1 Petulo 1 - Chipangano Chabwangu

¹ Nine Simoni Petulo umutumwa waku Yesu Klistu. Nkolembela abasalwa baku Lesa, abasalangana mubweni mufyalo fya Pontusi, Galatiya, Kapadosiya, Asiya namu Bitiniya.

² Lesa Bata alimusala, ngefyo alangulukile pakutatika ukuti Umupashi Wabuta amuwamye ukwebati mumfwile Yesu Klistu nokuwamishiwa kumulopa wakwe. Lesa amukwatile ubwanshi nokumupela umutende ukuchilapo.

Ifyakulindila ukwachine

³ Tutondayishe Lesa wishi wa Bashikulu wesu Yesu Klistu. Ye, mubwanshi bwakwe, alitupela ubumi bwabwangu pakubusha Yesu Klistu kubafwa. Echo tulachetekela

⁴ ukuti tukapokelela ifyalayilwe ifiweme ifitaonayika, ifitabifiwa nefitangabosa ifyo Lesa akomusungila kumulu.

⁵ Mwebachetekela Lesa akomusunga nefiso fyakwe ukuti mukapokelele chipulusho icho Ye akufisulula panshita yakulekelesha.

⁶ Mfi fimusangalashe nangu mumfwe ukufinya nomba ulo mukoyeshekwa munshila shapusana-pusana pakanshita kanini.

⁷ Kubati golide, nangu ulaonayika, uleshekwa nomulilo. Munshila imo yenka, ichichetekelo chenu, ichachilapo pali golide, chileshekwa ukubona ati nga chinenene. Elo bakumutondayisha, bakumupela umuchinshi nobuleme ulo Yesu akuboneka.

⁸ Ngulya tamwamubwenepo, kuntu mukomutemwa. Nangu tamukomubonapo nduno, mukomuchetekela, elo mulasekelela ukwinekantu uko amashiwi tangasosapo.

⁹ Echo ukupitila muchichetekelo chenu, mulapokelela chipulusho ichamuyayaya.

¹⁰ Abasoseshi basosele kale ifyabupe ubo mwakupokelela, bafwayilishe mukufumba-fumba ifyachipulusho nchilya.

¹¹ Umupashi waku Klistu uwayikala muli bo wasosele kabela ifyakufinya ifyo Klistu akuumfwa, elo nefyamuchinshi uwo akuba nawo panuma. Abasoseshi mbalya balikufwayilisha ukwishiba ulo mfi fyakuchitika, namunshila ndo.

¹² Lesa alibafisulwile ukuti tabali ukuyipyungila benka, kuntu pamulandu wenu ulo balikusosa ifyo mumfwa nomba. Bakashimika ba Butumi Bwawama balimwebele mfi ukupitila mu Mupashi Wabuta uwatuminwe ukufuma kumulu. Abangelo nabo balefwayilisha ukwishiba ifintu mfi.

Ifyakwikala abalungama

¹³ Echo imitima yenu ibe iyayipekanya. Mube abayiluka. Mushintilile nomutima onse mukulindila kwenu pabwanshi bwaku Lesa ubo mwakupokelela ulo Yesu Klistu akuboneka.

¹⁴ Mwikale nga abana bachumfwila. Mushe imibele iyo mwalikukonka kale mukuteshiba kwenu.

¹⁵ Kubati nimfilya ali Uwabuta ngulya uwamwitile, namwe mube fyenka mfilya.

¹⁶ Amalembo asosa ati, “Mube ababuta imitima kubati nimfilya ndiwabuta umutima.”

¹⁷ Lesa takwatapo akapatulula. Alapingula chila muntu ukulingana nefyo achitile. Kati mukomwita ati Bata, mupeleni umuchinshi inshita shonse muli abeni panonshi.

¹⁸ Mulishibile bwino icho amupulwishisheko kubwikashi bwenu ubo mwasambilile kufikolwe fyenu. Taamupulwishisheko kufintu ifyonayika kubati silubale na golide iyowo.

¹⁹ Amupulwishe nomulopa uukosele umutengo. Ye balimwipeye kubati mwana wambelele uutakwetepo akasemba nangula akalema.

²⁰ Lesa alimusalile kabela ukuti akapyunge umulimo ngu talatala ichalo. Nomba inshita njino yakumupwilo aliibwenesha kuli mwe pamulandu wenu.

²¹ Ukupitila muli Ye mukochetekela muli Lesa uwamubushishe kubafwa nokumupela umuchinshi. Echo mukochetekela nokulindilila muli Lesa.

²² Nomba pakuti awamishe imitima yenu pakumfwa ifyachine, nefyo mwatemwana nabachetekela banenu, temwanenipo ukufikapo.

²³ Pakuba mwebo mwalifyalwa libili, tekumbutopo ishonayika, kuntu kuyitonayika iyaba Mashiwi aku Lesa aabumi aabelelele.

²⁴ Amalembo asosa ati, “Abantu bonse bali kubati isani, umuchinshi wabo uli kubati maluba. Isani liloma, namaluba alalukutila panshi,

²⁵ nomba amashiwi aku bashikulu akubelelela.” Amashiwi nga Butumi Bwawama ubwashimikilwe kuli mwebo.