Yohanes 3 - Taaz Weru Witu u Nunuwu'en Tombulu

Si Yesus mahsirita karia ni Nikodemus

¹ Wéwéhan si esaané im wia sé sana réwok tou Farisi makangaran Nikodemus, ni sia én tonaas um pa'émanen né Yahudi.

² Ni sia niméyé wia si Yesus im wengimo ang kumua, “Méster, kata'uan nai ni Ko i niméyé é méiatumé ni Opo Empung i méster. Pahpaan zéi'kan siapa si tou toro mangun a makakompo'en tanu am pahwangunen-Nu itii sa zéi'kan kinaria ni Opo Empung.”

³ A mingkotla si Yesus, “Uli-ulit ikua-Kuma wia ni ko, sa si tou zéi'kan itoumé sumaup in tou taré nimatoumé, si tou itii én zéi'kan mata'u maéndo tou witi Kakolanoan ni Opo Empung.”

⁴ Ang kumuala si Nikodemus wia ni Sia, “Kura kahuman si tou in itoumé sa sia tu'amo? Toro wé sia muntep sumaup witu um poot ni ina'na wo itoumé sumaup ni ina'na?”

⁵ Si Yesus nimingkotla, “Uli-ulit ikua-Kuma wia ni ko, sa si tou zéi'kan matoumé im witu un zano wo wia si Roh ni Opo Empung, ni sia én zéi'kan mata'u maéndo tou witi Kakolanoan ni Opo Empung.

⁶ Si tou matoumé im wia si tou é mahkiit uman um paazna in tou uman, taan si tou si matoumé im wia si Roh ni Opo Empung, menou-nou mahkiit um paaz ni Roh ni Opo Empung.

⁷ Tia' ko mengompo' sa kuaang-Kula: ni ko é léwo'zéi' itoumé sumaup in tou taré nimatoumé.

⁸ U reges é mahsengoma wisa uman ung kapaazna in angéan, ni ko é mahtalinga uman un zanina, taan zéi'kan kata'uannu wisa niitu a méyé kaapa wisa un angéan niitu. Téntu kangkasii u mamuali wia sé tou sé matoumé im wia si Roh ni Opo Empung.”

⁹ Ang kumuala si Nikodemus wia ni Sia, “Kura kahuman niitu mamuali?”

¹⁰ Si Yesus mingkotla, “Ni ko é méster né tou Israel, amo kahuman niitu zéi'kan kata'uannu?

¹¹ Uli-ulit ikua-Kuma wia ni ko, ni kai é mahnuwu'ma tumoro ang kata'uan nai wo ni kai é mahkua tumoro a niilek nai, taan ni kamu soo ma'éman an ipahkua nai.

¹² Ni kamu én zéi'kan ma'éman i ni Aku mahkua wia ni kamu tumoro am wia ung kaayahan, kura kahuman ni kamu ma'éman sa ni Aku mahkua tumoro am witi kasendukan?

¹³ Zéi'kan siapa zozo' in esa si tou si nimahpené-penékoma witi kasendukan, akaz uman ni Sia si timumpamé im witi kasendukan, ni Siamo si Oki' ni Tou.

¹⁴ Wo tanu si Musa timoozla si ulé' tambaga am wangunen witu un tektek rakék witi kapelasan, téntu kangkasii si Oki' ni Tou én itooz né tou witu u salip,

¹⁵ wo péléng sé ma'éman ni Sia makailek ung katou-touan makaz ing kauré-uré.

¹⁶ Pahpaan si Opo Empung totoz rumaraaté péléng sé tou wia ung kaayahan kenu, niitumo ni Sia timambéré si Oki'-Na si esa uman, wo péléng sé tou ma'éman ni Sia zéi'kan maté, taan makailek ung katou-touan makaz ing kauré-uré.

¹⁷ Pahpaan si Opo Empung nimatumé si Oki'-Na wia ung kaayahan kenu zéi'kan i mémukum sé tou wia ung kaayahan, taan i milot sé tou wia ung kaayahan kenu im witu un ukuman wana a singkéla'.

¹⁸ Séi uman si ma'éman ni Sia én zéi'kan ukumen. Taan si zéi'kan ma'éman ni Sia é nimakaileko un ukuman, pahpaan ni sia én zéi'kan ma'éman witu u ngaran ni Oki' ni Opo Empung si esa uman.

