Filipi 1 - Chipangano Chabwangu

¹ Nine Paulo na Timoti abapyungi baku Klistu Yesu. Twalembela bonse mwe bekala mumusumba wa Filipi, bo abali bantu baku Lesa muli Klistu Yesu. Tukolembela nakambi intungulushi nabapyungi abachilonganino.

² Ubwanshi nomutende ukufuma kuli Lesa Bata na Bashikulu Yesu Klistu fibe namwe.

Paulo alombela ichilonganino chaku Filipi

³ Ndatotela Lesa wanji lonse ulo mwibukisha.

⁴ Lonse ulo mulombelako, ndalomba nokusangalala.

⁵ Nkomutotela pakwikatana pamo nane mukungafwilishako ukubilisha Ubutumi Bwawama ukufuma pakutatika ukufika nanduno.

⁶ Echo ndishibile ukwebati Lesa uwatatikile umulimo uuweme ngu muli mwe, akutwalila ukufika ukashile pakasuba ulo Klistu Yesu akubwela.

⁷ Ndamwibukisha nokumulangulukapo bonse, pakuba efyo chilingile ukuba. Pakuti mwebo twayikatana nane mwishuko ndi Lesa ampela, ulo ndimuchifungo nolo nali mubwanalale mukuchingilila nokushininkisha Ubutumi Bwawama.

⁸ Lesa ekamboni wanji ukwebati ndamufuluka nomutima wanji onse, pakuba nalimutemwa kubati kutemwa kwaku Klistu Yesu umwine.

⁹ Nkolomba ukwebati ukutemwana kwenu kulokukulilako bonse ukuchila, mukwishiba elo namukumfwisha ifintu ukufikapo.

¹⁰ Elo mwakwishiba ukusala ifiweme ukufikapo. Nomba pakasuba Klistu akubwelelamo akumusanga bwaka abakaele, abatakwetepo umulandu nangu pamo.

¹¹ Elo ubumi bwenu bubwenesha imilimo iiweme iifuma kuli Yesu Klistu, ukuti abantu bonse bachinshike nokutondayisha Lesa.

Kuli nebo ubumi ni Klistu

¹² Bawesu, nkofwaya ukuti mwishibe ukwebati ifyanchitikile fyalingafwilishako ukutanda Ubutumi Bwawama.

¹³ Echo abashilikali bonse abalonda inanda yamfumu, nabambi bonse abali nkuno, balishibile ati ndimuchifungo pamulandu waku Klistu.

¹⁴ Nomba pamulandu wakuti ndimuchifungo, bawesu abenji balishipile imitima ukuchetekela kale muli Bashikulu, elo bakobilisha Amashiwi aku Lesa ukwambula umwenso.

¹⁵ Chachine, bambi babilisha ifyaku Klistu mubufuba namukutalikishanya. Nomba eko bali bambi abakobilisha nomutima wakwebesha.

¹⁶ Mba abakulekelesha babilisha pamulandu wakutemwa. Pakuba balishiba ukwebati Lesa alimpela umulimo uwakulama Ubutumi Bwawama.

¹⁷ Nomba mbalya abakubalilapo, tababilishapo ifyaku Klistu mukwebesha. Baba bwaka abayitemwa abene, elo bafwaya ukunundilapo amachushi ulo ndimuchifungo.

¹⁸ Nomba temulandupo iyowo! Nangu mukuchenjeleka, nangula mukwebesha, ichikulu bakobilisha ifyaku Klistu. Echo ndasangalala.

¹⁹ Elo nshakalekepo ukutemwa pakuti ndishibile ati mukulomba kwenu nokwafwilisha kwa Mupashi uwapelwa na Yesu Klistu nakukakulwa.

²⁰ Echo nkopembela mukuchetekela nomutima onse ukwebati nshakomfwepo insoni iyowo. Nangu ndinobumi nangu nafwa, lonse nkofwaya ukuba uwashipa nokuleta umuchinshi kuli Klistu.

²¹ Kuli nebo ubumi ni Klistu, elo imfwa bunonshi.

²² Nomba nga ukuba nobumi kuti nakwata ishuko lyakubomba imilimo yakubwenesha ifitwalo, kanshi nshinshibilepo ichakusalapo.

²³ Natanganikwa. Nkofwaya ukufuma muli nchino chalo nokuya kwikala pamo na Klistu pakuba nchi echingansekesha ukwinekantu.

²⁴ Nomba pamulandu waku mwebo chingawama ukwebati njikale uwabumi.

²⁵ Ukwambula ukukayika, ndishibile ati ndinokwikalapo. Nakupitilila ukwikala namwebo bonse, ukumwafwa pakuti ichichetekelo chenu chikulileko, elo chimupeleko ukusangalala ukuchila akale.

²⁶ Echo ulo nakufika uko muli mukaba nokusekelela nokuyitakisha muli Klistu Yesu pamulandu waku nebo.

²⁷ Ichikulu chakwebati imyendele yenu ibe umo Ubutumi Bwawama busosa ifyaku Klistu. Nangu nayisa ukumubona nangu njikale ukutali, nkofwaya ukumfwa ati mulomfwana nokwafwilishanya mukulwa inkondo pamulandu wa Butumi Bwawama.

²⁸ Mwilokusuminishapo ukuti utupondo twenu tulokumutinya munshila iili yonse. Mfi fyonse fyakubashinina ukuti bo bakonaulwa, nomba mwe mwakupuluka. Lesa ewakumuchitila fyonse mfi.

²⁹ Pakuba alimupela ishuko, telyakuchetekela bwaka, kuntu nokumfwa ukufinya pamulandu wakwe.

³⁰ Elo namwe mukulwa inkondo iyo mwabwene nkolwa, iyo nchili ndelwa nanduno ukubati nimfilya mwaumfwa.