2 Kolinto 1 - Chipangano Chabwangu

¹ Nine Paulo umutumwa waku Yesu Klistu ukulingana nokufwaya kwaku Lesa. Ndi nawesu Timoti. Tukolembela ichilonganino chaku Lesa ichili ku Kolinto nabantu bonse abaku Lesa abali muchalo cha Akaya.

² Lesa Bata na Bashikulu Yesu Klistu bamukwatile ubwanshi nokumupela umutende.

Paulo akototela Lesa

³ Tutondayishe Lesa Wishi waku Bashikulu wesu Yesu Klistu. Ebata bankumbu abatutalalika imitima.

⁴ Lesa alatwafwilisha mumachushi onse ukwebati nga mfilya atwafwilisha nafwe twafwilisheko bawesu abali pakati kamachushi ayapusene-pusene.

⁵ Pakuti tulomfwa ukufinya ukwinekantu pamo na Klistu, munshila imo yenka, Klistu akutwafwilisha ukuchilapo.

⁶ Nga tukochula, nimukuti mwe musangemo ubwafwilisho nokupuluka. Nga atwafwilisha fwebo, nimukuti namwe musangemo ubwafwilisho nokupokelela ifiso ifyakushipikisha ulo mukoumfwa ukufinya mufyo tukopitamo.

⁷ Ukuchetekela kwesu pali mwe kukosele ndi. Tulishibile ukwebati nga mfilya mukochula pamo nafwe, mwenkamo mwakusanga ukwafwilishiwa mubwafwilisho ubo tupokelela.

⁸ Nomba bawesu nkofwaya ukwebati mwebe amachushi awo twakumene nawo mu Asiya. Balituchushishe ukuchisha pafiso fyesu ichakuti tatwali kulangulukapo ukwebati twakuba abomi.

⁹ Nachine mumitima yesu twalikulanguluka ukwebati epela twapingulwa kukufwa. Mfi fyalichitikile ukuti twilayichetekela, sembi Lesa uubukisha abafwa kumfwa.

¹⁰ Ye ewatupulwishe kumachushi aya mfi angatuletela imfwa, elo akutupulusha nakambi. Pali ye twashintililapo ichichetekelo ichakuti akutupulusha nakambi.

¹¹ Mulokutwafwilishako mumapepo enu. Echo abantu abenji bakutondayisha Lesa muchifulo chesu pafyo Ye atuchitile mubwanshi bwakwe.

Ifyabulwendo bwakwa Paulo

¹² Icho tukoyitutumwinapo chakuti imitima yesu ikotusuminisha ukwambula ukutwishika ukwebati ukuli konse uko twapita, nokuchilapo pakati kenu, Lesa alitupela ubumi ubutalipo ubwabunkalwe. Ubumi mbulya tabwalipo pamulandu wamulangwe wabantu iyowo, kuntu nipabwanshi bwaku Lesa.

¹³ Tukomulembelapo fyenka ifyo mungapenda nokumfwikisha bwino. Nkochetekela ukwebati

¹⁴ nga mfilya mwatatika ukutwishiba panini, mwakutwishiba ukufikapo ukuti mungamekelapo pali fwe kubati nimfilya tukamekelapo pali mwe mukasuba kaku Bashikulu Yesu.

¹⁵ Pakuti pali mfi nali uwachetekela, nalilangulukile ukwebati njise mutandalile ukwebati mushukishiwe pakumutandalila imiku ibili.

¹⁶ Nali kulanguluka ukupita kuli mwe pabulwendo bwanji ubwaku Masedoniya. Elo nkapiteko nakambi pakubweluluka nkulya ulo nakuya ku Yudeya.

¹⁷ Napo ulo nateyenye amapange nga, mwalikulanguluka ukwebati nalikuchita ifyabwaka? Napo nkoteyanya kubati wakusabaila uungasosa ati, “Ina, ina” elo “Iyowo, iyowo” panshita imo?

¹⁸ Napali Lesa wachine nkolapa ukuti amashiwi nga tukomweba taalipo “Ina” nangu “Iyowo.”

¹⁹ Yesu Klistu, Umwana waku Lesa, uwo nebo, Sailasi na Timoti twamusambishe, taali “Ina” nangu “Iyowo” panshita imo, nomba inshita yonse aali “Ina” waku Lesa.

²⁰ Elo ifintu fyonse Lesa alayile fyachitikile na “Ina” enka ngu. Echo muli Yesu Klistu tusosa ati, “Ameni,” mukuchinshika Lesa.

²¹ Lesa eutushininkisha pamo namwebo muli Klistu. Ewatusubile, pamo namwebo

²² akakatikapo ichishibilo chakwe, nokubika Mupashi Wabuta mumitima yesu ngechishininkisho chamfilya ifikoyisa.

²³ Lesa ekamboni wanji pakuti icho nshafikilepo ku Kolinto chali ichakuti nimwansha nsoni.

²⁴ Tekwebati tukofwaya ukumupatikisha ifyo mulingile ukuchetekela. Ukusosa pachichetekelo chenu, muli abakosa ndi. Ulo tufwaya ukwafwilishanya namwe kwebati mube abasekelela.