¹⁹ Si tou zéi'kan ma'éman itii é niukum pahpaan ung kenu: U Sena' é niméyémo wia ung kaayahan, taan ung karimbengbengampé' ung kapaaz né tou, pahpaan um pahwangunen néra é léwo'.

²⁰ Péléng sé tou mahwangun a léwo'an é mazi'zis u sena' itii. Ni séra é soo méyé witu u sena' itii, pahpaan u sena' itii é mangun a léwo'an pahwangunen néra kaile-ilekan.

²¹ Taan péléng sé tou mahwangun an ulit é méyé witu u sena' itii, pahpaan u sena' itii é mangun am pahwangunen néra a mengiit um paaz ni Opo Empung kaile-ilekan.”

Si Yesus wo si Yohanes Menanarani

²² Tumondong niitu, si Yesus karia né pahtuzu'en-Na mangé witi Yudea wo nimento' witu woopirana endo karia néra wo mahsarani sé tou.

²³ In toro niitu kangkasii, si Yohanes Menanarani é mahsarani sé tou im witi Ainon, rété um wanua Salim pahpaan im witu é lakez zano. Sé tou mahéyé witu i mésaranin.

²⁴ In toro niitu si Yohanes Menanarani én zéi'kampé' méiuntep bui.

²⁵ Sé woopira pahtuzu'en ni Yohanes Menanarani é mahéndo-éndoan karia ni tou Yahudi tumoro u mememeresi un tou mengiit ung kinanaram né tou Yahudi.

²⁶ Ni séra niméyé wia si Yohanes ang kumua, “Méster, si nimahwali-walimé karia ni méster im witi leweta u so'so'an Yordan si méipahsiritamumé wia ni kai tumoro a niilekmu wia ni Sia, ni Sia kangkasii é mahsarani sé tou wo péléng sé tou é mahangé wia ni Sia.”

²⁷ A si Yohanes Menanarani mingkotla, “Zéi'kan siapa zozo' in esa si tou toro makailek apa sa niitu zéi'kan méiwéhémé ni Opo Empung.

²⁸ Ni kamu én timalingamo u méikuaku, ‘Ni aku én zéi'kan Mesias, taan ni aku é méiatumé i mahpuunamé wia ni Sia.’

²⁹ Si makaanu si broit é si brédégom, taan si kakaria ni brédégom si rimendai witu u réténa wo mahtalinga ni sia én totoz mahpaa-paaz in timalingamé u nuwu' ni brédégom itii. Téntu kangkasii ni aku, in tarékan u mahpaa-paazku ém wutulo.

³⁰ Ni Sia é léwo'zéi' kalousna im pahsigi'en, taan ni aku é léwo'zéi' kalousna im pahroros.”

Ni Sia si witi kasendukan a méyé

³¹ Ni Sia si witi kasendukan a méyé é lumouspé'mé ung kawangko'an péléng né tou, taan ni sia si wia ung kaayahan a méyé én tou wia ung kaayahan wo mahkua tumoro a mahmuali wia ung kaayahan kenu. Ni Sia si witi kasendukan a méyé é lumouspé'mé ung kawangko'an péléng né tou.

³² Ni Sia é mahkua tumoro a niilek-Na wo an tinalinga-Na. Taan zozo' in esa, zéi'kan siapa si tou ma'éman an ipahkua-Na.

³³ Séi si ma'éman an ipahkua-Na, ni sia é makaulit i si Opo Empung én ulit.

³⁴ Séi si méiatumé ni Opo Empung, ni Siamo si mahwoka' u nuwu' ni Opo Empung, pahpaan si Opo Empung é niméhémé wia ni Sia si Roh-Na karia in zéi'kan siapa akazna.

³⁵ Si Ama' é rumaraaté si Oki'-Na wo niméhémo wia ni Sia ung kawasa wana péléng am péléng.

³⁶ Séi uman si ma'éman wia si Oki', si tou itii é makailek ung katou-touan makaz ing kauré-uré. Taan séi uman si zéi'kan mahtali-talinga wia si Oki', zéi'kan makailek ung katou-touan makaz ing kauré-uré taan ukumen ni Opo Empung makaz ing kauré-uré.