3 Yohane 1 - Chipangano Chabwangu

¹ Nine nemukote, nkolembela Gayusi uyo natemwesha chine-chine.

² We mutemwekwa wanji, nkolomba ukuti ifintu fyonse filokwenda bwino, nakambi ukuti wilokulwalapo. Ndishibile ukuti kumupashi obe uli bwino.

³ Pakuti nalitemenwe ukwinekantu ulo bawesu bambi bafikile nokunjeba ukuti ubumi bobe bwaba ubwakwebesha, ukokonka nefyachine.

⁴ Tapapo ichinengela ukutemwa ukwinekantu ukuchila ukumfwa ati abana banji bakoyenda muchine.

Bamulumbanya Gayusi

⁵ We mutemwekwa, ukochita muchine ulo wafwilisha abena Klistu banobe, ukuchilapo abeni.

⁶ Mba basosele nkuno pafyakutemwa uko wakwata pachilonganino. Kuti chawama ukwinekantu nga mwabafwilisha, mukusekesha Lesa, ukuti bapitilile mubulwendo lwabo.

⁷ Pantu ulo bayimine mubulwendo lwabo lwakubombela Klistu, tabasuminishe ukuti bafwilishiwe nabakunse.

⁸ Echo tufwile ukubafwilisha abantu abali mfi ukuti tubombele pamo mukutwala ichine.

Diyotulefesi na Demetuliyasi

⁹ Nalilembele kalata kuchilonganino, kuntu Diyotulefesi, uufwaya ukuba intungulushi yabo, taposelepo amano kufyo nalikusosa.

¹⁰ Echo ulo nakwisa, nakumwebako fyonse ifyo achita. Ena asosa pali fwebo amashiwi ayabipile. Temfi fyenka iyowo, nakambi alakana nokupokelela abena Klistu banakwe. Alakanya nabantu abafwaya ukubapokelela. Ye alafwaya nokubatamfya namuchilonganino.

¹¹ We mutemwekwa, wilatentekapo ifibi, kuntu ifiweme. Onse uuchita ifiweme, ena mwana waku Lesa, kuntu ukochita ifibipile tamubonapo Lesa.

¹² Lelo abantu bonse bachitila Demetuliyasi bukamboni ubuweme, pamo nechine. Nafwebo tuli bakamboni. Elo mwalishiba ukuti bukamboni bwesu bwachine.

Umutende wakupelako

¹³ Ndikwete ifinji ifyakusosa namwebo, kuntu nshamulembelepo muli kalata nji.

¹⁴ Nkofwaya ukumutandalila ukuti nkese sosa namwebo pakanwa.

¹⁵ Umutende ube nawebo. Bonse abanobe bakokuposha umutende. Uposheko bonse abanobe umo-umo.