Yohanes 7 - Taaz Weru Witu u Nunuwu'en Tombulu

Si Yesus wo sé katuari-Na

¹ Tumondongla niitu si Yesus mahliklik ung Galilea. Ni Sia é soo lumiklik u Yudea pahpaan sé tonaas né tou Yahudi witu é mahtututu' i munu' ni Sia.

² In toro niitu é merétémoma un endo wangko' né tou Yahudi, um pahkuan endo wangko' Pondok Daun.

³ Ang kuan né katuari ni Yesus wia ni Sia, “Tia'mo mento' wia'i, mangémo witi Yudea, wo sé mahkii-kiit ni Ko kangkasii mamilek am paayangen pahwangunen-Nu.

⁴ Pahpaan zéi'kan siapa zozo' in esa si mahwuni am winangunna sa sia paaz ing kata'uan né tou. Sa Ko manguna an tanu niitu, péléng sé tou wia ung kaayahan é mata'u tumoro ni Ko.”

⁵ Sé katuari-Na kimuama téntu taan ni séra én zéi'kan ma'éman wia ni Sia.

⁶ A si Yesus kumuala wia ni séra, “In tarékan én zéi'kampé' oras-Ku i mangé witi Yerusalem, taan wia ni kamu sekezé ém wéwéhan un orasna.

⁷ Sé tou wia ung kaayahan én zéi'kan mamuali i mazi'zis ni kamu, taan ni Aku én ikazi'zis néra pahpaan ni Aku sekezé mahkua am pahwangunen néra é léwo'an.

⁸ Mangémo kamu witi pésta itii. Ni Aku én zéi'kan mangé witu, pahpaan in tarékan én zéi'kampé' oras-Ku i mangé witu.”

⁹ Téntu u méikua-Na wia sé katuari-Na wo ni Sia é nimento' witi Galilea.

Si Yesus im witu um pésta Pondok Daun

¹⁰ I sé katuari ni Yesus nimangémo witi pésta Pondok Daun, ni Sia kangkasii é nimangé witu taan nimahwuni-wuni umana zéi'kan kinata'uana né tou.

¹¹ Sé tonaas né tou Yahudi menéro-néro ni Sia im witi pésta itii a mahkua, “Wisa Sia?”

¹² Lakez sé tou mahkekewitan tumoro ni Sia. Wéwéhan sé mahkua: “Ni Sia én tou lé'os.” Wéwéhan kasii sé mahkua: “Zéi'kan, ni Sia é mahlululu uman sé tou lakez.”

¹³ Taan zéi'kan siapa zozo' in esa si wuaya ing kumua tumoro ni Sia witu u sinaru né tou lakez, pahpaan ni séra é maindé' wia sé tonaas né tou Yahudi.

¹⁴ Karegas i mahlé'os um pésta itii, si Yesus muntepa witi lésaz um Walé ni Opo Empung a mahtuzu' witu.

¹⁵ Sé tonaas né tou Yahudi é mengompo' a mahkua, “Ni Sia én zéi'kan pinahtuzu-tuzu'la, taan kaa kahuman wékalakez ung kata'uan-Na?”

¹⁶ Si Yesus nimingkotla wia ni séra, “Am pahtuzu'-Ku én zéi'kan tutuzu'-Ku in esa, taan tutuzu' ni nimatumé ni Aku.

¹⁷ Si tou paaz mahwangun um paaz ni Opo Empung, ni sia é mata'u an tutuzu' itii ém wia si Opo Empung a méyé kaapa nuwu'-Ku uman in esa.

¹⁸ Si tou si mahnuwu' karia ung genangna in esa, ni sia é menéro uman u sisigi'an witu un touna in esa, taan si tou mahpenéro u sigi' wia si Opo Empung si nimatumé ni sia, ni sia én ulit wo im wia ni sia én zéi'kan siapa an towo.

