1 Yohane 1 - Chipangano Chabwangu

Ifya ishiwi ilyabumi

¹ Nkomulembela pafya ishiwi ilipela ubumi ilyaliko ukutula pakubala. Twalilyumfwa nokulibona namenso esu. Ina, twalilibona nokukumyako namaboko esu.

² Ulo mbu bumi bwaboneke, twalibubwene. Nomba tulasosa pali mbu bumi butashilapo ubwali na Bata, elo bwalishibikwe kuli fwebo.

³ Echo twabona nokumfwa tukobilisha kuli mwebo, ukuti mwe nafwebo tukumane pamo na Bata no Mwana wabo Yesu Klistu.

⁴ Twalemba mfi ukuti ukutemwa kwesu kube ukwafikapo.

Lesa elubuto

⁵ Amashiwi ayo twaumfwile ku Mwana wakwe akuti Lesa lubuto. Muli Ye tamupo imfinshi iyowo.

⁶ Nga twasosa ukuti twaba mwisenge nakwe ulo tukoyenda mumfinshi, tukoyibepa, nefyo tuchita fyabwaka.

⁷ Lelo nga twaba mulubuto, nga mfilya Ye aba mulubuto, ekwebati bonse ifwe twaba mwisenge nakwe. Elo nomulopa waku Yesu, Umwana wakwe, ulatuwamya kumabifyo onse.

⁸ Nga twasosa ukuti tatwakwatapo bubi, twayibepafye, nechine tamupo muli fwe.

⁹ Lelo nga twaebelela ububi bwesu kuli Lesa, ena wachishinka nakambi aba uwalungama, akatwelela ububi bwesu nokutuwamya kufyo tubifya.

¹⁰ Nga twasosa ukuti tatwabifyapo, tulalenga Lesa ukuba uwabufi, ekuti namashiwi akwe taalipo muli fwe.