuto utwafikolwe fyesu.

¹⁵ Nomba Lesa umwine alinsalile kale nokunjita ulo nshilafyalwapo.

¹⁶ Atemenwe ukwebati amfisulwile Umwana wakwe ukuti mbilishe Ubutumi Bwawama ubusosa ifyaku Ye kubenafyalo. Tapapo uwo nayipushishepo pa Butumi mbu,

¹⁷ nangu ukuya ku Yelusalemu kuli mbalya abali abatumwa ulo nebo nshilaba. Nomba nayile ku Alabiya, ukufumapo nalibwelele ku Damasikasi.

¹⁸ Ulo papitile imyaka itatu, nayile ku Yelusalemu mukubona Petulo. Nayikele nakwe inshiku ikumi nashisano.

¹⁹ Nshabwenepo umutumwa uuli onse, sembi Yemusi wabo waku Bashikulu.

²⁰ Nkolapa pamenso aku Lesa ukuti ifyo nkomulembela fyachine, nshikobepapo iyowo.

²¹ Panuma nayile kuchalo cha Siliya na Silisiya.

²² Panshita njilya, abena Klistu bakufilonganino ifyaku Yudeya tabalati bambonepo iyowo.

²³ Baumfwile bwaka ati, “Umuntu ngulya uwalikutuchusha kale, nomba akosambisha ichichetekelo icho kale alikufwaya ukonaula.”

²⁴ Elo balichinshikile Lesa pamulandu waku nebo.