2 Timoti 1 - Chipangano Chabwangu

¹ Nine Paulo umutumwa waku Klistu Yesu mukufwaya kwaku Lesa. Alintumine ukuti mbilishe ubumi mbulya Lesa alayile ubo twakwata muli Klistu Yesu.

² Nkolembela webo Timoti, mwana wanji uwatemwekwa. Lesa Bata na Klistu Bashikulu wesu bakukwatile ubwanshi, inkumbu nomutende.

Paulo atotela Lesa

³ Nkototela Lesa uyo mombela nomutima wabuta kubati nimfilya fyachitile ifikolwe fyanji. Ndatotela ulo nkokulanguluka mumapepo anji akasuba nobushiku.

⁴ Ndalanguluka iminsoshi yako. Elo ndakufuluka ukwinekantu ukufwaya ukukubona ukuti ningaba nensansa.

⁵ Inshita shonse ndalanguluka nechichetekelo chobe ichinenene. Ichichetekelo nchilya ichali muli bambuya bobe ba Loisi namuli banoko ba Yunisi. Elo nkochetekela ukuti nawebo uli nacho.

⁶ Pamulandu ngu nkokwibukisha ukuti ichabupe icho Lesa akupele ulo nakubikilepo amaboko anji, uchilange ukuti chisanike ukubati mulilo.

⁷ Pakuti Lesa tatupelepo Umupashi wamwenso iyowo, kuntu uutupela ifiso, ukutemwa nokwikanya.

⁸ Wibapo nensoni ukubela bukamboni Bashikulu wesu. Nakambi wibapo nensoni pamulandu waku nebo ne uuli muchifungo pamulandu wakwe. Nomba uyipekanye ukuchula pamulandu Wabutumi Bwawama ukulingana nefiso ifikupela Lesa.

⁹ Ye alitupulusha nokutwita ukuti tube ababuta, tepamulandu wakuti twapyungilepo imilimo iiweme iyowo, kuntu twalitilwe ukulingana nobufwayo bwakwe. Elo alitwita muli Klistu Yesu uwatukwatile ubwanshi inshita tayilafika.

¹⁰ Nomba Lesa alitufisulwila mfi mukwisa kwa Mupulushi wesu Klistu Yesu, engu uwachimfishe ifiso fyamfwa nokulanga ubumi butashilapo ukupitila mu Butumi Bwawama.

¹¹ Lesa alinsontele ukuti mbe kabilisha, umutumwa, elo nakasambisha Wabutumi Bwawama.

¹² Echo nkochulila mfi. Nangu chibe mfi, nshuumfwapo insoni iyowo pakuti ndimwishibile uyo nachetekela. Elo nalishininkisha ukuti kuti ansungisha bwino ukufikila pakasuba kabupingushi ifyo ampele ukuti nsunge.

¹³ Ubakishe onse amashiwi ayanenene ayo waumfwile kuli nebo ukuti abe ichakubwenako chobe. Uchite mfi muchichetekelo nechitemweko icho ukwete muli Klistu Yesu.

¹⁴ Ulame bwino ifiweme ifyapelwe kuli webo ukufuma ku Mupashi Wabuta uwaba muli webo.

¹⁵ Walishiba ukuti bonse abamuchalo cha Asiya balinshile. Pakati kabo paba Figelusi na Hemogenesi.

¹⁶ Bashikulu bakwatile inkumbu ulupwa lwa Onesifolasi, pakuti inshita ishinji alensansamusha. Tabelepo nanebo insoni nangu nali muchifungo.

¹⁷ Ulo afikile bwaka ku Loma, alimfwayile ukwinekantu ukufikila ulo ansangile.

¹⁸ Bashikulu bamusuminishe ukuti apokelele inkumbu kuli Lesa pabushiku bwabupingushi. Walishiba bwino ukuti alingafwilishe ukwinekantu ku Efeso.