2 Yohane 1 - Chipangano Chabwangu

¹ Nine nemukote, nkolembela umwanakashi uwasalwa na Lesa pamo nabana bakwe abo natemwesha. Tenepo nenka iyowo, kuntu nabonse abayishiba ichine balimutemwa.

² Tukomulembela mfi pantu ichine chaba muli fwebo nakambi chakuba nafwebo inshiku shonse.

³ Lesa Bata na Yesu Klistu Umwana wabo batupele ubwanshi, ichisa nomutende. Mfi fibe nafwebo muchine namukutemwa.

Ichine nokutemwa

⁴ Nalitemenwe ukwinekantu pakusanga ukwebati abana bobe bayikala muchine, kubati nimfilya Bata batufundilepo.

⁵ Nomba nkokupapata we mwanakashi uwatemwekwa ukuti tulundeko bonse ukutemwana. Nshikokulembelapo ifunde ilyabwangu iyowo, kuntu lyenka ndilya twakwata ukufuma pakutatika.

⁶ Ukutemwa nku nkososa kwakuti tulame amafunde aku Lesa. Nga mfilya bonse mwaumfwile kale, ifunde ndi nkomulembela lyakuti mulokutemwana.

⁷ Pakuti ababufi abenji balisalangene mpanga yonse, abo abatachetekela ukuti Yesu Klistu ayishileba umuntu wine-wine. Umuntu onse uukokana mfi wabufi, nakambi chipondo chaku Klistu.

⁸ Chenjeleni ukuti tamulufishepo ifyo mwabombela, lelo mukapokelele ichilambu chenu ichayisushiwa.

⁹ Umuntu onse uutekalilila mukusambisha kwaku Klistu, kuntu akolundako, takwatapo Lesa. Lelo uwikalilila mukusambisha nku nakwata bonse babili, Bata no Mwana.

¹⁰ Nga umuntu umbi ayisa kuli mwe nokumusambisha fimbi, mwimupokelelapo munanda yenu. Tekwesha nokusosapo ati, “Mutendepo bamfumu,” iyowo.

¹¹ Pakuti umuntu uumupela umutende alaba pamo nakwe mububi bwakwe.

Amashiwi akupelako

¹² Ndikwete ifinji ifyakusosa namwebo, kuntu nshamulembelepo muli kalata nji. Nkofwaya ukumutandalila ukuti nkese sosa namwebo pakanwa, tukatemwe ukwinekantu.

¹³ Abana babawenu uwasalwa na Lesa bamuposha umutende.