¹⁹ Zéi'kankuaa si Musa é niméhémo un ukum Torat wia ni kamu? Taan zéi'kan siapa zozo' in esa im wia ni kamu si mahwangun un ukum Torat itii. Kaa kamu mahtututu' i munu' ni Aku?”

²⁰ Sé tou lakez itii nimingkotla, “Sinelazan katu' Ko! Séi si mahtututu' i munu' ni Ko?”

²¹ Kuan ni Yesus wia ni séra, “Esa uman u makakompo'en winangun-Kula im witu un endo Sabat wo ni kamu péléng é mengompo'mo.

²² Si Musa niméhé wia ni kamu an tinotoz tumoro um pahsunaten (Zozo' u sunat itii un ulitna én zéi'kan wia si Musa a méyé, taan wia sé nimaopota a méyé). Pahpaano niitu, zozo' in endo Sabat ni kamu é mahsunat sé tou.

²³ In tarékan sa si tou toro sunaten im witu un endo Sabat, wo ni kamu zéi'kan mahsaru un ukum ni Musa, kaa kamu maupi' i ni Aku limé'osa u saki witu péléng un awak ni tou im witu un endo Sabat?

²⁴ Tia'mo mahtotoz um pahwangunen ni tou in ulit kaapa zéi'kan mengiit an toro pahileken, taan totozela am pahwangunen né tou in ulit kaapa zéi'kan mengiit ung kaulitan.”

Um pahéndo-éndoan né tou tumoro wisa si Yesus a méyé

²⁵ A sé woopira tou Yerusalem mahkua, “Zéi'kankuaa si tou kenu si pahtututu'en im wunu'en né tonaasta?

²⁶ Taan ilekena, zéi'kan siapa sé siméro'la ni Sia i mahnuwu' wia sé tou wo zéi'kan siapa u méipahkukua nérama wia ni Sia. Woo katu' uli-ulit kata'uano né tonaasta i ni Siamo si Kristus?

²⁷ Tumoro si Yesus éng kata'uantamo wisa Sia a méyé, taan i si Kristus méyé, zéi'kan siapa si tou mata'u wisa Sia a méyé.”

²⁸ I si Yesus mahtuzu' witi lésaz um Walé ni Opo Empung, ni Sia mahkérét, “Niitu én ulit i ni Aku éng kata'uan niou wo kata'uan niou wisa ni Aku a méyé. Ni Aku im wia'i én zéi'kan pahpaan um paaz-Ku in esa, taan si Opo Empung si nimatumé ni aku. Ni Sia si nimatumé ni Aku én ulit wo ni kamu én zéi'kan mata'u ni Sia.

²⁹ Ni Aku é mata'u ni Sia pahpaan ni Aku ém wia ni Sia a méyé wo ni Siamo si nimatumé ni Aku.”

³⁰ A séra mahtututu' in tumion ni Sia, taan zéi'kan siapa zozo' in esa si timiona wia ni Sia, pahpaan zéi'kampé' orasna.

³¹ Taan im wia sé tou lakez itii lakez sé ma'éman wia ni Sia wo mahkua, “I si Kristus méyé, apa Sia toro mangun a makakompo'en lumakezpé'mé a makakompo'en winangun ni Tou kenu?”

³² Sé sana réwok tou Farisi mahtalinga sé tou lakez mahkekewitan tumoro si Yesus. Pahpaano niitu sé tonaas né walian wo sé sana réwok tou Farisi nimatuma sé menénéiz um Walé ni Opo Empung in tumion ni Sia.

³³ Ang kuan ni Yesus, “Zéi'mo mauréma ni Aku i memali-mali karia niou wo kumawusa niitu ni Aku é mangé wia ni Sia si nimatumé ni Aku.

³⁴ Ni kamu é mamenéro ni Aku, taan ni Aku én zéi'kan kailekan niou pahpaan ni kamu én zéi'kan mata'u méyé witu um pahwéha-wéhang-Ku.”

