1 Timoti 1 - Chipangano Chabwangu

¹ Nine Paulo umutumwa waku Klistu, nga mfilya asosele Lesa, Umupulushi wesu namuli Klistu uutupela ukulolela kwesu.

² Nkokulembela webo Timoti mwana wanji uwakwebesha muchichetekelo. Lesa Bata na Klistu Yesu Bashikulu wesu bakupele ubwanshi, inkumbu, elo nomutende.

Muchenjele nabasambishi babufi

³ Kubati nimfiya nakwebele ulo nalikuya ku Masedoniya, wikale mu Efeso nokukanya abo abakosambisha ifyabufi.

⁴ Ubebe ukuti baleke ukukonka utufuto twakale utuleta bwaka ukutalikana nokusunga amashina ayamikowa aatashilapo. Mfi tafitwalapo kubufwayo bwaku Lesa ubukochitika ukupitila muchichetekelo.

⁵ Icho nebo nkolanguluka chakuti nkusambishe ube nokutemwa ukukofuma mumutima wabuta, ukuba namalangulushi aaweme nechichetekelo ichinenene.

⁶ Kanshi abantu bambi balipatukako kuli mfi fyonse. Baliiposele mukutalikana ifyabwaka.

⁷ Bakofwaya ukuba abasambishi bamafunde aku Lesa, kuntu tabachetekelapo ukufikapo ifyo bakososa nefyo basumina.

⁸ Twalishiba ukuti amafunde akwa Mosesi aweme nga chakuti mukoabomfya bwino.

⁹ Tulingile ukwibukisha ukuti amafunde taapangilwa pabantu abaololoka, kuntu bampula-mafunde, notupondo, abatachetekelapo Lesa, imbifi, abatalombapo, abepaya bawishibo nabanyinabo, elo nabantu bambi.

¹⁰ Amafunde nga apangilwa abachenchemeshi nabang’o babantu babubi, bakamboni ababufi nambalya abachita ifintu fimbi ifyabipa ifitalolele muchine.

¹¹ Ichisambililo nchi chikosangwa mu Butumi Bwawama ubo Lesa uwamuchinshi nakambi uwashuka ampele.

Ukulumbanya Bashikulu pankumbu shabo

¹² Nkototela Klistu Yesu Bashikulu wesu abo abampela ifiso, pakuti banangulukile ukuba wachine nokunsota ukuti ndokumupyungila.

¹³ Nangu chingaba ati nalikumusalula, kumuchusha, elo nokumutuka. Nomba Lesa alimbele inkumbu, pantu nshayishibilepo ifyo nalikuchita pakuti nshakwete ichichetekelo.

¹⁴ Echo ubwanshi bwaku Bashikulu ubwinji bwalishile pali nebo. Alimpele ichichetekelo nokutemwa ifyo tukwete ukupitila muli Klistu Yesu.

¹⁵ Amashiwi aachine aalingile ukuchetekela ninga aakososa ati: Klistu Yesu ayishile panonshi ukupulusha imbifi. Echo nebo nalichilapo pali shonse.

¹⁶ Nomba Lesa alimbele inkumbu pakuti muli ne emo Klistu Yesu alangile ukuteka-umutima kwakwe konse. Alikufwaya ukuti ne mbifi mbe ichakubwenapo kuli bo bonse abakuchetekela pakuti bakabe nobumi ubutapwa.

¹⁷ Ku Mfumu iyamuyayaya, itafwapo neyibonekapo, Lesa umo enka, kuli Ye kube ubuleme ubwanshiku shonse. Ameni.

¹⁸ We mwana wanji Timoti nkokukonkobesha ukusunga amashiwi nga ukulingana namashiwi abasoseshi awo basosele akale ifyaku webo. Amashiwi nga abe akukwafwako mukulwa inkondo iiweme.

¹⁹ Wikatishe ichichetekelo chobe, ube nomutima wambula akalema. Abantu bambi tabomfwila kampingu wabo, elo baonaula ichichetekelo chabo.

²⁰ Mukati kabo muli Hayimeneyasi na Alekisanda bo napele kuli Satana. Nchi chakubasambisha ukuti belokusuulapo Lesa.