Efeso 1 - Chipangano Chabwangu

¹ Nine Paulo umutumwa waku Klistu Yesu uwasalwa kukufwaya kwaku Lesa. Nkolemba kalata nji kubantu abaku Lesa abali ku Efeso abachetekela muli Klistu Yesu.

² Lesa Bata na Bashikulu Yesu Klistu bamupe ubwanshi nomutende.

Amashuko aakumupashi muli Klistu

³ Katutondayishe Lesa Wishi waku Bashikulu Yesu Klistu. Muli Klistu ngu alitushukisha namashuko onse ayakumupashi ayo Klistu atuletele ukufuma kumulu.

⁴ Ulo Lesa talatala ichalo, alitusalile kabela muli Klistu ukuba abantu bakwe ukwebati tube ababuta, elo abatakwetepo akalema pamenso yakwe. Pakuti alitutemwa,

⁵ Lesa alipekenye kale mukufwaya kwakwe ukuti tube abana bakwe muli Yesu Klistu.

⁶ Afwayile ukwebati tumutondayishe pabwanshi bwakwe ubukulu pakutupela bwaka umwana wakwe uwo atemwesha.

⁷ Lesa alitupulusha pamulandu wamulopa wa Mwana wakwe. Elo alifutile amabifyo esu onse. Mubwanshi bwakwe ubukulu,

⁸ Lesa alibufukumwine pali fwe. Mumulangwe namukwishiba kwakwe,

⁹ Lesa alitufisulwila ubufwayo bwakwe afishile ubo apingile ukuchita muli Klistu.

¹⁰ Icho Lesa afwayile ukuchita panshita ilingile kuleta pamo ifyakumulu nefyapanonshi, na Klistu nga umutwi.

¹¹ Ifintu fyonse filachitika kubati ifyo Lesa afwaya nakambi kubati nimwenka umo afipekanishishe. Ye alitusalile muli Klistu ukuba abana bakwe abenenene.

¹² Afwayile ukuti fwebo fwe bakutatika ukuchetekela muli Klistu, tuchinshike ubuleme bwakwe.

¹³ Elo namwebo, ulo mwaumfwile amashiwi ayachine, Ebutumi Bwawama ubwamupulushishe, mwalichetekele Klistu. Echo Lesa abikile ichishibilo pali mwebo ukushininkisha ukwebati muli bantu bakwe ulo amupele Umupashi Wabuta uwo amulayile.

¹⁴ Umupashi Wabuta echishininkisho chakwebati twakupoka ifyo Lesa atulayile. Nakambi nchi chikoshininkisha ati Lesa akupa ubwanalale kubantu bakwe. Nomba katuchinshike ubuleme bwakwe.

Ukulomba kwakwa Paulo

¹⁵ Pali ngu mulandu, ulo naumfwile ifyakuchetekela kwenu muli Bashikulu Yesu nokutemwa uko mwakwata kubachetekela banenu,

¹⁶ nshalekapo ukutotela Lesa pamulandu waku mwebo. Ndamwibukisha lonse mukulomba kwanji.

¹⁷ Nkolomba kuli Lesa waku Bashikulu Yesu Klistu, Bata wamuchinshi, amupele Umupashi Wabuta uupa umulangwe uwakufisulula Lesa ukuti mumwishibe bwino.

¹⁸ Nkolomba nakambi ukuti Mupashi Wabuta usanike mumitima yenu pakuti mwishibe ifyo Lesa amwitile. Mwishibepo neshuko ilikulu iliweme alayile abantu bakwe.

¹⁹ Elo mwishibe ifiso fyakwe ifikulu ifibomba muli fwebo fwe bachetekela. Mfi fiso nimfilya ifikulu ukwinekantu.

²⁰ Ifyo Lesa abomfeshe pakubusha Klistu ukufuma kubafwa nokumuteka kumulyo kwakwe kumulu.

²¹ Amubikile peulu iyabutungulushi bonse, abansambu, abafiso nentungulushi. Alatungulula pafintu fyonse muli nchino chalo, elo akutungulula namuchalo chakuntanshi.

²² Lesa abikile ifintu fyonse panshi yamakasa aku Klistu. Elo amuchitile umukulu pali fyonse ukuti abe umutwi wachilonganino.

²³ Ichilonganino emubili waku Klistu, elo chayiula na Yesu uyo uwayiusha ifintu fyonse.