Filimoni 1 - Chipangano Chabwangu

¹ Nine Paulo umufungwa pamulandu waku Yesu Klistu. Tuli na Timoti wesu. Twalembela webo Filimoni we mutemwekwa nomupyungi munesu muli Klistu,

² nakuli Afiya inkashi yesu nomushilikali munesu, Alikipo pamo nechilonganino chabena Klistu ichikumanina munanda yakwe.

³ Lesa Bata pamo na Bashikulu wesu Yesu Klistu bamupele ubwanshi nomutende.

Ifyakutemwa kwakwa Filimoni nechichetekelo chakwe

⁴ Ndatotela Lesa wanji lonse, nokukulangulukilako mukulomba kwanji.

⁵ Pakuti ndomfwa ukutemwa uko ukwete pabantu baku Lesa, elo nechichetekelo chobe muli Bashikulu Yesu.

⁶ Nkolomba ukuti ichichetekelo icho ukoakana nabo chibombe imilimo ukufikapo, ukuti ufishibishe bwino fyonse ifiweme ifyo tupokelela muli Klistu.

⁷ We wesu ukutemwa kobe kulansekesha nokunchinchisha ukwinekantu. Elo ulasekesha nemitima yabantu baku Lesa bonse.

Paulo apapatilako Onesimasi

⁸ Pakuti niwe wesu muli Klistu, ningakwata insambu yakukwebako icho ulingile ukuchita.

⁹ Nomba pamulandu wakukutemwa echalenga ukwebati nkupapatile bwaka, nebo ne Paulo umukote, nakambi ne uli muchifungo pamulandu waku Klistu Yesu.

¹⁰ Nkokupapata muli Klistu pamulandu wakwa Onesimasi uyo uwaba mwana wanji ulo ndimuchifungo.

¹¹ Akale takwetepo akantu kuli webo, kuntu nomba mupyungi umwinenene kuli webo, elo nakuli nebo.

¹² Nomba namubwesesha kuli webo. Nachine mukuchita mfi, chili kubati nakupela nomutima wanji onse.

¹³ Nalikufwaya ukwebati tulokwikala nakwe nkuno ulo nchili muchifungo pamulandu wakubilisha Ubutumi Bwawama, pantu eukongafwilishako muchifulo chobe.

¹⁴ Nshikofwayapo ukukupatikisha ukwebati ungafwe, kuntu nkomfwaya ukuti wemwine uyipingule ukuchita mfi.

¹⁵ Nalimo Onesimasi afumine kuli webo panshita inini nji ukuti ese ekalilile nawebo lonse.

¹⁶ Ebapo ati musha bwaka iyowo, kuntu nga mutemwekwa muli Klistu. Ine nalimutemwa ukwinekantu, nomba webo ulingile ukumutemwa ukuchilapo pantu nomba mwina Klistu munobe uwatemwekwa.

¹⁷ Kati ukonangulukila ukuti ndimupyungi munobe, umupokelele nga mfilya ungampokelela nebo.

¹⁸ Nga alikubifishapo nangula ali nenkongole kuli webo, fibe mulandu wanji.

¹⁹ Nine Paulo newalemba amashiwi nga nokuboko kwanji, ukwebati nkalipila umulandu onse. (Lelo nshikokwibukishako iyowo ukwebati inkongole wakwata kuli nebo bumi bobe.)

²⁰ Ina, we wesu nkofwaya ukuti ungafwilisheko muli Bashikulu. Nga wesu muli Bashikulu, unsekelesheko.

²¹ Ulo nkolemba mfi, ndishibile ukwebati wakuchita ifyo nkokupapata. Ndishibile ukwebati wakuchisha ukuchita pali mfi nakupapata.

²² Chimbi nacho ninchi: unteyanishisheko umwakufikila, pakuti nkochetekela ukuti Lesa ali nokwasuka ukulomba kwenu nokumbwesesha kuli mwebo.

Umutende wakumupwilo

²³ Epafulasi, uwo tuli nakwe muchifungo pamulandu waku Yesu Klistu, akuposha umutende.

²⁴ Ababomfi bananji ba Maliko na Alisitakasi, Dimasi na Luka nabo bakuposha umutende.

²⁵ Ubwanshi bwaku Bashikulu Yesu Klistu bube namwebo bonse.