³⁵ Niitumo, sé tonaas né tou Yahudi é mahkukuaan wia si esa wo si esa, “Wisa un angéan-Na taka-takazan ni kita én zéi'kan mata'u mahilekan karia-Na? Apa Sia mangé wia sé tou Yahudi witi séngkotan sé mahento' wia sé tou Yunani in tumuzu' sé tou Yunani?

³⁶ Apa kahuman ung kalakoan u méikua-Namé kenu, ‘Ni kamu é mamenéro ni Aku taan ni Aku én zéi'kan kailekan niou’ wo, ‘Ni kamu én zéi'kan mata'u méyé witu um pahwéha-wéhang-Ku?’ ”

Un zano mahwéhémé ung katou-touan

³⁷ Im witu un endo kamurian i mahpésta itii, un endo totoz ipahpuu-puuna im wana an endo mahpésta itii, si Yesus rumendaié wo mahkérét, “Séi uman si maré'o, méyémo wia ni Aku wo sia wéhang-Ku un elepen.

³⁸ Séi uman si ma'éman ni Aku, tanu u méipantik witu um Pinantik Lenas: im witu un aténa én tanu mahso'so'mé u so'so'an mahwéhémé un zano katou-touan.”

³⁹ Si pahkuan ni Yesus én tumoro si Roh ni Opo Empung, si makailekan né tou ma'éman ni Sia. Pahpaan in toro niitu si Roh ni Opo Empung én zéi'kampé' niméyé, pahpaan si Yesus én zéi'kampé' pahloozen wo pahsigi'en.

⁴⁰ Sé woopira im wia sé tou lakez, sé timalinga a méikua-Nama itii, mahkua, “Si tou kenu én uli-ulit Nabi si méitaaz i méyé.”

⁴¹ Sé walina mahkua, “Ni Siamo si Mesias.” Taan sé walina kasii é mahkua, “Zéi'kan, si Mesias én zéi'kan witi Galilea a méyé!

⁴² Im witu um Pinantik Lenas é méipantik i si Mesias é suzu ni Daud wo witi wanua Betlehem, um wanua ni Daud wo méyé.”

⁴³ Niitumo sé tou lakez mahéndo-éndoan tumoro ni Sia.

⁴⁴ Sé woopira im wia ni séra é mahtition ni Sia, taan zéi'kan siapa zozo' in esa si méikationa wia ni Sia.

Sé tonaas né tou Yahudi zéi'kan ma'éman si Yesus

⁴⁵ A sé menénéiz um Walé ni Opo Empung sé méiatuma in tumion si Yesus, mawurimé wia sé tonaas né walian wo wia sé sana réwok tou Farisi. Ni séra é meligau wia sé menénéiz itii, “Kaa Sia zéi'kan méiwali nioué?”

⁴⁶ Am wingkotela né menénéiz itii, “Zéi'kampé' siapa si tou mahnuwu' tanu ni Sia!”

⁴⁷ A sé sana réwok tou Farisi mingkotla, “Apa ni kamu kangkasii é méilulu-Namomé?

⁴⁸ Wéwéhan wé si esaané im wia sé tonaas kaapa si esaané im wia sé sana réwok tou Farisi ma'éman ni Sia?

⁴⁹ Taan sé tou lakez kenu sé zéi'kan mata'u un ukum Torat, ni séra é nimakaileko un epa'!”

⁵⁰ Si Nikodemus, si esaané im wia sé sana réwok tou Farisi, si im puuna niméyémoma wia ni Sia, mahkua wia ni séra,

⁵¹ “Mengiit un ukum Torat pahkiitenta, si tou é léwo'zéi' in talingampé'la wo kata'uampé'la um winangunna taré sia ukumen kaapa zéi'kan.”

⁵² Wingkoten nérala, “Apa ni ko kangkasii én tou Galilea? Pahtata'ula um Pinantik Lenas wo makata'uannu in zéi'kan siapa si nabi witi Galilea a méyé.” [

⁵³ Kumawusa niitu a séra mawurima witi walé néra.